بۇۇ باس حاتشىسى گۋتەرريش. فوتو: al Jazzira

بىرىككەن ۇلتتار ۇيىمىنىڭ باس حاتشىسى انتونيۋ گۋتەرريش ارنايى مالىمدەمە جاساپ، ۋكرايناداعى اتىستى توقتاتۋعا شاقىردى.

حالىقارالىق قاۋىمداستىقتىڭ باس حاتشىسى مالىمدەمەسىندە، سوعىس بولىپ جاتقان ۋكراينادا 12 ميلليونعا جۋىق ادام گۋمانيتارلىق كومەككە مۇقتاج ەكەنىن العا تارتتى. اتىس بولىپ جاتقان ايماقتاردان بەيبىت تۇرعىنداردى ەۆاكۋاتسيالاۋ جانە گۋمانيتارلىق كومەك جەتكىزۋ ءۇشىن تاراپتاردى 24 ساۋىردە پاسحا مەرەكەسىنە وراي 4 كۇن اتىس توقتاتۋعا شاقىردى.

گۋتەرريش العا تارتقان بۇۇ مالىمەتىنە ساي، گۋمانيتارلىق كومەككە ءزارۋ بولىپ وتىرعان ادامدار سانى كوپ ۇزاماي 15,7 ميلليونعا جەتۋى مۇمكىن.

ۋكراينا ءسىم باسشىسى كۋلەبا بۇۇ باس حاتشىسىنىڭ مالىمدەمەسىنە قاراتا الەۋمەتتىك جەلىدە پىكىر ءبىلدىرىپ، رەسەيدىڭ حالىقارالىق قاۋىمداستىق ۇسىنىسىن قابىلداۋى كەرەك ەكەنىن ايتتى. «رەسەي ۋكرايناداعى سوعىسىن توقتاتۋى نەمەسە گۋمانيتارلىق ءۇزىلىس بەرۋى كەرەك»، – دەگەن دميتري كۋلەبا.

The Qazaq Times