ۇلىبريتانيادا كارانتين شارالارى جەڭىلدەتىلەدى. ەل پرەمەر-ءمينيسترى بوريس دجونسون جاڭا قۇجاتقا قول قويدى. 

بۇعان دەيىن ۇلىبريتانيادا قاۋىپ توبىنداعى 15 ميلليونعا جۋىق ادام ۆاكتسينا قابىلداعان. ۇكىمەت جاپپاي ۆاكتسيناتسيالاۋ ۆيرۋس جۇقتىرۋ قاۋپىن تومەندەتەدى دەيدى. بىراق، عالىمدار ۇكىمەتتى شەكتەۋ شارالارىن الۋعا اسىقپاۋعا شاقىردى.

كارانتين جەڭىلدەتىلگەن جاعدايدا، مەكتەپتەر 8 ناۋرىزدان باستاپ اشىلماق. سونىمەن قاتار، سول كۇننەن باستاپ ەكى ءۇيدىڭ ەكى ادامىنا كەزدەسۋگە رۇقسات ەتىلەدى.

بولجام بويىنشا، 29 ناۋرىزدان باستاپ ءار ۇيدە تۇراتىن التى ادامنىڭ كەزدەسۋىنە رۇقسات ەتىلەدى. ءساۋىردىڭ سوڭىنا دەيىن ازىق-تۇلىكتىك ەمەس دۇكەندەر اشىلادى. گازەت مالىمەتىنشە، پاب پەن مەيرامحانالار مامىردا عانا اشىلادى، دەگەنمەن، مەكەمەلەردىڭ وتىراتىن جازعى الاڭدارى كەلۋشىلەردى ودان ەرتەرەك قابىلداۋى مۇمكىن.

جەلتوقساننىڭ اياعىندا ۇلىبريتانيادا شىققان كوروناۆيرۋستىڭ وزگەرگەن جاڭا ءتۇرى بىرنەشە مەملەكەتتە تىركەلىپ ۇلگەردى. وسىعان بايلانىستى 20 جەلتوقساندا ۇلىبريتانيا انگليانىڭ وڭتۇستىك-باتىسى مەن لوندوندا ءتورتىنشى دەڭگەيلى لوكداۋن ەنگىزگەن. قاتاڭداتىلعان كارانتين كەزىندە روجدەستۆو مەرەكەسىنە بايلانىستى قوعامدىق ءىس-شارالارعا رۇقسات بولعان جوق.

ۆيرۋستىڭ «بريتاندىق» جاڭا شتامى ادامدار اراسىندا 70%-عا تەز تارايتىنى انىقتالدى. بىراق، قاۋىپتىلىگى جاعىنان بۇرىنعى تۇرىنەن ەرەكشەلەنبەيدى. ۆيرۋستىڭ باسقا مۋتاتسياسىنىڭ تابىلعانىن وڭتۇستىك افريكا رەسپۋبليكاسىنىڭ دەنساۋلىق ساقتاۋ مينيسترلىگى دە حابارلاعان. ونىڭ دا تارالۋ قارقىنى جوعارى.

"The Qazaq Times"