"Jılqı atılğan jaz" kitabınıñ tanıstırılımı ötti. Foto: QT.

Bügin Almatıda aqın äri jazuşı Irısbek Däbeywlınıñ «Jılqı atılğan jaz» attı kitabınıñ jwrtqa tanıstırılımı jäne sonıñ ayasında birqatar ädebiet pen öner salasınıñ ökilderi arasında pikir almasu talqı jiını bolıp ötti.

Avtor jäne tuındı. Foto: QT.

Jiınğa arqau bolğan Irısbek Däbeywlınıñ «Jılqı atılğan jaz» attı eñbegi, bıltır ötken «Ruh» halıqaralıq ädebiet bayqauında, roman janrı boyınşa birinşi orın jüldege ie bolğan şığarman. Jinalısqa qazaq ädebietindegi modernizm, post-modernizmniñ negizgi ökili Didar Amantay, Ömirbek Jwmaniyazov, Qoyşıbek Mübarak, Anes Bağdat, Qanağat Äbilhayır, Toqtaräli Tañjarıq qatarlı qazaq ädebieti men öneriniñ belgili ökilderi qatıstı.

Birqatar ädebiet pen öner ökilderi jiınğa qatıstı. Foto: QT.

Qazaq ädebietindegi modernizm, postmodernizm janrınıñ negizgi ökili Didar Amantay ädebiet pen önerdiñ jaña zamandağı ömirşeñdigin arttıru üşin şığarmanıñ oqırmanğa jetkizudiñ jaña täsilderin qoldanu turalı öziniñ oyların ayta kelip: «Qazirgi «aramtamaq» baspalar aqşanı aladı, kitaptı şığarıp beredi, biraq onıñ taraluına, satıluına jauap bermeydi. Baspalar özinde basılğan kitaptıñ avtorlarına jarnama jasasa, qazirgi aqın-jazuşılar estrada men şou biznestiñ jwldızdarına kem bolmaytın edi», – dedi.

modernistik bağıttıñ ökili Didar Amantay. Foto: QT.

Bügingi qazaq ädebieti turalı sözinde jazuşı Didar Amantay: «Qazir ädebietimiz birneşe bağıtta damıp keledi. Ol solay boluğa tiis. Aytalıq, Qoyşıbek Mübarak magiyalıq bağıtta jazadı, aytalıq bir şığarmasında ükimet bir üy beredi, üyine barıp twrayın dese, ol üyi aspanğa ilinip twr deydi, soğan baspaldaq izdeydi. Bwl da ülken filosofiyalıq mäni bar şığarma dep oylaymın. Irısbek Däbey klassikalıq dästürden bastadı. Mindetti türde oğan modernistik nemese post-modernistik bağıtqa auısudıñ qajeti joq. Sebebi, qazaq ädebietine dästürli proza men poeziyada kerek. Keybireuler biri şıqsa ekinşisine orın tabılmaytınday köredi, meniñşe bäri de siyatın ülken ädebiet keñistigi bar Qazaqstanda», – dedi.

Qazaqstan Suretşiler Odağınıñ törağası Ömirbek Jwmaniyazov qazirgi kezde öner men ädebiet ökilderi arasındağı qarım-qatınastıñ üzilip qalğanın, kerisinşe  ädebiet pen öner ökilderi şığarmaşılıq oy almasıp, bir-biriniñ şığarmasına türtki bolıp otırsa bwl wlt mädenietine tıñ serpin beretinin alğa tarttı. Bwğan qosa, Ömirbek Jwmaniyazov suretşilerge jasalatın memlekettik qoldaular, stipendiya jäne tapsırıstardıñ tipti de az ekenin ayttı.

Dramaturg Anes Bağdat. Foto: QT.

Jazuşı äri aqın Irısbek Däbeywlınıñ «Jılqı atılğan jaz» attı kitabınıñ köpşilikke tanıstırılımı, bwğan deyingi qalıptasqan ürdisterden bölek jaña formatta ötti. Şaranıñ bastı erekşeligi bir ğana ädebiet emes, beyneleu öneri, dramaturgiya, ädebiettegi türli bağıttardıñ ökilderine ortaq talqı keñes boldı. Soğan qosa, qalamgerlerdiñ jazumen qatar şığarmasın auditoriyağa jetkize biludiñ täjiribeleri ortağa salındı.

 “The Qazaq Times”