12 جىل ۇكىمەتتى باسقارعان بينيامين نەتانياحۋ. فوتو: ۆۆس

يزرايلدە جاڭا ۇكىمەت قۇرامى جاساقتالىپ، باسقارۋ قورعانىس ءمينيسترى بولعان نافتالي بەننەتكە ءوتتى. ەندى ەلدى 12 جىل باسقارعان بينيامين نەتانياحۋ وتستاۆكاعا كەتەدى.

سوڭعى سايلاۋدا پرەمەر-ءمينيستردىڭ پارتياسى ەڭ كوپ داۋىس جيناعانمەن، ۇكىمەت قۇرا المادى. ويتكەنى مۇلدەم وداقتاسى قالعان جوق. بينيامين نەتانياحۋدىڭ ءوزى سايلاۋ بۇرمالانعان دەپ سانايدى. جەرگىلىكتى اقپارات قۇرالدارىنا سۇحبات بەرگەن نەتانياحۋ: «ەل تاريحىندا، ءتىپتى كەز كەلگەن دەموكراتيا تاريحىندا بۇرىن-سوڭدى بولماعان سايلاۋ ناتيجەلەرىنىڭ بۇرمالانۋىنا كۋا بولدىق. ءبىز بۇعان ۇقساس وقيعانى تابۋعا تىرىستىق»، – دەدى. دەگەنمەن، سايلاۋ بۇرمالانعانى جونىندە دالەل جوق.

نەتانياحۋ قۇرا الماعاننان كەيىن مينيسترلەر كابينەتىن قۇرۋ مانداتى ونىڭ باستى باسەكەلەسى، «ەش اتيد» پارتياسىنىڭ جەتەكشىسى ياير لاپيدكە بۇيىردى. ءۇش اپتاعا سوزىلعان كەلىسسوزدەردەن كەيىن ول ۇكىمەت جاساقتالعانىن پرەزيدەنتكە باياندادى. الايدا ونى نافتالي بەننەت باسقارادى. تەك وسى شارت ورىندالعان جاعدايدا ول كواليتسياعا كىرۋگە كەلىستى. بۇل كواليتسيالىق جۇيەنىڭ ءبىر ەرەكشەلىگى. ەلدەگى ەڭ جوعارى لاۋازىمعا سايلاۋدا شامامەن 5% داۋىس جيناعان كانديدات يە بولدى.

زاڭ بويىنشا مينيسترلەر كابينەتى 4 جىلعا قۇرىلادى. الايدا ەل تاريحىندا ەشبىر ۇكىمەت مەرزىمىنىڭ سوڭىنا دەيىن وتىرا العان جوق.

يزرايل پارلامەنتتىك رەسپۋبليكا بولعاندىقتان، كنەسسەت جوعارعى بيلىك ورگانى سانالادى. كنەسسەتكە سايلاۋ وتكەننەن كەيىن يزرايل پرەزيدەنتى سايلانعان فراكتسيالارمەن وتىرىس وتكىزىپ، كواليتسيالىق ۇكىمەتتى قۇراي الاتىن فراكتسيالار باسشىلارىنىڭ بىرىنە ۇكىمەتتى قۇرۋعا مىندەتتەيدى.

1996-1999 جىلدارى كنەسسەتكە پرەمەر-مينيستر بۇكىلۇلتتىق داۋىس بەرۋمەن سايلاندى. 1996 جىلى ۇكىمەتتى بينيامين نەتانياحۋ، ال 1999 جىلى ەحۋد باراك باسقاردى. 2001 جىلى باراكتىڭ قىزمەتتەن كەتۋى ناتيجەسىندە پرەمەر-مينيستر قايتادان تىكەلەي داۋىس بەرۋ ارقىلى سايلاندى. كەيىن ەلدە پرەمەر-ءمينيستردىڭ تىكەلەي سايلاۋ پروتسەسسىنەن باس تارتتى.

ۇكىمەت  كنەسسەت مۇشەلەرىنىڭ كوپشىلىگىمەن ماقۇلدانۋى كەرەك. كنەسەتتىڭ وكىلەتتىك مەرزىمى – ءتورت جىل.

"The Qazaq Times"