Bügin wlttıñ wlağattı üş nar twlğasınıñ tuğan küni

Bügin, 28 qırküyek, qazaq ädebietiniñ ğana emes, twtas ruhani ömiriniñ wlağattı esimderi Mwhtar Äuezov, Şerhan Mwrtaza, Oralhan Bökey sındı twlğalarınıñ tuğan küni. Abay bastağan wlı köştiñ nar jolında öşpes izderin qaldırğan wltınıñ wlı perzentteri osı küni ömir esigin aşqan. Sondıqtanda 28 qırküyek qazaq ruhaniyatınıñ eleuli küni boluğa tatidı.

Osıdan tura 120 jıl bwrın Abaydı tuğan mekende ömir esigin aşqan wlı qalamger Mwhtar Äuezov, wltınıñ ädebieti men mädenietine teñdessiz üles qosıp, wlt ağartu jolında sübeli eñbegimen wlı şıñ bolıp qaldı. Mwhtar Äuezov turalı, onıñ eñbekteri men ğwmırı turalı qaytalap aytıp jatpastan, biz, tağı bir tuğan kün iesi qalamger Oralhan Bökeydiñ Äuezov turalı aytqan mına bir sözin bergendi jön körip otırmız: «HH ğasırdağı qazaq ädebietinde bir-aq alıp suretker bar. Ol – Äuezov. Ol – teñiz bolsa, biz – kölşik. Ol – bäyterek bolsa, biz – mañayındağı balapan. Asılında, jalğız aşı şındıqtı moyındağanımız abzal. Mwqañ bizsiz... bir özi bolsa da jalğızsıramas edi», – deydi O. Bökey.

Qazaq ädebietiniñ üdire alğa basqan däuiriniñ ökilderi Şerhan Mwrtaza men Oralhan Bökey de ädebiet tarihında suretkerlikterimen, söz zergerliginiñ qaytalanbas qoltañbasımen erekşelenedi. Olardıñ qalamınan tuğan şığarmalar küni büginge deyin, tipti wzaq bolaşaqtada wltınıñ wrpaqtarına joldas bolatını aydan da anıq.

Wlt köşine nar twlğalardı tudırğan 28 qırküyek ataulı künderdiñ birine aynalıp, eñseli eldiñ bügingi küni üşin jeldiñ ötinde, künniñ betinde twrıp, wmıtılmas şığarmalardı qaldırğan qalamgerlerdi memlekettik deñgeyde eske alınıp jatsa qwba-qwp edi. Biraq bwl künniñ eskerusiz qaluı qay bir jandı da qınjıltarı anıq. Bir ğana Äuezovtıñ ömirge kelgenine 120 jıl toluınıñ atalmay ketui, qazaq aldına da, Abay men Mwhañ aldında da bügingi elge sın bolmas pa!

“The Qazaq Times”