5 مامىردا ءماجىلىس جەر قاتىناستارى تۋرالى زاڭ جوباسىنا سەنات ەنگىزگەن تۇزەتۋلەردى ماقۇلداپ، قۇجاتتى پرەزيدەنتكە جولدادى. وتكەن اپتادا سەنات جوبانىڭ قوعامدا داۋ تۋعىزعان تۇستارىنا تۇزەتۋ ەنگىزۋدى، اتاپ ايتقاندا، شەتەلدىكتەرگە ورمان ءوسىرۋ ءۇشىن جەر بەرمەۋدى ۇسىنىپ، ماجىلىسكە قايتارعان.

بۇگىن، 6 مامىردا ءماجىلىس دەپۋتاتتارى بىرنەشە مينۋتتىڭ ىشىندە اتالعان تۇزەتۋلەردى قابىلدادى. اگرارلىق ماسەلەلەر جونىندەگى كوميتەتتىڭ حاتشىسى، دەپۋتات بەرىك سەرىكۇلى "سەنات ۇسىنعان تۇزەتۋلەر" شەتەلدىك جەر پايدالانۋشىلار مەن شەتەلدىك قاتىسۋى بار زاڭدى تۇلعالارعا جەر بەرمەۋدى كوزدەيتىن زاڭ جوباسىنىڭ ء"ماجىلىس ماقۇلداعان زاڭ تۇجىرىمداماسىن بۇزبايدى جانە ونىڭ مازمۇنىن ناشارلاتپايدى، وسىعان وراي كوميتەت سەنات ۇسىنعان وزگەرىستەر مەن تولىقتىرۋلارمەن كەلىسۋدى ۇسىنادى " دەدى. دەپۋتاتتاردىڭ بارلىعى جوبانى قولدادى.

پرەزيدەنت قاسىم-جومارت توقاەۆتىڭ باستاماشى بولۋىمەن ونىڭ اكىمشىلىگى دايىنداعان جەر قاتىناستارى تۋرالى زاڭ جوباسى ءماجىلىستىڭ قاراۋىنا ناۋرىزدىڭ ورتاسىندا تۇسكەن. ول كەزدە اتالعان قۇجاتتا ورمان ءوسىرۋ ءۇشىن شەتەلدىكتەرگە جەر بەرۋدى كوزدەيتىن تارماق مۇلدە بولعان جوق. ونى ەنگىزەن – ءماجىلىستىڭ وسى زاڭ جوباسى جونىندەگى جۇمىس توبى. زاڭ جوباسى 14 ساۋىردە سەناتقا ءماجىلىس ەنگىزگەن تۇزەتۋ بويىنشا جولداندى. سول ساتتە قوعامدا وسى باپقا قارسىلار كوبەيدى. ەلدىڭ كەيبىر قالاسىندا "جاڭا زاڭ جوباسى قابىلدانباسىن" دەگەن تالاپپەن ميتينگى دە ءوتتى. سەنات داۋ تۋدىرعان تارماققا تۇزەتۋ ەنگىزىپ، زاڭ جوباسىن ماجىلىسكە قايتاردى.

قازاقستاندا جەر داۋى ەلدى ءبىرىنشى پرەزيدەنت نۇرسۇلتان نازارباەۆ باسقارىپ تۇرعان كەزدە باستالعان. 2016 جىلى ەلدە اۋىل شارۋاشىلىعى جەرىن شەتەلدىكتەرگە ساتۋ جانە ۇزاق مەرزىمگە جالعا بەرۋدى قاراستىراتىن داۋلى زاڭ جوباسىنا حالىق جاپپاي نارازى بولعان سوڭ نازارباەۆ وعان بەس جىلعا موراتوري جاريالاعان. ونىڭ مەرزىمى بيىل اياقتالادى. وسىعان وراي، قازىرگى پرەزيدەنت قاسىم-جومارت توقاەۆ جەردى شەتەلدىكتەرگە ساتۋعا جانە ۇزاق جىلعا جالعا بەرۋگە تىيىم سالۋدى قاراستىراتىن زاڭ جوباسىن ازىرلەۋدى تاپسىرعان.

بيلىك جەردىڭ بوس جاتپاۋ قاجەتتىگىن، وعان ينۆەستيتسيا تارتۋ كەرەكتىگىن ءجيى ايتادى. بىراق ەل ازاماتتارىنىڭ كەيبىرى ەلدە جەمقورلىق ءورشىپ تۇرعان شاقتا جەر ساتۋ قاۋىپتى دەگەن ويدا.

"The Qazaq Times"