ەسىرتكىنىڭ كوپتەگەن تۇرلەرى ەۋروپانىڭ وزىندە وندىرىلەدى. فوتو: دەلوۆايا ستوليتسا.

ەۋروپاداعى ەسىرتكى جانە وعان تاۋەلدىلىكتى زەرتتەۋ ورتالىعى  جاقىندا جىلدىق ەسەبىن جاريا ەتتى. زەرتتەۋ ناتيجەسى تاڭقالارلىق مالىمەتتەردى ورتاعا سالادى. وندا ەسىرتكى ونىمدەرىنىڭ ەۋروپاعا قانداي جولمەن كىرەتىنىن جانە ونى تۇتىناتىندار تۋرالى مالىمەتتەر كورسەتىلگەن.

 ەسىرتكى جانە وعان تاۋەلدىلىكتى زەرتتەۋ ورتالىعى مالىمەتىنە قاراعاندا، ەۋروپاداعى ەسىرتكى ونىمدەرىنىڭ باسىم كوبى ەو ەلدەرىنىڭ وزىندە وندىرىلەدى. دەگەنمەن، بۇل مالىمەت گەروينعا قاتىستى ەمەس، ەسىرتكى ونىمدەرىنىڭ باسقا تۇرلەرىن قامتيدى. ەو ايماعىنا گەروين اۋعانستان جانە بىرنەشە ازيالىق ەلدەردەن كىرسە، كوكاين وڭتۇستىك امەريكادان كىرەدى. زەرتتەۋ ناتيجەسى كورسەتكەندەي، بۇل ەسىرتكى ونىمدەرى كوبىندە روتتەردام (گوللانديا) پورتى ارقىلى ەۋروپا ەلدەرىنە كىرەدى.

گەروين مەن كوكايننان وزگە ەسىرتكى ونىمدەرى دەرلىكتەي ەو ەلدەرىنىڭ وزىندە جاسالادى. ايتالىق، سينتەتيكالىق ەسىرتكى ونىمدەرىن جاسايتىن لابوراتوريالاردىڭ كوبى گوللانديا مەن بەلگيادا ەكەنى ءمالىم بولعان. انىقتالعان مالىمەتتەرگە قاراعاندا، پوليتسيا تارابىنان جابىلعان لابوراتوريالاردان 6,6 ملن تابلەتكا تابىلعان.

ال، مەتامفەتامين جاساعان 300-گە جۋىق لابوراتوريانىڭ 264-ءى چەحيادا ەكەنى ءمالىم بولدى. چەحيادا تاركىلەنگەن ەسىرتكى كولەمى 6,5 توننا دەپ كورسەتەدى ەسەپتە. سونداي-اق، ماريحۋانا دەپ اتالاتىن ەسىرتكىنىڭ كەڭ تاراعان ءبىر ءتۇرى ەۋروپا ەلدەرىنە ماروككودان جەتكىزىلىپ جاتقانى انىقتالعان. ماروككودا بۇل ەسىرتكى ءتۇرىن ارنايى ءوسىرىپ، ساتادى دەيدى زەرتتەۋشىلەر.

زەرتتەۋ ورتالىنىڭ كورسەتكەن مالىمەتتەرىنە قارايتىن بولساق، 2017 جىلى تۇتاس ەۋروپادا 1,5 شاماسىندا ەسىرتكىگە قارسى زاڭ بۇزۋشىلىق تىركەلگەن. بۇل سان 2007 جىلعىمەن سالىستىرعاندا 20 پايىزعا كوپ. ال، 2018 جىلى زەرتتەۋ ورتالىعى ەسىرتكىنىڭ وپياتتان تارتىپ، ستيمۋلياتور جانە كاننابيويدكە دەيىنگى 730 تۇرىنە زەرتتەۋ جۇرگىزگەن. ناتيجەدە بۇلاردىڭ 50-گە جۋىق جاڭا ءتۇرى «قاراڭعى بازارلاردا» سوڭعى بىرنەشە جىلدا عانا پايدا بولعانى انىقتالعان. بۇل ەسىرتكى تۇرلەرىنىڭ جىلدان جىلعا كوبەيىپ، ونى ءوندىرۋ مەن وڭدەۋ «تەحنيكاسىنىڭ» بارعان سايىن دامي تۇسكەنىن كورسەتەدى.

اتالعان ورتالىق ۇسىنعان مالىمەتتە ەۋروپانىڭ الەمدە ەسىرتكىگە سۇرانىس ەڭ جوعارى بازار ەكەنى ايتىلادى. ەو-عا مۇشە ەلدەرىندە 91 ملن ادام، ياعني تۇتاس وداقتىڭ 27 پايىز حالقى ومىرىندە كەمىندە ءبىر رەت ماريحۋانا تۇتىنعان. 18 ملن ادام كوكاين تۇتىنعان. ونىڭ ۇستىنە، قازىر تەحنولوگيانىڭ دامۋى ەسىرتكى ساۋداسىنا جاڭا كۇش بەرگەن. الەۋمەتتىك جەلىلەر ارقىلى ەسىرتكى ساتۋ كۇشەيگەن. بۇل پوليتسيانىڭ ەسىرتكىگە قارسى كۇرەسىن قيىنداتا ءتۇستى. ەسىرتكىدەن ايىقتىرۋ ورتالىقتارى ءتۇرلى جاڭا تاسىلدەردى قولدانىپ جاتقانىمەن، بىلتىردىڭ وزىندە ەسىرتكىنى شامادان تىس تۇتىنعان 9 مىڭ 500 ادام كوز جۇمعان.

“The Qazaq Times”