80 جىلدان كەيىن نيۋ-يورك سۋ استىندا قالۋى مۇمكىن

بۇعان دەيىن جەر كليماتى قازىرگى قارقىنمەن جىلىنا بەرسە، 2100 جىلعا بارعاندا تەڭىز سۋلارى 1 مەتر شاماسىندا كوتەرىلەدى دەپ بولجانعان ەدى. الايدا، انتراكتيكا مەن گرەنلانديا ارالدارىنداعى مۇز قاباتتارىنىڭ ەرۋىنە قايتالاي زەرتتەۋ جۇرگىزگەن بريتانيا مەن اقش عالىمدارى تەڭىز-مۇحيت سۋ دەڭگەيىنىڭ كوتەرىلۋى ءبىز شامالاعان مولشەردەن ەكى ەسە ارتىق بولاتىنىن بولجادى.

عالىمداردىڭ سوڭعى تۇجىرىمىنا سايكەس، اۋاعا شىعارىلاتىن كومىر قىشقىل گازىنىڭ مولشەرىن ازايتپاساق، 2100 جىلعا بارعاندا لوندون، نيۋ-يورك، شانحاي سەكىلدى الىپ مەگاپوليستەر سۋ استىندا قالىپ، بىرنەشە ءجۇز ملن ادامنىڭ قونىس اۋدارۋىنا تۋرا كەلەدى.

بيىل داۆوستا وتكەن دۇنيەجۇزىلىك ەكونوميكالىق فورۋمدا بۇۇ باس حاتشىسى انتونيۋ گۋتەررەش الەم ەكونوميكاسىنا تونگەن ەڭ ۇلكەن قورقىنىش – كليمات وزگەرىسى دەپ كورسەتتى. «ءبىز بۇل جارىستا ارتتا قالىپ جاتىرمىز. كليمات وزگەرىسى ءبىزدىڭ الدىن الۋ شارالارىمىزدان الدە قايدا تەز بولىپ جاتىر. شىنايى جاعداي ءبىز ويلاعاننان دا اۋىر ەكەنىن سوڭعى وقيعالار دالەلدەپ جاتىر»، – دەگەن بۇۇ باس حاتشىسى.

اقش ۇلتتىق عىلىم اكادەمياسىنىڭ بولجاۋىنشا، ەگەر كومىر قىشقىل گازىنىڭ اۋاعا شىعارىلۋى وسى دەڭگەيدە قالا بەرسە، 2100 جىلعا بارعاندا جەر بەتىنىڭ ورتاشا تەمپەراتۋراسى 5 گرادۋس جوعارلايدى. سونىڭ ناتيجەسىندە تەڭىز-مۇحيتتاردىڭ سۋ دەڭگەيى 62 مەتردەن 238 مەترگە دەيىن كوتەرىلەدى. بۇل دەگەنىمىز، قۇرلىق جەر اۋماعىنان 1 ملن 790 مىڭ شارشى شاقىرىم اۋماعى سۋ استىندا قالاتىنىن كورسەتەدى. بۇل ليۆيانىڭ كولەمىندەي قۇرلىق جەرى سۋ استىنا كەتكەنىمەن بىردەي. 187 ملن حالىقتىڭ مەكەنىن سۋ باسادى. ون ميلليونداعان تۇرعىنى بار ءىرى قالالاردىڭ بىرقاتارى دا بۇل قاۋىپتەن امان قالمايدى. ولاردىڭ قاتارىندا لوندون، نيۋ-يورك، شانحاي سەكىلدى ءىرى قارجى ورتالىقتارى دا بار.

  “The Qazaq Times”