ءتاج-ماحالدىڭ ءتۇسى وزگەرە باستادى

ءۇندىستاننىڭ جوعارعى سوتى ۇكىمەتكە ءتاج-ماحالدىڭ ءتۇسى وزگەرۋىنە بايلانىستى، ساۋلەت ەسكەرتكىشىن ساقتاپ قالۋدىڭ جولدارىن تابۋ ءۇشىن شەتەلدىك عالىمداردى شاقىرىپ، زەرتتەۋ جۇرگىزۋدى تاپسىردى. 17-عاسىردا اق ءمارماردان سالىنعان سارايدىڭ ءتۇسى سوڭعى ۋاقىتتا سارعىش تارتىپ، قوڭىر، سۇر تۇستەرگە اۋىسا باستاعانى بايقالعان. ءتاج-ماحالدىڭ ءتۇسىنىڭ وزگەرگەنىن دالەلدەيتىن سۋرەتتەردى سوتقا قورشاعان ورتانى قورعاۋ ماماندارى تاپسىرعان. بۇل تۋرالى ۆۆس اقپاراتتىق اگەنتتىگى جازدى.

جوعارعى سوت وكىلدەرى شەتەلدەن ماماندار تارتۋ تۋرالى شەشىمىن «ۇندىستانداعى سالا ماماندارى ءوز تاجىريبەسىن دۇرىس پايدالانباي وتىر، بولماسا ءتاج-ماحالدىڭ تاعدىرىنا نەمقۇرايلى قارايدى» دەپ ءتۇسىندىردى. الەمنىڭ ءار بۇرىشىنان ميلليونداعان تۋريستەردى تارتاتىن ساۋلەت ونەرى تۋىندىسىنىڭ ءتۇسى وزگەرۋىنە قورشاعان ورتانىڭ لاستانۋى، جاندىكتەر مەن قۇرىلىس جۇمىستارى اسەر ەتكەن دەگەن بولجامدار بار.

ءۇندىستان ۇكىمەتى وسىعان دەيىن ءتاج-ماحالعا جاقىن ورنالاسقان زاۋىتتاردى جابۋ تۋرالى شەشىم قابىلداعان بولاتىن. بىراق قوعام بەلسەندىلەرى بۇل شارانىڭ ءتاج-ماحالدىڭ ەرەكشە ءتۇسى مەن جارقىلىن ساقتاۋعا اسەرى بولماعانىن ايتادى.

ساراي الدىنداعى يامۋنا وزەنىندەگى قالدىق سۋلار مىڭداعان جاندىكتەردىڭ وسى اۋماقتى مەكەندەۋىنە جول اشقان. بۇل جاندىكتەر ەسكەرتكىش قابىرعاسىندا ءارتۇرلى داقتار قالدىرىپ، مادەنيەت مۇراسىنىڭ وزگەرىسسىز ساقتالۋىنا كەدەرگى كەلتىرىپ وتىر.

ءتاج-ماحالدى اگرا قالاسىندا اتاقتى جاقان شاح ءوزىنىڭ جارى مۇمتاز ماحالعا ارناپ سالدىرعان. 22 جىلعا سوزىلعان قۇرىلىسقا 20 مىڭ ۇستا، شەبەرلەر جۇمىلدىرىلعان. شاحتىڭ دۇنيە سالعان سۇيىكتىسىنە ارنالعان نىسان بۇگىندە «ماڭگىلىك ماحابباتتىڭ» سيمۆولىنا اينالدى. يۋنەسكو-نىڭ مادەني مۇراسىنا كىرەتىن سارايعا كۇنىنە 70 مىڭ تۋريست كەلەدى.

“The Qazaq Times”