Nazarbaevanıñ keşi: Almatı biligi üş apta bwrın ötken toy-jiındı bağalauğa asığar emes

Auruşañdıq pen ölim körsetkişi üdep, medicina salası qattı sınğa tüsip, törtinşi tolqındı öte auır jağdayda ötkergen Almatı qalasında karantin şekteui qazan ayına deyin küşeyip twrdı. Künine 600-700 nauqas anıqtalıp, 10-15 twrğın qaytıs bolıp jatqan qırküyek ayınıñ ortasında Äliya Nazarbaeva jeke kitabınıñ twsaukeserin dürkirep atap ötti. Sol kezde äreket etken sanitar-därigerdiñ №28 qaulısı boyınşa, bwqaralıq-köpşilik jiın-toy ötkizuge qatañ tıyım salınğan. Bwğan deyin däl osığan wqsas birqatar jiınnıñ wyımdastıruşıları men qatısuşılarına karantin erejesin eskermegeni üşin türli kölemde ayıppwl salınıp, äkimşilik jauapqa tartılğan. Biraq Qazaqstanda asa ıqpaldı «bilik äuletiniñ» müşesi Äliya Nazarbaevanıñ merekelik keşine zañdı bağa äli de beriler emes. Nazarbaevanıñ üş apta bwrınğı keşin bağalauğa asıqpağan Almatı biliginiñ enjarlığı azamattar arasında  alalauşılıqqa jol berip otır degen pikir tudıradı. Bekşin jiınnıñ sanitarlıq talaptarğa say ötkenine senimdi, degenmen...

7 qazanda ÖKQ alañında ötken brifingte QT tilşisiniñ qazaqşa joldağan swrağına Bekşin monitroing top tarapınan material äli joldanbağanı turalı orıs tilinde jauap berdi. Bas sanitar osığan deyin orınbasarı Säduaqas Bayğabılovtıñ qoğam talabına säykes Nazarbaevanıñ keşine der kezinde bağa berilmeuin proceduralıq-byurokratiyamen baylanıstırıp, jauapkerşilikti Almalı audanınıñ äkimdigine siltegen uäjin tağı qaytaladı.

«Rasımen de mwnday jiın boldı. Biz şara qoldanu üşin aqparat joldadıq. Respublikalıq vedomstvoaralıq komissiya bekitken erejege säykes, ayğaq materialdarı retinde foto-videoğa tüsirip, raport toltırılıp, policiyamen birge  wsınıluı qajet. Äkimşilik şara qoldanu üşin biz audan äkimdigine monitoring toptıñ däleldemelerdi tezdetip joldau qajettigi jöninde swranıs jiberdik», – dedi Bekşin.

Bas sanitar-därigerdiñ aytuınşa, küzdiñ basında qabıldanğan qaulı qoldanılğan uaqıtta 300-den asa ayıppwl salındı. Onıñ işinde, «qoğamdıq is-şara wyımdastırğan 24 twlğağa şara qoldanılğan». Olardıñ arasında Äliya Nazarbaeva joq, öytkeni «Küş-qayrat mekeni» kitabınıñ bası resmi twsaukeser, ayağı toyğa aynalğan keşine zañdı bağa berilmedi, oğan kerekti däyek material 3 aptadan beri belgisiz sebeppen departament qarauına kelip tüspegen.

– İs-şara barlıq saqtıq erejesin saqtay otırıp, Ashyq qosımşasınıñ «jasıl stasusındağı» qonaqtardıñ qatısuımen ötti. Keluşilerdiñ bäri vakcina saldırğan ya qolında jaramdılığı üş täulikten aspağan PTR testiniñ teris qorıtındısımen qatısqan. Jiın saqtıq şaraların tolığımen saqtap ötkizildi, – dedi senimdi türde.

Biraq Bekşin medicinalıq betperde rejimi saqtalğan-saqtalmağanı turalı däleldemeler jinağı jäne tüsindirmeler äli vedomstvoğa tüspegenin atap ötti. Qonaqtardıñ äleumettik jelilerge jüktegen video-stristerine qarağanda, jiın barısında dayaşıdan özge maska tağıp jürgen adam bayqalmaydı. Sonday-aq, toy formatında ötken keşte äleumettik araqaşıqtıqtıñ da saqtala qoymağanın köruge boladı. Köptegen memleketter siyaqtı Qazaqstanda da ekpe saldırğandarğa emin-erkin, betperdesiz jüruge rwqsat etilmegen.

Orda.kz redakciyasınıñ jurnalisi Bağdat Asılbektiñ «Belgili twlğalardıñ qatısuımen ötetin bwqaralıq is-şaralarğa kelgende monitoringtik top jwmısınıñ bayaulap, sılbır sipatta naşarlauı nemen baylanıstı?» degen swrağına Almatı qalası äkiminiñ orınbasarı Erjan Babaqwmarov «alalau ya böle qarau qağidası joq jäne talap barlıq adamğa birdey» dep qısqa qayırdı. Ol «dälelder jinağın qalıptastıruda birşama qiındıq barın» rastadı.

Aylap «qızıl aymaqta» twrğan Almatıda karantinge baylanıstı halıq köp jinalatın şaralar ötkizuge tıyım salınğanına qaramastan, 16 qırküyekte Abay atındağı memlekettik opera jäne balet teatrında «Küş-qayrat mekeni» («Mesto silı» – orısşa atauı) kitabınıñ twsaukeseri ötken. Keşti reseylik ärtis Maksim Galkin jürgizgen. Şaqırılğan qonaqtar arasında qazaqstandıq käsipkerler, ärtister men tanımal twlğalar, kil ığay men sığay bolğan.

Bas sanitar-däriger Jandarbek Bekşinniñ 2 qırküyektegi №28 qaulısına säykes, tap sol sätte restorandarğa bir mezette 50 adamğa deyin ğana qabıldauğa rwqsat etilgen edi. Mwnday jağdayda karantindi elemey köp qonaq kütkisi keletin «toy iesine» 50 şaqtı orınmen şekteletin restorannan göri sıyımdılığı äldeqayda ülken teatr zalınıñ 30%-ın jalğa alu tiimdirek ekeni belgili.

Tamız ayınıñ basında evrey qauımdastığınıñ ökilderi Rixos qonaq üyinde saltanattı jiın ötkizgen. Alğaşında bar jauapkerşilikti monitoring topqa artqan departament (SES – bwrınğı orısşa atauı) qoğam sını köbeygen soñ  karantin şarasın bwzdı degen ayıppen Ortalıq Sinagoga wyımdastıruşılarına, qonaq üydiñ bas direktorı men menedjerlerine ayıppwl salğan. Sol tärizdi qoğam narazılığı men jurnalisterdiñ tolassız saualınan keyin ğana bilik tanımal blogerler, şou-biznes jwldızdarı qatısqan Royal Tulip qonaq üyindegi auqımdı şarağa reakciya bildiruge mäjbür boldı. Jiınğa kelgen 30 adamnıñ 13-ine şekteu şarasın saqtamadı degen ayıppen ayppwl salınğan.

Epidahualğa jauaptı qwzırlı mekemelerdiñ «jwmıs isteu qarqınındağı ayırmaşılıq» karantin şaralarınıñ saqtaluın baqılauda azamattar arasında alalauşılıq tudıruı mümkin degen kümändi oyğa eriksiz jeteleydi.

The Qazaq Times