عالامدىق جىلىنۋ: اقش-تا ەكى قالا سۋ استىندا قالدى

اقش-تىڭ نيۋ-يورك پەن نيۋ-دجەرسي قالالارى تولاسسىز جاۋعان جاڭبىر مەن قاتتى جەل سالدارىنان سۋ استىندا قالدى. بۇل تۋرالى Reuters اگەنتتىگى حابارلادى.

جاۋىننان كەيىن كوشەلەر سۋعا تولىپ، جاياۋ جۇرگىنشىلەر مەن كولىكتەردىڭ جۇرۋىنە قيىندىق تۋعىزعان. سۋ دەڭگەيى كوتەرىلىپ، اعاشتار قۇلاعان. سالدارىنان بىرنەشە اۋداندا 300 مىڭعا جۋىق ءۇي جارىقسىز قالدى. ازىرگە زارداپ شەككەندەر تۋرالى مالىمەت جوق. بولجام بويىنشا، كليماتتىڭ كۇن وتكەن سايىن وزگەرىسكە ۇشىراپ، عالامدىق جىلىنۋ سالدارىنان وسىنداي تابيعي اپاتتار ءجيى ورىن الادى.

بۇعان دەيىن جەر كليماتى قازىرگى قارقىنمەن جىلىنا بەرسە، 2100 جىلعا بارعاندا تەڭىز سۋلارى 1 مەتر شاماسىندا كوتەرىلەدى دەپ بولجانعان ەدى. الايدا، انتراكتيكا مەن گرەنلانديا ارالدارىنداعى مۇز قاباتتارىنىڭ ەرۋىنە قايتالاي زەرتتەۋ جۇرگىزگەن بريتانيا مەن اقش عالىمدارى تەڭىز-مۇحيت سۋ دەڭگەيىنىڭ كوتەرىلۋى ءبىز شامالاعان مولشەردەن ەكى ەسە ارتىق بولاتىنىن بولجادى. بيىل داۆوستا وتكەن دۇنيەجۇزىلىك ەكونوميكالىق فورۋمدا بۇۇ باس حاتشىسى انتونيۋ گۋتەررەش الەم ەكونوميكاسىنا تونگەن ەڭ ۇلكەن قورقىنىش – كليمات وزگەرىسى دەپ كورسەتتى. گۋتەررەش سوزىندە: «ءبىز بۇل جارىستا ارتتا قالىپ جاتىرمىز. كليمات وزگەرىسى ءبىزدىڭ الدىن الۋ شارالارىمىزدان الدە قايدا تەز بولىپ جاتىر. شىنايى جاعداي ءبىز ويلاعاننان دا اۋىر ەكەنىن سوڭعى وقيعالار دالەلدەپ جاتىر»، – دەگەن بولاتىن.

عالىمداردىڭ سوڭعى تۇجىرىمىنا سايكەس، اۋاعا شىعارىلاتىن كومىر قىشقىل گازىنىڭ مولشەرىن ازايتپاساق، 2100 جىلعا بارعاندا لوندون، نيۋ-يورك، شانحاي سەكىلدى الىپ مەگاپوليستەر سۋ استىندا قالىپ، بىرنەشە ءجۇز ملن ادامنىڭ قونىس اۋدارۋىنا تۋرا كەلەدى.

"The Qazaq Times"