اقش سەناتى 1932-1933 جىلدارى ۋكراينادا بولعان اشارشىلىقتى گەنوتسيد دەپ تانىدى.

«گولوس امەريكي» اقپارات كوزىنىڭ مالىمەتىنشە، قىركۇيەك ايىنىڭ 26-ى كۇنى اقش سەناتىنىڭ حالىقارالىق ىستەر كوميتەتى 1932-1933 جىلدارى ۋكراينادا بولعان اشارشىلىقتى ستالين رەجيمىنىڭ ۋكراين حالقىنا جاساعان گەنوتسيدى دەپ تانىپ، ارنايى قاۋلى قابىلداعان.

قاۋلىدا «سەنات 1988 جىلدىڭ 12 ءساۋىر كۇنى كونگرەسكە ۇسىنىلعان 1932-1933 جىلدارى ۋكراينادا بولعان اشارشىلىقتى زەرتتەگەن كوميسسيا جۇمىسىن تولىقتاي مويىندايدى جانە كوميسسيا مۇشەلەرىنىڭ «ستالين رەجيمى ۋكراينا حالقىنا قارسى گەنوتسيد جاساعان» دەگەن شەشىمىن قولدايدى» - دەلىنگەن.

ۋكراينادا 1932-1933 جىلدارى اشارشىلىقتان 3,5 ميلليون ادام كوز جۇمعان. رەسمي كيەۆ ستالين رەجيمىنىڭ ۋكراين حالقىنا جاساعان وزبىرلىعىن وسىدان بىرنەشە جىل بۇرىن «گەنوتسيد» دەپ تانىعان.

1932-1933 جىلدارى قازاقستاندا دا اشارشىلىقتان كوز جۇمعاندار سانى از بولعان جوق. بولجام بويىنشا، سول جىلدارى قازاق دالاسىندا حالىقتىڭ 22,42 پايىزى اشتىقتان قىرىلعان. بۇل شامامەن 1 ميلليون 258,2 مىڭ ادام. بىراق وسى كۇنگە دەيىن قازاقستان بيلىگى اشارشىلىق قۇرباندارىنا، ستالين رەجيمىنىڭ قاتىگەز ارەكەتتەرىنە مەملەكەتتىك دەڭگەيدە ەشقانداي ساياسي باعا بەرمەي كەلەدى.

"The Qazaq Times"