جەلىلەردەن ءاليا نازارباەۆانىڭ پاراقشالارى جوعالىپ كەتتى

ول وسى كۇنى تۇسكە تامان جەلىدەگى پاراقتارىندا ەلدە نارازىلىق پەن ودان كەيىن بولعان دۇربەلەڭ جايلى پوست جاريالاعان ەدى. نازارباەۆانىڭ جازباسىنىڭ استىندا جۇرت نەگاتيۆ پىكىرلەر جازا باستاعان.

نازارباەۆا پوستىندا بولعان جايتتى "قايعىلى وقيعا" دەپ، قازا تاپقانداردىڭ وتباسىنا كوڭىل ايتقان. ول ءتۇرلى ايماقتان تۇرعىنداردىڭ اكەسىن قولداپ، حابارلاما جىبەرىپ جاتقانىن اتاپ ءوتىپ، "مورالدىق قولداۋ ءۇشىن" العىس ءبىلدىردى.

كەيىن Qumash telegram-كانالى ءاليا نازارباەۆانىڭ پاراقشاسىنىڭ قازىرگى جەرى بىرىككەن اراب امىرلىكتەرى ەكەنىن جازعان.

قازاقستاندا قاڭتاردىڭ باسىندا سۇيىتىلعان گاز باعاسى قىمباتتاعان سوڭ باستالعان نارازىلىقتار شامامەن ءبىر اپتاعا سوزىلدى. نارازىلىق كەزىندە جۇرت پرەزيدەنتتىكتەن كەتسە دە بيلىككە ىقپالىن ساقتاپ قالعان 81 جاستاعى نازارباەۆتان ورنىن بوساتۋدى تالاپ ەتىپ، "شال، كەت!" دەپ تە ايعايلادى.

نازارباەۆ 28 جەلتوقساننان بەرى جۇرت الدىنا شىقپادى جانە ەلدەگى جاعدايعا قاتىستى ەشقانداي پىكىر بىلدىرمەدى. ونىڭ ءباسپاسوز حاتشىسى نازارباەۆتىڭ نۇر-سۇلتاندا ەكەنىن، قاۋىپسىزدىك كەڭەسى توراعالىعىن قازىرگى پرەزيدەنت توقاەۆقا ءوز ەركىمەن بەرگەنىن جازدى.

5 قاڭتاردا توقاەۆ قاۋىپسىزدىك كەڭەسى توراعالىعىن ءوز قولىنا العان ەدى.ول ەلدەگى نارازىلىق باستالعالى نازارباەۆ جايلى ءبىر رەت عانا ايتىپ، ء"بىرىنشى پرەزيدەنت تۇسىندى تابىستى كومپانيالار مەن باي ادامدار توبى پايدا بولدى" دەدى.

قازاقستاننىڭ قازىرگى پرەزيدەنتى ۋتيليزاتسيا الىمىن جينايتىن "وپەراتور روپ" كومپانياسىنىڭ جۇمىسىن توقتاتۋدى بۇيىردى. بۇل كومپانيانىڭ ءاليا نازارباەۆاعا قاتىسى بارى ايتىلادى.

ءاليا نازارباەۆا توقاەۆتىڭ كومپانيانى جابۋ تۋرالى سوزىنە ەشقانداي پىكىر بىلدىرمەدى.

نازارباەۆتىڭ ۇلكەن قىزى داريعا نازارباەۆا 12 قاڭتارداعى ءماجىلىس ورنىنا قاتىسپادى. كومەكشىسى جەرگىلىكتى باسىلىمدارعا ونىڭ "كوروناۆيرۋس جۇقتىرعانىن" ايتتى.

ەلدە جاعداي ۋشىققان تۇستا توقاەۆ ۇقشۇ-دان اسكەري كومەك سۇرادى. رەسەي باستاعان ۇيىم قازاقستانعا مىڭداعان سارباز جىبەردى. ۇقشۇ اسكەريلەرى 13 قاڭتاردان باستاپ ەلدەن شىعارىلا باستادى.

ساراپشىلار توقاەۆ شەتەلدەن اسكەر كىرگىزۋ ارقىلى ەليتاارالىق كۇرەستە بيلىگىن ساقتاپ قالدى دەپ سانايدى.