اقش پەن يزرايل يۋنەسكو-دان شىعاتىنىن مالىمدەدى

اقش پەن يزرايل يۋنەسكو-دان شىعاتىنىن مالىمدەدى. وسىدان بۇرىن ۋاشينگتون يۋنەسكو-نى يزرايلگە قارسى كوزقاراسى ءۇشىن ايىپتاعان بولاتىن. ەندى بۇۇ-نىڭ ءبىلىم، عىلىم جانە مادەنيەت ماسەلەرى جونىندەگى ۇيىمىنا فۋندامەنتالدى رەفورمالار قاجەت دەگەن ۇستانىمداعى اقش، يۋنەسكو-عا مۇشەلىكتەن باس تارتۋدى ۇيعاردى. بۇل تۋرالى APF اقپاراتتىق اگەنتتىگى جازدى. 

قۇرامىندا 195 ەل بار ۇيىمنان اقش وسىدان بۇرىن بۇرىنعى پرەزيدەنتى رونالد رەيگاننىڭ تۇسىندا 1984 جىلى قارجىلىق كەلىسپەۋشىلىكتەر مەن امەريكا ساياساتىنا قارسى پىكىرلەر ءۇشىن شىققان بولاتىن. دجوردج بۋشتىڭ كەزىندە 2002 جىلى يۋنەسكو-عا قايتا ورالعان اقش، 2011 جىلى باراك وباما باسشىلىعى تۇسىندا تاعى دا ۇيىمنىڭ جۇمىسىنا نارازىلىق ءبىلدىردى. ۇيىم مۇشەلەرىنىڭ ءبىراۋىزدان پالەستينانى تولىققاندى مۇشە ەسەبىندە قابىلداۋ تۋرالى شەشىمدەرى اقش-قا ۇناعان جوق. ويتكەنى امەريكا پالەستينانىڭ مەملەكەتتىلىگىن مويىندامايدى.

فرانتسيانىڭ نيۋ-يوركتەگى ەلشىسى فرانسۋا دەلاتترە جۋرناليستەرگە بەرگەن كوممەنتاريىندە، اقش-تىڭ ۇيىمنان شىعۋىنا قارجى ماسەلەسى دە تۇرتكى بولعانىن ايتادى. ۇسىنىلعان دەرەكتەرگە سايكەس، اقش-تىڭ اتالعان ۇيىمعا 550 ملن دوللار قارىزى بار. جىل سايىنعى ۇيىمعا مۇشە بولعانى ءۇشىن تولەنەتىن جارنامەن بۇل كورسەتكىش وسە بەرەدى. سونداي-اق اقش ءوزى مۇشە بولعان ۇيىمداردىڭ بارلىعىندا "امەريكا - ەڭ ءبىرىنشى" ساياساتىن ۇستانادى. ماسەلەن، اقش-تا پالەستينانى مەملەكەت ەسەبىندە مويىندايتىن بىردە-ءبىر ۇيىمعا جارنا تولەۋگە تىيىم سالاتىن زاڭ بار. سوندىقتان امەريكانىڭ ۇستانىمدارىن ەسكەرمەي، ونىڭ ساياساتىنا قارسى پىكىردەگى ۇيىمداردا امەريكا ۇزاق قالا المايدى.

دونالد ترامپ بيلىككە كەلگەلى، امەريكا يران يادرولىق كەلىسىمى جانە كليماتتىڭ وزگەرىسى بويىنشا پاريج كەلىسىمىنەن باس تارتتى. ءوزىنىڭ بۇل شەشىمدەرىن جاڭا پرەزيدەنت "امەريكانىڭ مۇددەسىنە قايشى بولعاندىقتان" دەپ تۇسىندىرگەن ەدى.

“The Qazaq Times”