الەمنىڭ بىرقاتار ەلىندە كليماتتىڭ وزگەرۋىنە قارسى شارا قولدانۋدى تالاپ ەتكەن نارازىلىق شەرۋلەرى وتۋدە. شەرۋگە كوبىندە مەكتەپ جاسىنداعى جانە ستۋدەنت جاستار قاتىسۋدا. اۋستراليا، ءۇندىستان، كەنيا، تىنىق مۇحيتى ارالدى ەلدەرىندە دە وسىنداي نارازىلىقتار بولدى. نيۋ-يورك قالاسىنداعى شەرۋگە 1 ملن 100 مىڭ مەكتەپ وقۋشىسى رۇقسات الىپ قاتىستى.

جەر استى بايلىقتارىن قازۋدى توقتاتۋ جانە كليماتتىڭ جىلىنۋىنا قارسى شارالار قولدانۋ تالابىن قويعان اكتسيانى بىلتىر گرەتا سانبەرگ اتتى مەكتەپ وقۋشىسى باستاعان بولاتىن. ول ءوز نارازىلىعىن ءبىلدىرۋ ءۇشىن مەكتەپتەن شىعىپ، نارازىلىق شاراسىن ۇيىمداستىرعان.

بۇۇ جەر شارىنىڭ ورتاشا تەمپەراتۋراسى 1,5 س° كوتەرىلسە عالامدىق داعدارىسقا اپارىپ سوعاتىنىن ەسكەرتەدى. بيىلعى جاز الەمدە كليماتتىڭ وزگەرىسى انىق كورىنگەن، اپاتتى جاز بولدى. بىرقاتار ەلدەر كليمات وزگەرىسىنەن بولعان تابيعي اپاتتاردان زارداپ شەكتى.

عالىمدار كليماتتىڭ وزگەرىسىنەن اۋىل شارۋاشىلىق سالاسى، فەرمەرلەر كوبىرەك زيان تارتاتىنىن ايتادى. وعان قارسى تۇرۋ ءۇشىن تۇتاس ادامزاتتىڭ وزگەرىستەردى سەزىنىپ، وعان قارسى تۇرۋعا جۇمىلۋى ەڭ باستى شارت.

عىلىمي زەرتتەۋلەردىڭ ناتيجەسىنە نەگىزدەلسەك، ەگەر كليماتتىڭ جىلىنۋى وسى قارقىنىنان جازباسا، 2050 جىلعا بارعاندا جەر بەتىندەگى حالىق سانى تىعىز بىرنەشە ايماقتا ادام ءومىر ءسۇرۋى مۇمكىن بولماي قالادى. ايتالىق، وڭتۇستىك شىعىس جانە وڭتۇستىك ازيا، ورتا شىعىس ورتالىق افريكا وڭىرلەرى. ىلعالدى اۋا كليماتىنداعى بۇل ايماقتار تەمپەراتۋرانىڭ جوعارلاۋىنان ىلعالدى ىستىق اۋا كليماتىنا وزگەرىپ، ادامنىڭ تىنىس الۋىن قيىنداتا تۇسەدى. ناتيجەسىندە ميلليونداعان، ءتىپتى ميللياردتاعان ادامنىڭ قاۋىپتى ميگراتسياسىنا الىپ كەلەدى.

باتىس اقپارات قۇرالدارىنىڭ حابارىنا قاراعاندا، كليماتتىڭ جىلىنۋى ءولى تەڭىزدە كوبىرەك بايقالادى. ءولى تەڭىزدىڭ سۋى جىل سايىن ازايىپ، جاعالاۋلار قۇرعاپ جاتىر. ەلدە اۋىز سۋ مولشەرى دە ازايىپ، كەي وڭىردە اپتاسىنا 24 ساعات قانا سۋ بەرىلۋدە.

“The Qazaq Times”