تۇركىمەنستان مەن يران گاز داۋىن حالىقارالىق اربيتاجدى سوتتا شەشپەك – دەپ حابارلايدى «بەيتاراپ تۇركىمەنستان» گازەتى.

اتالمىش جاعدايعا بايلانىستى «تۇركىمەن گاز» مەملەكەتتىك كومپانياسىنىڭ توراعاسى مىرات ارچاەۆ جۋرناليستەر الدىندا سويلەگەن سوزىندە: «ءبىز يران تاراپىمەن گاز داۋىنا بايلانىستى قانداي دا ءبىر كەلىسىمگە كەلە المادىق. ولار بۇل ماسەلەنى شەشۋ ءۇشىن حالىقارالىق اربيتاجدىق سوتقا جۇگىنۋدى ۇسىندى» - دەگەن. وسىدان كەيىن تۇركىمەنستان باسشىسى قۇربانعۇلى بەردىمۇحامەدوۆ يران تاراپىنىڭ ۇسىنىسىن قابىل الىپ، ەل ۇكىمەتىنە حالىقارالىق سوتقا شاعىمدانۋ ءۇشىن ءتيىستى قۇجاتتاردى دايىنداۋعا تاپسىرما بەرگەن.

تۇركىمەنستان مەن يران اراسىنداعى گاز داۋى 2007-2008 جىلدار ارالىعىندا باستالعان بولاتىن. ءدال وسى جىلدارى يران تاراپى قىستىڭ قاتتى بولۋىنا بايلانىستى تۇركىمەنستاننان الاتىن گاز كولەمىن ارتتىرۋعا ءماجبۇر بولعان. بىراق تۇركىمەنستان يرانعا قوسىمشا گازدى بىرنەشە ەسە قىمبات باعامەن ساتقان. ولار كەلىسىم بويىنشا، 2008 جىلعا دەيىن 1000 كۋب مەتر گازدى 40 دوللاردان ساۋدالاپ كەلگەن. الايدا يرانداعى قىستىڭ قاتتى بولۋىن پايدالانىپ، كوگىلدىر وتىن باعاسىن 40 دوللاردان، 360 دوللارعا بىراق قىمباتتاتقان. وسىدان كەيىن يران تاراپى تۇركىمەنستانعا 2 ميلليارد دوللار قارىز بولىپ قالعان. يران پرەزيدەنتى حاسان رۋحاني اكىمشىلىگىنىڭ سوزىنشە، ەل ۇكىمەتى تۇركىمەنستان الدىنداعى سوڭعى ءۇش جىلداعى بارلىق قارىزدارىن تولەپ بىتكەن. ال ونىڭ الدىنداعى قارىزدار وزگە پرەزيدەنتتىڭ كەزىندەگى قارىزدار بولعاندىقتان ونى قايتا قاراۋ كەرەك.

نەگىزىنەن يراندا كوگىلدىر وتىنعا وتە باي مەملەكەت. بىراق ونىڭ تابيعي گاز قورىنىڭ بارلىعى ەلدىڭ وڭتۇستىگىندە ورنالاسقان. سول سەبەپتى ولار 1997 جىلدان بەرى سولتۇستىك پروۆينتسيالارىن تۇركىمەنستان گازىمەن قامتاماسىز ەتىپ وتىر.

“The Qazaq Times”