"انا جۇرەگىندەگى ءومىر" مەن "شەكسىزدىك ءۇنى". فوتو By التىناي مۇرات

كەشە، 9 ساۋىردە، الماتى قالاسى ورتالىقتاندىرعان كىتاپحانا جۇيەسىنىڭ №44 كىتاپحاناسىندا ەكى جاس اقىننىڭ جىر جيناقتارى تۇساۋى كەسىلىپ، وقىرماندارىنا جول تارتتى.

ادەبي شارادا رەتبەك ماعاز بەن ەركەجان بەيسەنبەكقىزى قاتارلى اقىنداردىڭ "شەكسىزدىك ءۇنى" جانە "انا جۇرەگىندەگى ءومىر" اتتى ەڭبەكتەرى وقىرماندارعا تانىستىرىلدى. اتالعان جىر جيناقتارىنىڭ تۇساۋىن بۇگىنگى قازاق پوەزياسىنىڭ اسا كورنەكتى وكىلى مۇرات شايماران مەن اقىن بولات قۇرمانعاجىۇلى كەسىپ، وقىرمان ورىسىندەگى جولىنا ساتتىلىك تىلەدى.

اقىن مۇرات شايماران مەن بولات قۇرمانعاجى جاڭا كىتاپتاردىڭ تۇساۋىن كەستى. فوتو: By التىناي مۇرات

تۇساۋكەسەردەن كەيىن اقىن بولات قۇرمانعاجى ەركەجان بەيسەنبەكقىزىنىڭ شىعارمالارىنا ادەبي تۇرعىدا تالداۋ جاساعان بايانداماسىن وقىسا، اقىن مۇرات شايماران قوس اقىننىڭ شىعارمالارىنىڭ نەگىزگى ەرەكشەلىگىن ايتا كەلىپ، قازاق پوەزياسىنا رەتبەك ماعاز بەن ەركەجان بەيسەنبەكقىزى سىندى تالانتتاردىڭ كەلىپ قوسىلعانىنا ايرىقشا قۋانىشىن جەتكىزدى.

جىر كەشىنىڭ مازمۇنىن ءداستۇرلى ءانشى ەرمەك راحمبايدىڭ ورىنداۋىندا اقىن رەتبەك ماعازدىڭ ءانى مەن سوزىنە جازىلعان "اڭساتىم-اي" ءانىن ءتىپتى دە بايىتا ءتۇستى. پوەزيا كەشىندە قويشىبەك مۇباراك، ۇلان باپاي، ىرىسبەك دابەي، تۇردىحان ايدارحان قاتارلى ادەبيەت وكىلدەرى رەتبەك ماعاز بەن ەركەجان بەيسەنبەك سىندى جاس اقىنداردىڭ شىعارماشىلىق ەرەكشەلىكتەرى، جالپى قازاق پوەزياسىنىڭ قازىرگى جاڭالىعى تۋرالى ءوز پىكىرلەرىن ورتاعا سالدى.

قازاق پوەزياسىنا جاڭا جىر جيناقتارىن تارتۋ ەتكەن قوس اقىن بۇعان دەيىن دە پوەزيا سۇيگىش وقىرماندارعا تانىس بولىپ ۇلگىرگەن ەدى. اقىن ەركەجان بەيسەنبەكقىزى "تەڭىزگە عاشىق بۇلاقتار" اتتى قىتايداعى بىرقاتار جاس اقىنداردىڭ جىر الماناعى ارقىلى اتاجۇرتتاعى ادەبيەت قاۋىمىنا اتى تانىس بولعان. ال، رەتبەك ماعاز بولسا، ستۋدەنت شاعىندا "عايىپتان تامعان تامشى" اتتى جىر جيناعىمەن پوەزيا كوشىنە ىلەسكەن. رەتبەك ماعاز قازىر ءال-فارابي اتىنداعى قازۇۋ-دا وقىتۋشى بولىپ جۇمىس ىستەيدى.

شارا سوڭعىنداعى ارنايى قوناقاسىعا جالعاسىپ، قازاق پوەزياسىنىڭ "جاس بورىلەرى" ولەڭدەرىمەن ورنەكتەلىپ، ءان-كۇيمەن ارلەندى.

مۇرات التىناي 

The Qazaq Times