Foto: unesco.org

Ündistannıñ Joğarğı Sotı Ükimetke Täj-Mahaldıñ tüsi özgeruine baylanıstı, säulet eskertkişin saqtap qaludıñ joldarın tabu üşin şeteldik ğalımdardı şaqırıp, zertteu jürgizudi tapsırdı. 17-ğasırda aq märmärdan salınğan saraydıñ tüsi soñğı uaqıtta sarğış tartıp, qoñır, swr tüsterge auısa bastağanı bayqalğan. Täj-Mahaldıñ tüsiniñ özgergenin däleldeytin suretterdi Sotqa qorşağan ortanı qorğau mamandarı tapsırğan. Bwl turalı VVS aqparattıq agenttigi jazdı.

Joğarğı Sot ökilderi şetelden mamandar tartu turalı şeşimin «Ündistandağı sala mamandarı öz täjiribesin dwrıs paydalanbay otır, bolmasa Täj-Mahaldıñ tağdırına nemqwraylı qaraydı» dep tüsindirdi. Älemniñ är bwrışınan milliondağan turisterdi tartatın säulet öneri tuındısınıñ tüsi özgeruine qorşağan ortanıñ lastanuı, jändikter men qwrılıs jwmıstarı äser etken degen boljamdar bar.

Ündistan ükimeti osığan deyin Täj-Mahalğa jaqın ornalasqan zauıttardı jabu turalı şeşim qabıldağan bolatın. Biraq qoğam belsendileri bwl şaranıñ Täj-Mahaldıñ erekşe tüsi men jarqılın saqtauğa äseri bolmağanın aytadı.

Saray aldındağı YAmuna özenindegi qaldıq sular mıñdağan jändikterdiñ osı aumaqtı mekendeuine jol aşqan. Bwl jändikter eskertkiş qabırğasında ärtürli daqtar qaldırıp, mädeniet mwrasınıñ özgerissiz saqtaluına kedergi keltirip otır.

Täj-Mahaldı Agra qalasında ataqtı Jaqan şah öziniñ jarı Mwmtaz Mahalğa arnap saldırğan. 22 jılğa sozılğan qwrılısqa 20 mıñ wsta, şeberler jwmıldırılğan. Şahtıñ dünie salğan süyiktisine arnalğan nısan büginde «mäñgilik mahabbattıñ» simvolına aynaldı. YUNESKO-nıñ mädeni mwrasına kiretin sarayğa künine 70 mıñ turist keledi.

“The Qazaq Times”