بانكتەر تۇتىنۋشىلىق نەسيە بەرۋدى قايتا قولعا الا باستادى

تۇتىنۋشىلىق نەسيە بەرۋ قايتا جاندانىپ كەلەدى. وسى جىلدىڭ سوڭعى ءۇش ايىنان بەرى جەكە تۇلعالارعا بەرىلگەن تۇتىنۋشىلىق قارىز پورتفەلى ارتىپ وتىر. مىسالى وسى جىلدىڭ مامىر ايىندا مۇنداي نەسيەلەر كولەمى 1%-عا، ءساۋىر ايىندا 1,4%-عا، مامىر ايىندا 1,6%-عا دەيىن كوتەرىلگەن، دەپ حابارلايدى ranking.kz.

ال جىل باسىنان بەرى قازاقستاندا جەكە تۇلعالارعا بەرىلگەن تۇتىنۋشىلىق نەسيە  4%-عا ءوسىپ، 2,6 ترلن تەڭگەنى قۇرادى. وسىلايشا بانكتەر تۇتىنۋشىلىق نەسيە ساپاسىن جاقسارتۋ ارقىلى حالىقتى بەلسەندى تۇردە كرەديتتەۋدى قايتا قولعا الدى.

دەگەنمەن قازىرگى كەزدە جەكە تۇلعالارعا بەرىلگەن تۇتىنۋشىلىق كرەديتتەردىڭ 7,3%-ى جۇمىس ىستەمەيدى ەكەن. ال ءبىر جىل بۇرىن مەرزىمى وتكەن قارىز كولەمى 9,4%-عا باعالانعان.

تۇتىنۋشىلىق كرەديت ەڭ كوپ بەرىلگەن ايماقتارعا كەلەر بولساق، استانا الدىڭعى ورىندا. سوڭعى جىلى استانادا بەرىلگەن تۇتىنۋشىلىق بولشەك قارىز كولەمى 23 ملرد تەڭگەگە نەمەسە 12,1%-عا وسكەن. ەكىنشى ورىندا 20,2 ملرد تەڭگە كولەمىندە تۇتىنۋشىلىق كرەديت بەرگەن قاراعاندى وبلىسى. بۇل ايماق جالپى بەرىلگەن تۇتىنۋشىلىق كرەديت ۇلەسىنىڭ 6,2%-ىن قۇرايدى.

ال ءۇشىنشى ورىندا ماڭعىستاۋ وبلىسى. بۇل وڭىردە جەكە تۇلعالارعا بەرىلگەن تۇتىنۋشىلىق نەسيە پورتفەلىنىڭ كولەمى 18,8 ملرد تەڭگەگە دەيىن كوبەيگەن. الماتى قالاسىندا كەرىسىنشە، كرەديتتىڭ مۇنداي ءتۇرىن الاتىندار سانى ازايعان. ءبىر جىل ىشىندە بەرىلگەن قارىز كولەمى 33,3 ملرد تەڭگەگە دەيىن كەمىگەن.

kapital.kz“The Qazaq Times”