وتكەن كۇنى، 27 مامىر كۇنى قازاقستاندا 272 ادامنان كوروناۆيرۋس انىقتالدى. كوروناۆيرۋس جۇقتىرعاندار سانى جاعىنان ەلدە الدىڭعى ورىنداردا تۇرعان استانادا – 56, قاراعاندى وبلىسىندا – 49, الماتى قالاسىندا – 25 ادامنان تابىلعان.  

دەرتكە شالدىققان ادامداردىڭ سانى 9,5 مىڭنان استى، ناقتىراعى 9576 كەيس. الايدا ۆەدومستۆو دەرەگىنە قاراعاندا، اۋىرعان ناۋقاستاردىڭ جارتىسىنا ءسال جەتپەيتىنى، 4768-ءى ساۋىعىپ، ۇيىنە شىعارىلعان كورىنەدى.  دەنساۋلىق ساقتاۋ مينيسترلىگىنىڭ مالىمەتىنشە, تاۋلىكتىك ءوسىم 2,9% مولشەرىندە بايقالعان.

قازىرگى تاڭدا سولتۇستىك جانە شىعىس قازاقستان وبلىستارىنان باسقا بارلىق وڭىردە كەيستەر سانى جۇزدەن اسىپ كەتكەن. ءتىپتى الدى الماتى قالاسىندا 2,3 مىڭ، استانادا 1,8 مىڭنان اسسا، ال اتىراۋ وڭىرىندە مىڭعا جۋىقتاعان.

ساۋىردە دەنساۋلىق ساقتاۋ مينيسترلىگى شارىقتاۋ شەگىنە جەتتىك دەگەنىمەن، ءبىر اي وتپەي مىڭداعان كەيسكە وسكەن رەەسترگە بايلانىستى كەشە پرەزيدەنت توقاەۆ «شارىقتاۋ شەگىنەن وتتىك» دەپ مالىمدەدى. دەسە دە مەديتسينا سالاسىنىڭ ساراپشىلارى كاسىپكەرلەر مەن تۇرعىنداردىڭ كارانتين تالابىنا نەمقۇرايلى  قاراۋىنان الداعى ۋاقىتتا ماسەلە ۋشىعىپ، دەرت وشاعى ءورشىپ كەتۋى مۇمكىن ەكەنىن ايتىپ دابىل قاعۋدا.

تومەندە كورسەتىلگەن ساندىق كورسەتكىشتەر كوروناۆيرۋستىڭ گەولوكاتسياسى. جاقشانىڭ ىشىندەگى جيىنتىق ساندار وتكەن كۇنى بەلگىلى بولعان كەيستەر.

  • الماتى قالاسى – 2378 (+25)
  •  استانا قالاسى – 1820 (+56)
  • اتىراۋ وبلىسى – 959 (+15)
  • قاراعاندى وبلىسى – 754 (+49)
  • شىمكەنت قالاسى – 730 (+17)
  • باتىس قازاقستان وبلىسى – 493 (+21)
  • جامبىل وبلىسى – 362 (+4)
  • تۇركىستان وبلىسى – 354 (+17)
  • قىزىلوردا وبلىسى – 324 (+20)
  • الماتى وبلىسى – 319 (+14)
  • اقتوبە وبلىسى – 304 (+22)
  • پاۆلودار وبلىسى – 192 (+1)
  • ماڭعىستاۋ وبلىسى – 177 (+1)
  • اقمولا وبلىسى – 149 (+2)
  • قوستاناي وبلىسى – 136 (+5)
  • شىعىس قازاقستان وبلىسى – 74 (+1)
  • سولتۇستىك قازاقستان وبلىسى – 51 (+2)

بۇگىنگى تاڭدا كوروناۆيرۋستىڭ كەسىرىنەن قايتىس بولعاندار قاتارى 37-گە جەتكەن. الايدا ىندەتتىڭ بار-جوعىنا بايلانىستى ەلدىڭ ءىشى ەكىگە جارىلعان. ۆيرۋستىڭ بارىنا سەنبەيتىن ازاماتتار دا از ەمەس. مۇنى كوبى دەنساۋلىق ساقتاۋ ءمينيسترىنىڭ باق وكىلدەرىنە كارانتين ايماعىنا جولاتپاۋ جونىندەگى «قاتە شەشىمى» مەن اقپاراتتاندىرۋدىڭ جەتكىلىكسىزدىگىمەن، سونداي-اق وڭىرلەر مەن مەگاپوليستەردەگى جەرگىلىكتى قوعامدىق دەنساۋلىق ساقتاۋ باسقارمالارىنىڭ جۇمىسىنداعى شيكىلىگىنەن دەپ سانايدى.

"The Qazaq Times"