12 jılda alğaş ret: Bin'yamin Netanyahusız Izrail'

Sayasi dağdarıs orın alğan Izrail'de oñşıl «YAmina» partiyasınıñ basşısı, bwrınğı Qorğanıs ministri Naftali Bennet pen «Eş-Atid» jetekşisi YAir Lapid koaliciyalıq ükimet qwrmaq. Qos sayasatkerdiñ josparı nätijeli bolsa, Izrail'de soñğı 12 jılda alğaş ret Bin'yamin Netan'yahusız ükimet jasaqtaladı.

120 parlamentariyden twratın Knessette oñşıl qozğalıstardıñ al'yansı sanalatın «YAmina» partiyasınıñ altı ornı ğana bar. Biraq koaliciya qwru üşin altı orın da jetkilikti. Sol sebepti oppoziciya jetekşisi YAir Lapid särsenbige deyin jaña koaliciyalıq ükimet qwruı kerek. Izrail' BAQ-tarınıñ habarlauınşa, 49 jastağı Bennet kelesi eki jıl işinde, 2023 jıldıñ qırküyegine deyin prem'er-ministr bolmaq. Keyinnen jaña parlamenttik saylauğa deyin YAir Lapid basşılıq etedi.

Öz kezeginde Netan'yahu «YAmina» partiyasınıñ jetekşisi tek bilikti qolğa alğısı kelip otır dep ayıptadı. Jäne solşıl küşterden qwralatın ükimetten memleket keleşegine qauip zor dep sanaydı. Alayaqtıq turalı bap boyınşa birneşe märte ayıp tağılğan Netan'yahu naurızda ötken jalpı saylauda ministrler kabinetin qwruğa qajetti dauıs jinay almadı. Bwl – eki jıl qatarınan ötken törtinşi ret saylau edi.

71 jastağı Netanyahu özine tağılğan jemqorlıq ayıbın teriske şığarıp, lauazımdı qızmetin atqara beretinin mälimdegen edi. Alayda eldiñ policiya tarauları oğan jemqorlıq boyınşa ayıptauın jalğastırdı. Orta Şığıstağı geosayasi oyındardıñ beldi oyınşısı Izrail' ükimetindegi bwl şu jwrttı eleñdetpey qoymaydı.

Birinşi kezekte Bin'yamin Netan'yahuğa eldegi «Soñğı jañalıqtar» atalatın ıqpaldı basılımmen jasırın kelisim jasağan degen ayıp tağıldı. YAğni atalğan basılım Netan'yahu turalı tek qana maqtau men qoşemet aytadı. Bwğan qarımta jauap retinde retinde ol basılımdı qoldap, qolpaştap otıradı.

Prem'er-ministrge tağılğan ekinşi ayıp: 2009 jılı bilik basına kelgennen beri ükimettegi jaqtastarı men basqa da twlğalardan qwnı 283 mıñ AQŞ dollarına para-par keletin sıylıqtar alğan. «Jerusalem Post» basılımınıñ aytuınşa Netan'yahu Gollivud alıptarınıñ biri Arnon Milçennen qwndı sıylıqtar qabıldap, onıñ AQŞ-qa viza aluına kömektesken.

Qwndı tartu-taralğı qabıldağan Netan'yahu «Milçen zañına» da qoldau bildirgen» degen ayıp jäne bar. Atalğan zañ jobası boyınşa şetelden tarihi otanına oralğan evrey qaltalıları on jıl boyı salıqtan bosatılmaq eken. Alayda, bwl zañ jobasına Qarjı ministrligi qarsılıq tanıtıp, qabıldanbay qalğan edi.

Ayıptaular jöninde mälimdeme jasağan Netanyahu «Meniñ sayasi sahnadağı tarihımda 15 ret osınday ayıptar tağıldı jäne onıñ bäri negizsiz bolıp şıqtı. Bwl retki ayıptar da solay, eş negizi joq», degen bolatın.

De-yure twrğısında Izrail' parlamenttik respublika bolğandıqtan, Knesset joğarğı bilik organı sanaladı. Knessetke saylau ötkennen keyin Izrail' prezidenti saylanğan frakciyalarmen otırıs ötkizip, koaliciyalıq ükimetti qwray alatın frakciyalar basşılarınıñ birine ükimetti qwruğa mindetteydi. 1996-1999 jıldarı Knessetke prem'er-ministr bükilwlttıq dauıs berumen saylandı. 1996 jılı ükimetti Bin'yamin Netan'yahu, al 1999 jılı Ehud Barak basqardı. 2001 jılı Baraktıñ qızmetten ketui nätijesinde prem'er-ministr qaytadan tikeley dauıs beru arqılı saylandı. Keyin elde prem'er-ministrdiñ tikeley saylau processinen bas tarttı.

Ükimet  Knesset müşeleriniñ köpşiligimen maqwldanuı kerek. Knesettiñ ökilettik merzimi – tört jıl.

"The Qazaq Times"