باتىس جارتى شاردىڭ ۋاقىتىمەن بەيسەنبى، 7 ءساۋىر كۇنى، بىرىككەن ۇلتتار ۇيىمى باس اسسامبلەياسىندا رەسەيدى بۇۇ-نىڭ ادام قۇقىقتارى كەڭەسىندەگى مۇشەلىك ورنىنان شىعارىپ تاستاۋ بويىنشا داۋىس بەرىلدى. رەسەيدى كەڭەستەن شىعارۋعا 93 ەل قوسىلدى، قازاقستان مەن قىتايدى قامتىعان 24 ەل قارسى داۋىس بەردى، 58 ەل داۋىس بەرۋدەن قالىس قالدى. بۇنداي قارار رەسەيدى «ادام قۇقىقتارىن اۋىر ءارى جۇيەلى تۇردە بۇزعادى» جانە ۋكراينادا حالىقارالىق قۇقىقتى ورەسكەن بۇزدى دەگەن ايىپقا بايلانىستى قارالعان ەدى.
باس اسسامبلەياداعى مۇنداي ماسەلەلەردە قاۋلى قابىلداۋ ءۇشىن ءبىر تاراپ جالپى داۋىس بەرگەندەردىڭ ۇشتەن ەكى بولەگىنەن كوپ بولۋى ءتيىس. بۇل ارادا قالىس قالعاندار ەسەپتەلمەيدى. سونىمەن، ناتيجەدە 24-كە قارسى 93 داۋىستىڭ باسىمدىعىمەن رەسەيدىڭ بۇۇ ادام قۇقىقتارى كەڭەسىندەگى مۇشەلىگى ۋاقىتشا توقتاتىلدى.
ادەتتە حالىقارالىق قاۋىمداستىقتىڭ اتالمىش ماڭىزدى كەڭەسىنەن ءبىر ەلدى شىعارىپ تاستاۋ وتە سيرەك جاعداي. داۋىس بەرۋ الدىندا ۋكراينانىڭ بۇۇ-داعى وكىلى سەرگەي كيسليتيا: «رەسەي نورمادان تىس ارەكەت ەتتى – ادام قۇقىقتارىن بۇزىپ قانا قويماي، حالىقارالىق بەيبىتشىلىك پەن قاۋىپسىزدىكتىڭ نەگىزىن شايقالتتى»، – دەدى. سوعان قوسا كيسليتيا 7 ءساۋىردىڭ رۋانداداعى گەنوتسيد كۇنىنە تۋرا كەلەتىنىن ەسكە سالىپ، الەمدەگى بۇنداي جاعدايلاردىڭ ۇدايى قايتالانۋىندا جاھاندىق بەيبىتشىلىك پەن قاۋىپسىزدىككە، ادام قۇقىعىنا قورعان بولۋداعى جاۋاپكەرشىلىگىن جەتكىلىكتى دەڭگەيدە ورىنداماي وتىرعان حالىقارالىق قاۋىمداستىقتىڭ دا جاۋاپكەرشىلىگى بار دەگەن كوزقاراسىن ايتتى.
جەنەۆادا ورنالاسقان بۇۇ-نىڭ ادام قۇقىقتارى جونىندەگى كەڭەسىنە مۇشە 47 مەملەكەت بار. باس اسسامبلەيا جاسىرىن داۋىس بەرۋ ارقىلى سايلايدى. قازىرگى ۋاقىتتا رەسەي ادام قۇقىقتارى جونىندەگى كەڭەستىڭ مۇشەسى، ونىڭ ءۇش جىلدىق مەرزىمى 2023 جىلدىڭ 31 جەلتوقسانىندا اياقتالادى. ونىڭ مۇشەلىگىن ۋاقىتشا توقتاتۋعا اقش كوبىرەك سەبەپ بولدى. ونىڭ باستاماسىنا 60-تان استام ەل قول قويدى.
ال، ماسكەۋ بولسا رەسەي اسكەريلەرى ادام قۇقىقتارىن بۇزدى جانە زورلىق-زومبىلىق جاسادى دەگەن ايىپتاردى بىرنەشە رەت جوققا شىعاردى. بۇنى ماسكەۋ بيلىگى «جالعان اقپارات» جانە رەسەيدى جاماناتتى كورسەتۋ ءۇشىن جاساپ وتىرعان ۋكراينانىڭ ارەكەتى دەپ سانايدى.
كيبەرشابۋىلعا ۇشىراعان باق وكىلدەرى قۇقىق قورعاۋ ورگاندارىنا ارىز ءتۇسىردى
ورتالىق ازيا: تاريحي، ساياسي جانە ەكونوميكالىق مۇددەلەر اياسىندا
قىرعىزستاندا تاۋەلسىز Kloop باسىلىمىنىڭ قىرعىز تىلىندەگى سايتى بۇعاتتالدى
رەسەيدىڭ دونەتسك وبلىسى كونستانتينوۆكا قالاسىنداعى بازارعا شابۋىلىنان 16 ادام قازا تاپتى
سادىر جاپاروۆ ىستىقكولدەگى ءتورت پانسيوناتتى وزبەكستانعا بەرۋ سەبەبىن ءتۇسىندىردى
پيگوجيننىڭ «ۆاگنەر» توبى ماسكەۋ تۇبىنە كەلىپ شەگىنىپ كەتتى