كوفە دەنساۋلىققا پايدالى ما؟

كوفە - قۋىرىلعان كوفە داندەرىنەن دايىندالاتىن سۋسىن. عالىمداردىڭ ەسەپتەۋىنشە، بۇكىل الەمدە ءار كۇن سايىن 1,6 ملرد شىنى اياق كوفە ىشىلەدى ەكەن. وسىدان-اق بۇل سۋسىندى جانى سۇيەتىندەردىڭ قاتارى كوپ ەكەنىن اڭعارۋ قيىن ەمەس. دەگەنمەن ونىڭ دەنساۋلىققا كەرى اسەرى بارى تۋرالى ماماندار كەڭەسى مەن "كوفە تاۋەلدىلىگىنەن" ارىلعىسى كەلگەن ادامداردىڭ پىكىرىن ءجيى ەستيمىز. ال بۇگىن كوفەنىڭ قانداي پايداسى بارىن تالداپ كورەيىك. 

ماماندار كوفەنىڭ ەكى ارتىقشىلىعىن ايتادى: بىرىنشىدەن، كوفە - انديوكسيدانت ەسەبىندە اعزانى ءارتۇرلى حيميالىق زاتتار مەن توكسيندەردەن تازارتادى; ەكىنشىدەن، جۇمىس ىستەۋ قابىلەتى مەن ەڭبەك ونىمدىلىگىن ارتتىراتىن كوفەين (ونى ارتىق مولشەردە قولدانۋ زيان). سونداي-اق كوفەنىڭ قۇرامىندا B دارۋمەنى، كالي مەن ماگني بار.

كوفە ءومىردى ۇزارتا ما؟

جۋىردا Annals of Internal Medicine عىلىمي جۋرنالىندا جاريالانعان زەرتتەۋدە كۇنىنە ءۇش شىنى كوفە ىشكەن ادامنىڭ ءومىر ءسۇرۋ مەرزىمى ۇزاراتىنى جازىلعان. ون ەۋروپا ەلىنەن 500 مىڭعا جۋىق ادام قاتىسىپ، 16 جىلعا سوزىلعان زەرتتەۋدىڭ قورىتىندىسىمەن كەلىسپەيتىن  عالىمدار، ءومىر ءسۇرۋ ۇزاقتىعىنا كوبىنە اسەر ەتەتىن الەۋمەتتىك-ەكونوميكالىق جاعدايلار ەسكەرىلمەگەنىن العا تارتادى.

كوفەين ميعا قالاي اسەر ەتەدى؟

كوفەنىڭ قۇرامىنداعى كوفەين ميدىڭ ارنايى نەيروندارىن قوزعالىسقا كەلتىرىپ، كوڭىل-كۇيدىڭ كوتەرىلۋىنە، جۇمىس ىستەۋ قابىلەتىنىڭ ارتۋىنا اسەر ەتەدى. ادامنىڭ ميىنا ىقپالى سەبەبىنەن "كوفە التسگەيمەر اۋرۋى مەن دەمەنتسيا دەرتىنەن ساقتاندىرادى" دەگەن تۇجىرىمدار دا جاسالعان.

كوفەنىڭ بىرقاتار پايداسى عىلىمي تۇردە انىقتالعانىمەن، ونى مولشەردەن تىس قولدانۋ زيان ەكەنى بەلگىلى. دارىگەرلەر اياعى اۋىر ايەلدەرگە كۇنىنە 2 شىنىدان ارتىق كوفە ىشۋگە بولمايدى دەپ ەسكەرتەدى. كوفەگە، قۋىرىلعان كوفە ۇنتاعىنان بولەك، كوپتەگەن ءتاتتى دامدەۋىشتەر، ءسۇت، قانت قوسىلاتىنىن ەسكەرسەك، بۇل اعزا ءۇشىن ارتىق كالوريا الىپ كەلەتىنىن تاعى دا ۇمىتپاعان ءجون.

“The Qazaq Times”