پرەپاراتتاردى ەسەپكە الۋ  بارىسىندا وڭىرلەردە ءدارى-دارمەكتىڭ ارتىلىپ قالۋى بايقالعان. بۇل تۋرالى قر دەنساۋلىق ساقتاۋ ۆيتسە-ءمينيسترى الەكسەي تسوي سەلەكتورلىق رەجيمدە تەگىن دارىلىك قامتاماسىز ەتۋ ماسەلەلەرى بويىنشا وڭىرلەردىڭ دەنساۋلىق ساقتاۋ باسقارمالارىنىڭ باسشىلارىمەن وتكەن كەڭەستە مالىمدەدى.

ۆيتسە-ءمينيستردىڭ مالىمدەۋىنشە، قازىرگى ساتكە دەيىن تەگىن امبۋلاتوريالىق دارىلىك قامتاماسىز ەتۋ ءۇشىن وڭىرلەرگە  57,2 ملرد تەڭگە سوماسىنا ءدارى-دارمەك جونەلتىلگەن، ال بۇل رەتتەگى رەتسەپتىلەر تەك 36,6 ملرد تەڭگە سوماسىنا قامتاماسىز ەتىلگەن. ياعني قازىرگى ۋاقىتتا مەديتسينالىق ۇيىمداردىڭ قويمالارىندا 20 ملرد تەڭگەدەن اساتىن سوماعا دارىلەر بار. ال كەي پرەپاراتتار بويىنشا بۇكىل جونەلتىلگەن تاۋار ءالى كۇنگە دەيىن يگەرىلمەي وتىر.

دەنساۋلىق ساقتاۋ مينيسترلىگى بيۋدجەتتىك كوميسسياسىنىڭ شەشىمىمەن وڭىرلەردە انىقتالعان قوسىمشا قاجەتتىلىكتى قامتاماسىز ەتۋگە  23 ملرد تەڭگە قوسىمشا قاراجات جۇمسالعان.

كەڭەس بارىسىندا الەكسەي تسوي وڭىرلىك دەنساۋلىق ساقتاۋ باسقارمالارىنىڭ باسشىلارىنا ءدارىحانالار مەن مەديتسينالىق ۇيىمداردا بار قالدىق دارىلەرگە مۇقيات تالداۋ جاساۋدى جانە شىنايى قاجەتتىلىكتى، شىن مانىندە قانداي دارىلەرگە مۇقتاجدىق بارىن ايقىنداۋدى تاپسىردى.

ايتا كەتۋ كەرەك، قازىرگى ساتكە دەيىن دەنساۋلىق ساقتاۋ باسقارمالارى شامامەن 2,7 ملرد تەڭگە سوماسىنا بۇرىن تاپسىرىس بەرىلگەن دارىلەردەن باس تارتقان.

ۆيتسە-مينيستر، سونداي-اق، 2019 جىلعا تەگىن دارىلەرگە قاجەتتىلىكتى جوسپارلاۋ كەزىندە وسى جىلدىڭ باسىندا ورىن العان ءدارى تاپشىلىعىنا ۇقساس جاعدايدى بولدىرماۋعا ايرىقشا نازار اۋدارۋدى تاپسىردى.

“The Qazaq Times”