اقش قىتاي قاتىناسى. اقش تايۆانمەن رەسمي ساۋدا كەلىسسوزدەرىن باستايدى،  بۇل تۋرالى اقش ساۋدا وكىلىنىڭ ورىنباسارى سارا بيانكي مالىمدەدى، دەپ جازدى BBC اقپارات اگەنتتىگى

اقش وكىلدەر پالاتاسىنىڭ سپيكەرى نەنسي پەلوسيدىڭ ساپارىنان بىرنەشە اپتا وتكەن سوڭ اقش تايۆانمەن رەسمي ساۋدا كەلىسسوزدەرىن باستايتىنىن مالىمدەدى. اقش ساۋدا وكىلدەرىنىڭ كەڭەسى كەلىسسوزدەر كۇزدەن باستالاتىنىن مالىمدەگەن. ولار ساۋدانى جەڭىلدەتۋ، تسيفرلىق ساۋدا جانە سىبايلاس جەمقورلىققا قارسى ستاندارتتار بويىنشا كەلىسسوزدەر جۇرگىزبەكشى. بۇل كەلىسسوزدەردىڭ اقش پەن قىتاي قاتىناسىنا سالقىندىعىن تيگىزەتىنى ءسوزسىز. نەنسي پەلوسيدىڭ تايۆانعا ساپارىنان سوڭ ۋشىعىپ، قىتاي تايۆان توڭىرەگىندە ەڭ ءىرى اسكەري جاتتىعۋلارىن باستاعان بولاتىن. امەريكا قۇراما شتاتتارىنىڭ ساۋدا وكىلىنىڭ ورىنباسارى سارا بيانكي: «اقش پەن تايۆان اراسىنداعى ساۋدا 2020 جىلى شامامەن 106 ميلليارد دوللاردى (88 ميلليارد فۋنت ستەرلينگ) قۇرادى، ارى قاراي دا جالعاستىرامىز. «ءبىر قىتاي ساياساتى» اياسىنا اقش ارالاسپايدى، قىتايدى مويىندايدى جانە رەسمي بايلانىستارى بار، بىراق تايۆانمەن «مىقتى بەيرەسمي» قارىم-قاتىناستى ساقتايدى، ونىڭ ىشىندە ارالعا ءوزىن قورعاي الاتىنداي قارۋ-جاراق ساتۋدى جالعاستىرادى» دەپ مالىمدەدى. بەيجىڭ تايۆاندى قىتايدىڭ تەرريتورياسى سانايدى. ال، تايۆان - ءوزىن-ءوزى باسقاراتىن ارال، ول ءوزىن ماتەريكتەن بولەك ەل رەتىندە قاراستىرادى. بەيسەنبىدە اقش-تىڭ شىعىس ازيا بويىنشا باس ديپلوماتى دەنيەل كريتەنبرينك بەيجىڭنىڭ «كۇشەيىپ كەلە جاتقان ماجبۇرلەۋ ساياساتى تايۆان بۇعازىنىڭ تىنىشتىعى مەن تۇراقتىلىعىنا قاۋىپ توندىرەتىنىن» ايتتى.

ن.بايتۇرسىن

The Qazaq Times