Foto: politnavigator.net

AQŞ pen Izrail' YUNESKO-dan şığatının mälimdedi. Osıdan bwrın Uaşington YUNESKO-nı Izrail'ge qarsı közqarası üşin ayıptağan bolatın. Endi BWW-nıñ bilim, ğılım jäne mädeniet mäseleri jönindegi wyımına fundamentaldı reformalar qajet degen wstanımdağı AQŞ, YUNESKO-ğa müşelikten bas tartudı wyğardı. Bwl turalı APF aqparattıq agenttigi jazdı. 

Qwramında 195 el bar wyımnan AQŞ osıdan bwrın bwrınğı Prezidenti Ronal'd Reygannıñ twsında 1984 jılı qarjılıq kelispeuşilikter men Amerika sayasatına qarsı pikirler üşin şıqqan bolatın. Djordj Buştıñ kezinde 2002 jılı YUNESKO-ğa qayta oralğan AQŞ, 2011 jılı Barak Obama basşılığı twsında tağı da wyımnıñ jwmısına narazılıq bildirdi. Wyım müşeleriniñ birauızdan Palestinanı tolıqqandı müşe esebinde qabıldau turalı şeşimderi AQŞ-qa wnağan joq. Öytkeni Amerika Palestinanıñ memlekettiligin moyındamaydı.

Franciyanıñ N'yu-Yorktegi elşisi Fransua Delattre jurnalisterge bergen kommentariinde, AQŞ-tıñ wyımnan şığuına qarjı mäselesi de türtki bolğanın aytadı. Wsınılğan derekterge säykes, AQŞ-tıñ atalğan wyımğa 550 mln dollar qarızı bar. Jıl sayınğı wyımğa müşe bolğanı üşin tölenetin jarnamen bwl körsetkiş öse beredi. Sonday-aq AQŞ özi müşe bolğan wyımdardıñ barlığında "Amerika - eñ birinşi" sayasatın wstanadı. Mäselen, AQŞ-ta Palestinanı memleket esebinde moyındaytın birde-bir wyımğa jarna töleuge tıyım salatın zañ bar. Sondıqtan Amerikanıñ wstanımdarın eskermey, onıñ sayasatına qarsı pikirdegi wyımdarda Amerika wzaq qala almaydı.

Donal'd Tramp bilikke kelgeli, Amerika Iran yadrolıq kelisimi jäne klimattıñ özgerisi boyınşa Parij kelisiminen bas tarttı. Öziniñ bwl şeşimderin jaña Prezident "Amerikanıñ müddesine qayşı bolğandıqtan" dep tüsindirgen edi.

“The Qazaq Times”