فوتو: gdb.rferl.org

«ماشا مەن ايۋ» مۋلتسەريالىنىڭ باستى ماقساتى – پۋتيندىك كوزقاراستى دارىپتەۋ. بۇل تۋرالى «Times» باسىلىمى جازدى.

«Times» ءوز ماتەريالىندا تاللين ۋنيۆەرسيتەتىندەگى كوممۋنيكاتسيا ينستيتۋتىنىڭ وقىتۋشىسى پريت حىبەمياگاننىڭ Helsingin Sanomat فين گازەتىندەگى سۇحباتىن نازارعا العان. ماتەريالدا مۋلتفيلمدەگى نەگىزگى كەيىپكەر ايۋ يمپەريالىق رەسەيدى بەينەلەيدى، ال ماشا – پرەزيدەنت ءپۋتيننىڭ ساياساتتاعى قىلىقتارىن ايدان انىق كورسەتەدى جانە بۇل كەيىپكەردىڭ باستى ماقساتى – بالالارعا وسى ەلدىڭ بەينەسىن جاقسى جاعىنان دارىپتەۋ، ءارى رەسەيلىك كوزقاراستى ءسىڭىرۋ دەلىنگەن. سونداي-اق، وقىتۋشى حىبەمياگي اتالعان مۋلتسەريال ەستونيانىڭ ۇلتتىق قاۋىپسىزدىگىنە قاۋىپ توندىرەتىن ءونىمنىڭ قاتارىندا دەپ سانايدى. اتالعان ماقالادان بولەك، بريتانيالىق وزگە باسىلىمدار «ماشا مەن ايۋ» مۋلتسەريالى پۋتيندىك كوزقاراستان وزگە، رەسەيلىك جاسىرىن ناسيحاتقا قۇرالعان دەيدى.

بريتاندىق باسىلىمدا جارىق كورگەن ماقالا. فوتو: www.bbc.com

رەسەي مەملەكەتتىك باسىلىمدارى باتىستىق باق-تاردىڭ بۇل مالىمدەمەسىن «پاتولوگيالىق رۋسوفوبياعا» بالادى. بريتانياداعى رەسەي ەلشىلىگى وسى ماقالاعا قاتىستى تۆيتتەردەگى جازباسىندا: «بۇگىن Times گازەتى ماڭىزدى ماسەلەنى كوتەردى: بريتانيا «ماشي مەن ايۋدان» قالاي ساقتانا الادى؟ بالتىق جاعالاۋى ەلدەرىندە سۋرەت سالۋ بويىنشا جەكە وقۋ ورتالىعىن اشۋ كەرەك پە؟ بالكىم، بارلىق مۋلتيپليكاتورلاردى ەو سانكتسيالىق تىزىمىنە قوسۋ كەرەك شىعار!؟»، – دەپ مىسقىل تۇرىندە جاۋاپ قايتاردى. ال اعىلشىن ءتىلدى ساراپشىلارىنىڭ ءبىرى مارك گالەوتتي: «ماشا مەن ايۋ» ءسىزدىڭ ەلىڭىزدى باسىپ المايدى. مۇنداي ويلار رەسەيگە قارسى گيبريدتىك سوعىستىڭ سيپاتى ىسپەتتى»،– دەيدى.

اتالعان مۋلتسەريالدىڭ اۆتورى، «انيماككورد» ستۋدياسىنىڭ باسشىسى دميتري لوۆەيكو ەشقانداي ساياسي استاردىڭ بولماعانىنا سەندىردى.

مۋلتسەريال كەيىپكەرلەرى كوپتەگەن ەلدەردە تانىمال. سۋرەتتە: مەحيكو مادەني ورتالىعىنداعى «ماشا مەن ايۋ» سپەكتاكلىنەن كورىنىس. فوتو: www.bbc.com

قاتاڭ سىنعا ىلىككەن وزگە دە مۋلتفيلمدەر:  

  • 1936 جىلى گەرمانيادا ديسنەيلەندتىڭ سيمۆولى «ميككي ماۋس» مۋلتسەريالىن كورسەتۋگە، ناسيحاتتاۋعا قاتاڭ تىيىم سالىندى. سەبەبى، گيتلەر ۋولت ديسنەيدى «ايلاكەر ەۆرەي جانە دەگەنەراتيۆتى ونەردى قۇرۋشى» دەپ ەسەپتەگەن. سونىمەن قاتار، باستى كەيىپكەر پرۋس وفيتسەرىنىڭ فورماسىن كيىپ، امەريكالىق ناسيحات قۇرالى رەتىندە سانالدى.
  • 2010 جىلى «وڭتۇستىك پارك» اتتى ساتيرالىق امەريكاندىق مۋلتفيلم سەرياسىنىڭ بىرىندە، جارگون لەكسيكا مەن ورەسكەل ازىلدەر قولدانىلعان. ال «توم مەن دجەرري» ەتنوستىق جانە ناسىلدىك ءبولۋدى جۇزەگە اسىرۋشى رەتىندە سىنعا الىنعان. ءمۋلتفيلمنىڭ كەيبىر كەيىپكەرلەرى تەمەكى شەككەنى ءۇشىن مۋلتيپليكاتورلارعا ايىپپۇل سالىندى.
  • 2017 جىلى امەريكاندىق «مايانىڭ باستان كەشكەن وقيعالارى» انيماتسيالىق سەريالىنداعى ەپيزودتارىنىڭ بىرىندە ادەپسىز بەينە انىقتالىپ، كورەرمەندەر تاراپىنان شاعىم تۇسىرىلگەن.
  • تانىمال «سيمپسوندار» مۋلتسەريالى شەتەلدىڭ تۇكپىر-تۇكپىرىندە ءارتۇرلى پىكىر قالىپتاستىرعان. ماسەلەن، رەسەي مەملەكەتتىك دۋماسىنىڭ دەپۋتاتتارى اتالعان مۋلتسەريال زورلىق-زومبىلىق پەن اگرەسسيانىڭ كورىنىستەرىنە تولى، بالالار مەن اتا-انالار اراسىنداعى انتاگونيزمدى دارىپتەيتىنىن ايتقان. ال اقش-تىڭ بۇرىنعى ءبىرىنشى حانىمى باربارا بۋش ءوز سۇحباتىندا: «سيمپسوندار» – وتە ناشار تۋىندى» – دەگەن.

فوتو: www.bbc.com

«ماشا مەن ايۋ» مۋلتسەريالى رەسەيدەن تىس جەرلەردە جوعارى تانىمالدىلىققا يە بولعان. YouTube-ءتىڭ اعىلشىن تىلىندەگى ارناسىندا 4 ملن-نان استام كورەرمەنى بار. جالپى العاندا، بارلىق سەريالارىندا 40 ملرد-تان استام كورىنىس بار. از ۋاقىت ىشىندە جوعارى سۇرانىسقا يە مۋلتفيلم تانىمال Netflix ونلاين كينوتەاترىندا دا كورسەتىلەدى. ەندى جوعارىدا اتالعان مۋلتسەريالداردىڭ قاتارىنا رەسەيلىك «ماشا مەن ايۋ» دا قوسىلدى. «Times» باسىلىمى جازعانداي، «پۋتيندىك پروپاگاندامەن اينالىساتىن» مۋلتفيلم وزگە مەملەكەتتەر تەلەارناسىنان الىنىپ تاستالىنۋى مۇمكىن.

"The Qazaq Times"