فوتو: https://www.inform.kz

الەمدە كوروناۆيرۋس قۇرباندارىنىڭ سانى 2 ميلليوننان اسسا، ۆيرۋس جۇقتىرعاندار 95 ميلليونعا جەتتى. وسىعان بايلانىستى بۇۇ باس حاتشىسى ۆاكتسينا تاراتۋ ماسەلەسىندە ىنتىماقتاسۋ قاجەت دەپ دابىل قاقتى.

دامىعان مەملەكەتتەر ۆاكتسينالارعا تەز قول جەتكىزسە، الەمدەگى ەڭ كەدەي ەلدەردە ەكپە تاراتۋ قيىن. كەيبىر مەملەكەتتەر استىرتىن كەلىسىم جاساپ، ۆاكتسينالاردى ارتىعىمەن ساتىپ العان.

گۋتتەريش رەسمي مالىمدەمەسىندە: «ۆاكتسينا وندىرۋشىلەر جاۋاپكەرشىلىكتى سەزىنىپ، COVAX مەحانيزمىمەن جانە بۇكىل الەمدەگى ەلدەرمەن بىرلەسىپ، ۆاكتسينالاردى قاجەتتى مولشەردە جەتكىزىپ، دۇرىس تاراتۋ ءۇشىن جۇمىس ىستەۋى كەرەك. ءبىر-ءبىرىمىزدى قورعاۋ ءۇشىن قاراپايىم جانە دالەلدەنگەن نارسەلەردى ەستە ساقتايىق: ماسكا تاعۋ، فيزيكالىق قاشىقتىقتى ساقتاۋ جانە كوپشىلىكتەن اۋلاق بولۋ. ءبىزدىڭ الەم بۇل ۆيرۋستى بىرلەسىپ ارەكەت ەتكەندە عانا جەڭە الادى»، – دەدى.

وتكەن اپتادا دۇنيەجۇزىلىك دەنساۋلىق ساقتاۋ ۇيىمى پاندەميانىڭ ەكىنشى جىلى بىرىنشىسىنەن اۋىر بولۋى مۇمكىن دەپ بولجام جاساعان. بۇعان ۇلىبريتانيادان انىقتالعان مۋتاتسيالانعان ۆيرۋستىڭ تەز تارالۋى سەبەپ. رەسمي مالىمەتتەر بويىنشا، ۆيرۋس ادامدار اراسىندا 70%-عا تەز تارايدى. بىراق قاۋىپتىلىگى جاعىنان بۇرىنعى تۇرىنەن ەرەكشەلەنبەيدى. جاڭا شتامم الدىڭعى كوروناۆيرۋسقا قاراعاندا ادامدارعا تەز جۇعاتىنى انىقتالعان. الەمنىڭ كوپتەگەن ەلى كورولدىكپەن اۋە قاتىناسىن توقتاتىپ، بۇل ەلدەردەن كەلگەن ادامداردى قاتاڭ تەكسەرۋگە كىرىستى .

ازىرگە «بريتاندىق» ۆيرۋس ناقتى وسى ەلدە وزگەرىسكە ۇشىراعان با، ول دا بەلگىسىز. ونىڭ وسى ەلدە يممۋنيتەتى ءالسىز، ۆيرۋسپەن كۇرەسۋگە دارمەنسىز ناۋقاستىڭ اعزاسىندا پايدا بولعانىن نەمەسە بولماسا سىرتتان كەلگەنىن ءالى ەشكىم انىقتاعان جوق.

"The Qazaq Times"