Mäjilis ğimaratı. Foto: 24.kz

Bügin, 7 säuirde Qazaqstan parlamentiniñ tömengi palatası, mäjilis  şeteldikterge jer satuğa jäne jalğa beruge tıyım saludı qarastıratın "Qazaqstan Respublikasınıñ keybir zañnamalıq aktilerine jer qatınastarı mäseleleri boyınşa özgerister men tolıqtıru engizu turalı" dep atalğan qwjattı maqwldadı. 

Mäjilis alğaşqı oqılımda maqwldağan zañ jobasına say, auıl şaruaşılığı jerlerin şeteldikterge jäne şeteldik kompaniyalarğa, şetel azamattarınıñ ülesi bar qazaqstandıq kompaniyalarğa, azamattığı joq adamdarğa, halıqaralıq ğılımi ortalıqtarğa jäne qandastarğa beruge tolıq tıyım salu közdelgen.

Mäjiliste osı zañ jobasına baylanıstı bayandama jasağan auıl şaruaşılığı ministri Saparhan Omarovtıñ sözinşe, 2016 jılğı 1 şildege deyin, yağni jerdi şeteldikterge jalğa beru jaylı bapqa moratoriy engizilgenge deyin jalğa berilip qoyğan auıl şaruaşılığı maqsatındağı jer uçaskeleri jalğa beru merzimi ayaqtalğanda qaytadan memleket menşigine ötedi.

Omarovtıñ aytuına qarğanda, qazir 74,4 mıñ gektar auıl şaruaşılığı jeri 7 birikken käsiporınğa, 18,5 mıñ gektar jer eki şeteldik zañdı twlğağa moratoriy engizilgenge deyin jalğa berilgen. Olardıñ jalğa alu merzimi 2022 jıldan 2025 jılğa deyin.

Ministr bayandamasında şetelden kelgen wltı qazaqtarğa jer qay kezde jalğa beriletinine de toqtaldı.

"Olar jeke qosalqı şaruşılığı, bau-baqşa jäne sayajay qwrılısı üşin jer uçaskesin ala aladı, auıl şaruaşılığı jerlerin Qazaqstan azamattığın alğannan keyin ğana jalğa aluğa mümkindigi bar" dedi Omarov.

"The Qazaq Times"