ءماجىلىس جەر تۋرالى زاڭ جوباسىن ءبىرىنشى وقىلىمدا ماقۇلدادى

بۇگىن، 7 ساۋىردە قازاقستان پارلامەنتىنىڭ تومەنگى پالاتاسى، ءماجىلىس  شەتەلدىكتەرگە جەر ساتۋعا جانە جالعا بەرۋگە تىيىم سالۋدى قاراستىراتىن "قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارى ماسەلەلەرى بويىنشا وزگەرىستەر مەن تولىقتىرۋ ەنگىزۋ تۋرالى" دەپ اتالعان قۇجاتتى ماقۇلدادى. 

ءماجىلىس العاشقى وقىلىمدا ماقۇلداعان زاڭ جوباسىنا ساي، اۋىل شارۋاشىلىعى جەرلەرىن شەتەلدىكتەرگە جانە شەتەلدىك كومپانيالارعا، شەتەل ازاماتتارىنىڭ ۇلەسى بار قازاقستاندىق كومپانيالارعا، ازاماتتىعى جوق ادامدارعا، حالىقارالىق عىلىمي ورتالىقتارعا جانە قانداستارعا بەرۋگە تولىق تىيىم سالۋ كوزدەلگەن.

ماجىلىستە وسى زاڭ جوباسىنا بايلانىستى بايانداما جاساعان اۋىل شارۋاشىلىعى ءمينيسترى ساپارحان وماروۆتىڭ سوزىنشە، 2016 جىلعى 1 شىلدەگە دەيىن، ياعني جەردى شەتەلدىكتەرگە جالعا بەرۋ جايلى باپقا موراتوري ەنگىزىلگەنگە دەيىن جالعا بەرىلىپ قويعان اۋىل شارۋاشىلىعى ماقساتىنداعى جەر ۋچاسكەلەرى جالعا بەرۋ مەرزىمى اياقتالعاندا قايتادان مەملەكەت مەنشىگىنە وتەدى.

وماروۆتىڭ ايتۋىنا قارعاندا، قازىر 74,4 مىڭ گەكتار اۋىل شارۋاشىلىعى جەرى 7 بىرىككەن كاسىپورىنعا، 18,5 مىڭ گەكتار جەر ەكى شەتەلدىك زاڭدى تۇلعاعا موراتوري ەنگىزىلگەنگە دەيىن جالعا بەرىلگەن. ولاردىڭ جالعا الۋ مەرزىمى 2022 جىلدان 2025 جىلعا دەيىن.

مينيستر بايانداماسىندا شەتەلدەن كەلگەن ۇلتى قازاقتارعا جەر قاي كەزدە جالعا بەرىلەتىنىنە دە توقتالدى.

"ولار جەكە قوسالقى شارۋشىلىعى، باۋ-باقشا جانە ساياجاي قۇرىلىسى ءۇشىن جەر ۋچاسكەسىن الا الادى، اۋىل شارۋاشىلىعى جەرلەرىن قازاقستان ازاماتتىعىن العاننان كەيىن عانا جالعا الۋعا مۇمكىندىگى بار" دەدى وماروۆ.

"The Qazaq Times"