24 qazan – Kitaphanaşılar merekesi qwttı bolsın!

Bügin Qazaqstanda eldegi 4 mıñğa tarta kitaphanada 5.7 mln oqırmanğa bilim-izetimen qızmet körsetip jürgen 10 mıñ kitaphanaşınıñ käsibi merekesi.

Eki jıl aldın, 2022 jılı 18 qazandağı ükimet qaulısımen «24 qazan – Kitaphanaşılar küni» bolıp bekitilgen. Adamzattıñ aqıl-oyına qoyma bolıp, ar-ojdan, parasatın saqtap-wsınıp otırğan asa qadirli mädeni orda qızmetkerleriniñ eñbegi erekşe.

Bilim mekeni sanalatın mekemeniñ dilmar tınıştığı janğa daua, oyğa dem beredi. Balalarğa ilim arttıratın, eresekter kündelikti tirliktiñ äure-sarsañınan bir uaq oqşaulanıp, ruhani azıqtanatın orın. Qazaq qalamgeri Ğabit Müsirepovtiñ «Kitap degenimiz – aldıñğı wrpaqtıñ artqı wrpaqqa qaldırğan ruhani ösieti. Kitap oqudan tıyılsaq, oy oylaudan da tıyılar edik» degen pikirin körnekti jazuşı Äbiş Kekilbaev «Adamdı adam etken – Kitap, adamzat etken – Kitaphana» dep tüyindegen. Bwdan artıq bağa, anıqtama tabu qiın.

Wlttıq statistika byurosınıñ mälimetinşe, Qazaqstan oqu orındarındağı mekemelerdi eseptemegende, öz aldına jwmıs istep twrğan 4 mıñğa tarta kitaphanağa 5.7 mln oqırman baradı, ondağı 1.6 millionı bala.

Bıltır kitaphanaşı memleket qorındağı (qaytalanuı mümkin) 66 million kitaptı qolğa berip, qaytarıluın qadağalağan.

Elimizde 3924 kitaphana bar, taratıp aytqanda, 3909 kitaphana memleket menşiginde, 15-si jekege qaraydı. Olardıñ 14%-ı qalada, 86%-ı auıldıq jerlerde. Onıñ 3 877-si ämbebap, yağni köpşilikke arnalğan, 260-qa juığı balalar jäne jasöspirimderge arnalğan, 20-sı ğılımi jäne tağı 20-sı ğılımi bağıtta jwmıs isteydi. Eñ köbi Türkistan (400-dey) oblısında, eñ azı Astana (23) qalasında.

Respublikadağı 4 mıñğa tarta kitaphananıñ oqu zalı jalpı sıyımdılığı 42 mıñ oqırmanğa şaqtalğan. Bir ökiniştisi, paydalanuşılarğa arnalğan komp'yuterler sanı 5 mıñğa jetpeydi. Auıldı jerlerdegi kitaphanalardıñ 45%-ı (1515 nısan) internetke qosılmağan.

Kitaphana salasındağı 10 mıñnan asa qızmetkerdiñ 21%-ı jastar. Osı maqsatta keyingi oqu jıldarı segiz universitetke memlekettik tapsırıs negizinde «Kitaphana isi, aqparattardı öñdeu jäne mwrağat isi» mamandığına 100 şaqtı grant bölinip keledi.

Kitaphanaşınıñ isi kelgen-ketken oqırmandı tirkep, qağaz toltıru ğana emes, olar wdayı mädeni jañalıqtardan habardar bolıp otıradı. Kündelikti aqparat ağının qadağalaydı. Mädeni-qoğamdıq taqırıpta arnayı körmeler äzirleydi, oqırmanın tileuine jetkizedi, tanımdıq is-şaralar ötkizedi. Sırttay iş pıstırarlıq körinetin, şınında paydalı şarağa oquşı, körermen tartu da qolında äkimşilik resursı joq kitaphanaşığa köp salmaq tüsiredi.

Almatı qalasındağı otızdan asa kitaphananıñ köbi jañardı, üşeuiniñ esigi täulik boyı aşıq. Kitaphanaşılar üş auısımmen qızmet etedi.

QT redakciyası kitaphana älem kitaphanalarındağı 20 mlrd kitaptıñ 73 millionın baptap-kütip otırğan qazaqstandıq kitaphanaşılardı käsibi merekesimen şın jürekten qwttıqtaydı. Jeke twlğa retinde adami bolmısqa qajet bar baqıttı, käsibi maman esebinde örleu-tabıs tileymiz!

The Qazaq Times