ساياسي داعدارىس ورىن العان يزرايلدە وڭشىل «يامينا» پارتياسىنىڭ باسشىسى، بۇرىنعى قورعانىس ءمينيسترى نافتالي بەننەت پەن «ەش-اتيد» جەتەكشىسى ياير لاپيد كواليتسيالىق ۇكىمەت قۇرماق. قوس ساياساتكەردىڭ جوسپارى ناتيجەلى بولسا، يزرايلدە سوڭعى 12 جىلدا العاش رەت بينيامين نەتانياحۋسىز ۇكىمەت جاساقتالادى.
120 پارلامەنتاريدەن تۇراتىن كنەسسەتتە وڭشىل قوزعالىستاردىڭ اليانسى سانالاتىن «يامينا» پارتياسىنىڭ التى ورنى عانا بار. بىراق كواليتسيا قۇرۋ ءۇشىن التى ورىن دا جەتكىلىكتى. سول سەبەپتى وپپوزيتسيا جەتەكشىسى ياير لاپيد سارسەنبىگە دەيىن جاڭا كواليتسيالىق ۇكىمەت قۇرۋى كەرەك. يزرايل باق-تارىنىڭ حابارلاۋىنشا، 49 جاستاعى بەننەت كەلەسى ەكى جىل ىشىندە، 2023 جىلدىڭ قىركۇيەگىنە دەيىن پرەمەر-مينيستر بولماق. كەيىننەن جاڭا پارلامەنتتىك سايلاۋعا دەيىن ياير لاپيد باسشىلىق ەتەدى.
ءوز كەزەگىندە نەتانياحۋ «يامينا» پارتياسىنىڭ جەتەكشىسى تەك بيلىكتى قولعا العىسى كەلىپ وتىر دەپ ايىپتادى. جانە سولشىل كۇشتەردەن قۇرالاتىن ۇكىمەتتەن مەملەكەت كەلەشەگىنە قاۋىپ زور دەپ سانايدى. الاياقتىق تۋرالى باپ بويىنشا بىرنەشە مارتە ايىپ تاعىلعان نەتانياحۋ ناۋرىزدا وتكەن جالپى سايلاۋدا مينيسترلەر كابينەتىن قۇرۋعا قاجەتتى داۋىس جيناي المادى. بۇل – ەكى جىل قاتارىنان وتكەن ءتورتىنشى رەت سايلاۋ ەدى.
71 جاستاعى نەتانياحۋ وزىنە تاعىلعان جەمقورلىق ايىبىن تەرىسكە شىعارىپ، لاۋازىمدى قىزمەتىن اتقارا بەرەتىنىن مالىمدەگەن ەدى. الايدا ەلدىڭ پوليتسيا تاراۋلارى وعان جەمقورلىق بويىنشا ايىپتاۋىن جالعاستىردى. ورتا شىعىستاعى گەوساياسي ويىنداردىڭ بەلدى ويىنشىسى يزرايل ۇكىمەتىندەگى بۇل شۋ جۇرتتى ەلەڭدەتپەي قويمايدى.
ءبىرىنشى كەزەكتە بينيامين نەتانياحۋعا ەلدەگى «سوڭعى جاڭالىقتار» اتالاتىن ىقپالدى باسىلىممەن جاسىرىن كەلىسىم جاساعان دەگەن ايىپ تاعىلدى. ياعني اتالعان باسىلىم نەتانياحۋ تۋرالى تەك قانا ماقتاۋ مەن قوشەمەت ايتادى. بۇعان قارىمتا جاۋاپ رەتىندە رەتىندە ول باسىلىمدى قولداپ، قولپاشتاپ وتىرادى.
پرەمەر-مينيسترگە تاعىلعان ەكىنشى ايىپ: 2009 جىلى بيلىك باسىنا كەلگەننەن بەرى ۇكىمەتتەگى جاقتاستارى مەن باسقا دا تۇلعالاردان قۇنى 283 مىڭ اقش دوللارىنا پارا-پار كەلەتىن سىيلىقتار العان. «Jerusalem Post» باسىلىمىنىڭ ايتۋىنشا نەتانياحۋ گولليۆۋد الىپتارىنىڭ ءبىرى ارنون ميلچەننەن قۇندى سىيلىقتار قابىلداپ، ونىڭ اقش-قا ۆيزا الۋىنا كومەكتەسكەن.
قۇندى تارتۋ-تارالعى قابىلداعان نەتانياحۋ «ميلچەن زاڭىنا» دا قولداۋ بىلدىرگەن» دەگەن ايىپ جانە بار. اتالعان زاڭ جوباسى بويىنشا شەتەلدەن تاريحي وتانىنا ورالعان ەۆرەي قالتالىلارى ون جىل بويى سالىقتان بوساتىلماق ەكەن. الايدا، بۇل زاڭ جوباسىنا قارجى مينيسترلىگى قارسىلىق تانىتىپ، قابىلدانباي قالعان ەدى.
ايىپتاۋلار جونىندە مالىمدەمە جاساعان نەتانياحۋ «مەنىڭ ساياسي ساحناداعى تاريحىمدا 15 رەت وسىنداي ايىپتار تاعىلدى جانە ونىڭ ءبارى نەگىزسىز بولىپ شىقتى. بۇل رەتكى ايىپتار دا سولاي، ەش نەگىزى جوق»، دەگەن بولاتىن.
دە-يۋرە تۇرعىسىندا يزرايل پارلامەنتتىك رەسپۋبليكا بولعاندىقتان، كنەسسەت جوعارعى بيلىك ورگانى سانالادى. كنەسسەتكە سايلاۋ وتكەننەن كەيىن يزرايل پرەزيدەنتى سايلانعان فراكتسيالارمەن وتىرىس وتكىزىپ، كواليتسيالىق ۇكىمەتتى قۇراي الاتىن فراكتسيالار باسشىلارىنىڭ بىرىنە ۇكىمەتتى قۇرۋعا مىندەتتەيدى. 1996-1999 جىلدارى كنەسسەتكە پرەمەر-مينيستر بۇكىلۇلتتىق داۋىس بەرۋمەن سايلاندى. 1996 جىلى ۇكىمەتتى بينيامين نەتانياحۋ، ال 1999 جىلى ەحۋد باراك باسقاردى. 2001 جىلى باراكتىڭ قىزمەتتەن كەتۋى ناتيجەسىندە پرەمەر-مينيستر قايتادان تىكەلەي داۋىس بەرۋ ارقىلى سايلاندى. كەيىن ەلدە پرەمەر-ءمينيستردىڭ تىكەلەي سايلاۋ پروتسەسسىنەن باس تارتتى.
ۇكىمەت كنەسسەت مۇشەلەرىنىڭ كوپشىلىگىمەن ماقۇلدانۋى كەرەك. كنەسەتتىڭ وكىلەتتىك مەرزىمى – ءتورت جىل.
كيبەرشابۋىلعا ۇشىراعان باق وكىلدەرى قۇقىق قورعاۋ ورگاندارىنا ارىز ءتۇسىردى
ورتالىق ازيا: تاريحي، ساياسي جانە ەكونوميكالىق مۇددەلەر اياسىندا
قىرعىزستاندا تاۋەلسىز Kloop باسىلىمىنىڭ قىرعىز تىلىندەگى سايتى بۇعاتتالدى
رەسەيدىڭ دونەتسك وبلىسى كونستانتينوۆكا قالاسىنداعى بازارعا شابۋىلىنان 16 ادام قازا تاپتى
سادىر جاپاروۆ ىستىقكولدەگى ءتورت پانسيوناتتى وزبەكستانعا بەرۋ سەبەبىن ءتۇسىندىردى
پيگوجيننىڭ «ۆاگنەر» توبى ماسكەۋ تۇبىنە كەلىپ شەگىنىپ كەتتى