وقو-دا «قاراقۇرت ماۋسىمى» قايتا باستالدى

وڭتۇستىك قازاقستان وبلىسىندا كۇننىڭ اپتاپ ىستىق مەزگىلىندە ەرەكشە كوبەيەتىن قاراقۇرت ايماق تۇرعىندارىن تاعى دا الەككە سالىپ وتىر. جاز باسىنان بەرى قاراقۇرتتىڭ ۋىنان زارداپ شەگىپ، اۋرۋحاناعا تۇسكەندەردىڭ سانى - 33 ادام. بۇل كورسەتكىش وتكەن جىلمەن سالىستىرعاندا ەداۋىر ارتقانىن ەسكەرتىپ،  دابىل قاققان جەرگىلىكتى دارىگەرلەر الداعى ىستىق ماۋسىمدا قاراقۇرت قۇرباندارىنىڭ سانى كۇرت ءوسۋى مۇمكىن دەپ توپشىلايدى.

قاراقۇرت – ۋلى قارا ورمەكشى. دەنەسى – شاعىن، ەڭ ۇلكەنىنىڭ ءوزى ەكى سانتيمەتردەن اسپايدى. ءتۇسى قارا، قۇرساعىندا قىزىل داقتارى بار. بىرنەشە كوزى بارىنا قاراماستان ولاردىڭ كورۋ قابىلەتى ناشار. تەك زاتتىڭ ءتۇسى مەن قوزعالىسىن عانا اجىراتا الادى. كۇننىڭ ىستىق مەزگىلىندە ەرەكشە بەلسەندىلىگى ارتاتىن بۇل جاندىكتەر شاققان ادامعا دەر كەزىندە مەديتسينالىق كومەك كورسەتىلمەسە، ناۋقاستىڭ ءولىم قۇشۋى ابدەن مۇمكىن. قاراقۇرت شاققان كەزدەگى العاشقى بەلگىلەر: كەۋدە تۇسىنىڭ اۋىرۋى، تىنىسى تارىلۋ، اياق-قولىنان جان كەتىپ، قۇرىسىپ قالۋ، السىزدىك، باس اينالۋ، ىستىعى كوتەرىلۋ.  ادەتتە، قاراقۇرتتىڭ شاققانىن بايقاماعان ادامدار بۇل بەلگىلەردى قالىپتى سالقىن تيگىزۋگە بالاپ، دارىگەردىڭ كومەگىنە وتە كەش جۇگىنەدى.

ەرتەرەكتە قازاق حالقى جايلاۋدا قاراقۇرتتان ساقتانۋ ءۇشىن، ءۇي تىگەتىن ورىنعا قوي جاياتىن بولعان. ويتكەنى ۋلى جاندىك قويدىڭ ءيىسى شىققان مەكەننەن بويىن اۋلاق ۇستايتىن كورىنەدى.

ايماق تۇرعىندارىنىڭ كوبىن قاراقۇرت دالاداعى ۇيقى كەزىندە، قۇرىلىس جۇمىستارى ۇستىندە شاققان. سوندىقتان دارىگەرلەر تابيعات اياسىنا دەمالىسقا شىعاتىن، قۇرىلىس جۇمىسىن جۇرگىزەتىن نە دالالى جەردە ۇيىقتايتىن ادامدارعا جابىق كيىنۋدى، بارىنشا مۇقيات بولۋدى ەسكەرتەدى.

“The Qazaq Times”