نازارباەۆانىڭ كەشى: الماتى بيلىگى ءۇش اپتا بۇرىن وتكەن توي-جيىندى باعالاۋعا اسىعار ەمەس

اۋرۋشاڭدىق پەن ءولىم كورسەتكىشى ۇدەپ، مەديتسينا سالاسى قاتتى سىنعا ءتۇسىپ، ءتورتىنشى تولقىندى وتە اۋىر جاعدايدا وتكەرگەن الماتى قالاسىندا كارانتين شەكتەۋى قازان ايىنا دەيىن كۇشەيىپ تۇردى. كۇنىنە 600-700 ناۋقاس انىقتالىپ، 10-15 تۇرعىن قايتىس بولىپ جاتقان قىركۇيەك ايىنىڭ ورتاسىندا ءاليا نازارباەۆا جەكە كىتابىنىڭ تۇساۋكەسەرىن دۇركىرەپ اتاپ ءوتتى. سول كەزدە ارەكەت ەتكەن سانيتار-دارىگەردىڭ №28 قاۋلىسى بويىنشا، بۇقارالىق-كوپشىلىك جيىن-توي وتكىزۋگە قاتاڭ تىيىم سالىنعان. بۇعان دەيىن ءدال وسىعان ۇقساس بىرقاتار جيىننىڭ ۇيىمداستىرۋشىلارى مەن قاتىسۋشىلارىنا كارانتين ەرەجەسىن ەسكەرمەگەنى ءۇشىن ءتۇرلى كولەمدە ايىپپۇل سالىنىپ، اكىمشىلىك جاۋاپقا تارتىلعان. بىراق قازاقستاندا اسا ىقپالدى «بيلىك اۋلەتىنىڭ» مۇشەسى ءاليا نازارباەۆانىڭ مەرەكەلىك كەشىنە زاڭدى باعا ءالى دە بەرىلەر ەمەس. نازارباەۆانىڭ ءۇش اپتا بۇرىنعى كەشىن باعالاۋعا اسىقپاعان الماتى بيلىگىنىڭ ەنجارلىعى ازاماتتار اراسىندا  الالاۋشىلىققا جول بەرىپ وتىر دەگەن پىكىر تۋدىرادى. بەكشين جيىننىڭ سانيتارلىق تالاپتارعا ساي وتكەنىنە سەنىمدى، دەگەنمەن...

7 قازاندا وكق الاڭىندا وتكەن بريفينگتە QT ءتىلشىسىنىڭ قازاقشا جولداعان سۇراعىنا بەكشين مونيتروينگ توپ تاراپىنان ماتەريال ءالى جولدانباعانى تۋرالى ورىس تىلىندە جاۋاپ بەردى. باس سانيتار وسىعان دەيىن ورىنباسارى سادۋاقاس بايعابىلوۆتىڭ قوعام تالابىنا سايكەس نازارباەۆانىڭ كەشىنە دەر كەزىندە باعا بەرىلمەۋىن پروتسەدۋرالىق-بيۋروكراتيامەن بايلانىستىرىپ، جاۋاپكەرشىلىكتى المالى اۋدانىنىڭ اكىمدىگىنە سىلتەگەن ءۋاجىن تاعى قايتالادى.

«راسىمەن دە مۇنداي جيىن بولدى. ءبىز شارا قولدانۋ ءۇشىن اقپارات جولدادىق. رەسپۋبليكالىق ۆەدومستۆوارالىق كوميسسيا بەكىتكەن ەرەجەگە سايكەس، ايعاق ماتەريالدارى رەتىندە فوتو-ۆيدەوعا ءتۇسىرىپ، راپورت تولتىرىلىپ، پوليتسيامەن بىرگە  ۇسىنىلۋى قاجەت. اكىمشىلىك شارا قولدانۋ ءۇشىن ءبىز اۋدان اكىمدىگىنە مونيتورينگ توپتىڭ دالەلدەمەلەردى تەزدەتىپ جولداۋ قاجەتتىگى جونىندە سۇرانىس جىبەردىك»، – دەدى بەكشين.

باس سانيتار-دارىگەردىڭ ايتۋىنشا، كۇزدىڭ باسىندا قابىلدانعان قاۋلى قولدانىلعان ۋاقىتتا 300-دەن اسا ايىپپۇل سالىندى. ونىڭ ىشىندە، «قوعامدىق ءىس-شارا ۇيىمداستىرعان 24 تۇلعاعا شارا قولدانىلعان». ولاردىڭ اراسىندا ءاليا نازارباەۆا جوق، ويتكەنى «كۇش-قايرات مەكەنى» كىتابىنىڭ باسى رەسمي تۇساۋكەسەر، اياعى تويعا اينالعان كەشىنە زاڭدى باعا بەرىلمەدى، وعان كەرەكتى دايەك ماتەريال 3 اپتادان بەرى بەلگىسىز سەبەپپەن دەپارتامەنت قاراۋىنا كەلىپ تۇسپەگەن.

– ءىس-شارا بارلىق ساقتىق ەرەجەسىن ساقتاي وتىرىپ، Ashyq قوسىمشاسىنىڭ «جاسىل ستاسۋسىنداعى» قوناقتاردىڭ قاتىسۋىمەن ءوتتى. كەلۋشىلەردىڭ ءبارى ۆاكتسينا سالدىرعان يا قولىندا جارامدىلىعى ءۇش تاۋلىكتەن اسپاعان پتر تەستىنىڭ تەرىس قورىتىندىسىمەن قاتىسقان. جيىن ساقتىق شارالارىن تولىعىمەن ساقتاپ وتكىزىلدى، – دەدى سەنىمدى تۇردە.

بىراق بەكشين مەديتسينالىق بەتپەردە رەجيمى ساقتالعان-ساقتالماعانى تۋرالى دالەلدەمەلەر جيناعى جانە تۇسىندىرمەلەر ءالى ۆەدومستۆوعا تۇسپەگەنىن اتاپ ءوتتى. قوناقتاردىڭ الەۋمەتتىك جەلىلەرگە جۇكتەگەن ۆيدەو-ستريستەرىنە قاراعاندا، جيىن بارىسىندا داياشىدان وزگە ماسكا تاعىپ جۇرگەن ادام بايقالمايدى. سونداي-اق، توي فورماتىندا وتكەن كەشتە الەۋمەتتىك اراقاشىقتىقتىڭ دا ساقتالا قويماعانىن كورۋگە بولادى. كوپتەگەن مەملەكەتتەر سياقتى قازاقستاندا دا ەكپە سالدىرعاندارعا ەمىن-ەركىن، بەتپەردەسىز جۇرۋگە رۇقسات ەتىلمەگەن.

Orda.kz رەداكتسياسىنىڭ ءجۋرناليسى باعدات اسىلبەكتىڭ «بەلگىلى تۇلعالاردىڭ قاتىسۋىمەن وتەتىن بۇقارالىق ءىس-شارالارعا كەلگەندە مونيتورينگتىك توپ جۇمىسىنىڭ باياۋلاپ، سىلبىر سيپاتتا ناشارلاۋى نەمەن بايلانىستى؟» دەگەن سۇراعىنا الماتى قالاسى اكىمىنىڭ ورىنباسارى ەرجان باباقۇماروۆ «الالاۋ يا بولە قاراۋ قاعيداسى جوق جانە تالاپ بارلىق ادامعا بىردەي» دەپ قىسقا قايىردى. ول «دالەلدەر جيناعىن قالىپتاستىرۋدا ءبىرشاما قيىندىق بارىن» راستادى.

ايلاپ «قىزىل ايماقتا» تۇرعان الماتىدا كارانتينگە بايلانىستى حالىق كوپ جينالاتىن شارالار وتكىزۋگە تىيىم سالىنعانىنا قاراماستان، 16 قىركۇيەكتە اباي اتىنداعى مەملەكەتتىك وپەرا جانە بالەت تەاترىندا «كۇش-قايرات مەكەنى» («مەستو سيلى» – ورىسشا اتاۋى) كىتابىنىڭ تۇساۋكەسەرى وتكەن. كەشتى رەسەيلىك ءارتىس ماكسيم گالكين جۇرگىزگەن. شاقىرىلعان قوناقتار اراسىندا قازاقستاندىق كاسىپكەرلەر، ارتىستەر مەن تانىمال تۇلعالار، كىل ىعاي مەن سىعاي بولعان.

باس سانيتار-دارىگەر جانداربەك بەكشيننىڭ 2 قىركۇيەكتەگى №28 قاۋلىسىنا سايكەس، تاپ سول ساتتە رەستوراندارعا ءبىر مەزەتتە 50 ادامعا دەيىن عانا قابىلداۋعا رۇقسات ەتىلگەن ەدى. مۇنداي جاعدايدا كارانتيندى ەلەمەي كوپ قوناق كۇتكىسى كەلەتىن «توي يەسىنە» 50 شاقتى ورىنمەن شەكتەلەتىن رەستوراننان گورى سىيىمدىلىعى الدەقايدا ۇلكەن تەاتر زالىنىڭ 30%-ىن جالعا الۋ تيىمدىرەك ەكەنى بەلگىلى.

تامىز ايىنىڭ باسىندا ەۆرەي قاۋىمداستىعىنىڭ وكىلدەرى Rixos قوناق ۇيىندە سالتاناتتى جيىن وتكىزگەن. العاشىندا بار جاۋاپكەرشىلىكتى مونيتورينگ توپقا ارتقان دەپارتامەنت (سەس – بۇرىنعى ورىسشا اتاۋى) قوعام سىنى كوبەيگەن سوڭ  كارانتين شاراسىن بۇزدى دەگەن ايىپپەن ورتالىق سيناگوگا ۇيىمداستىرۋشىلارىنا، قوناق ءۇيدىڭ باس ديرەكتورى مەن مەنەدجەرلەرىنە ايىپپۇل سالعان. سول ءتارىزدى قوعام نارازىلىعى مەن جۋرناليستەردىڭ تولاسسىز ساۋالىنان كەيىن عانا بيلىك تانىمال بلوگەرلەر، شوۋ-بيزنەس جۇلدىزدارى قاتىسقان Royal Tulip قوناق ۇيىندەگى اۋقىمدى شاراعا رەاكتسيا بىلدىرۋگە ءماجبۇر بولدى. جيىنعا كەلگەن 30 ادامنىڭ 13-ىنە شەكتەۋ شاراسىن ساقتامادى دەگەن ايىپپەن ايپپۇل سالىنعان.

ەپيداحۋالعا جاۋاپتى قۇزىرلى مەكەمەلەردىڭ «جۇمىس ىستەۋ قارقىنىنداعى ايىرماشىلىق» كارانتين شارالارىنىڭ ساقتالۋىن باقىلاۋدا ازاماتتار اراسىندا الالاۋشىلىق تۋدىرۋى مۇمكىن دەگەن كۇماندى ويعا ەرىكسىز جەتەلەيدى.

The Qazaq Times