«قازاقشا سويلە!»: كۋرەر تۇتىنۋشىعا دورەكىلىك تانىتپاعانىن ايتتى. Magnum’نىڭ بويكوت باستاماسىنان كەيىنگى مالىمدەمەسى

بىرەر كۇننەن بەرى الەۋمەتتىك جەلىلەردە الماتى قالاسىندا Magnum كۋرەرى تۇتىنۋشىنىڭ شاعىم-پىكىرىنەن كەيىن جۇمىستان قۋىلعانى قىزۋ تالقىلانىپ جاتىر. QT تاراپتاردىڭ پىكىرىن پارىقتاپ كوردى.

بۇل وقيعا قوستىلدى قازاق قوعامىن ۇستانىم تۇرعىسىنان جارماق تاراپتارعا توپتادى. ساراپشىلار مەن ءتىل جاناشىرلارىنىڭ تەرەڭ تالداما-پايىمى ءتىل ماسەلەسىنىڭ وزەكتىلىگىن اشا ءتۇسىپ، ەلدىك-بىرلىك جاعىنان الاڭداتتى.

تۇتىنۋشى شاعىمى

القيسسا، قازنەت تارماقتارىندا تاراعان اقپاراتتارعا قاراعاندا، العاش اسىلحان ءالىمحانۇلى ەسىمدى جەلى قولدانۋشى Threads پاراقشاسىندا كۋرەردىڭ مامىلەسىن سىناپ جازبا جاريالاعان. ول Magnum ساۋدا جەلىسىنەن العىزعان تاپسىرىسىن قابىلداردا كۋرەردىڭ «قازاقشا سويلە!» دەگەنىن دورەكىلىك دەپ جازادى.  

كەيىننەن تۇتىنۋشى وزىنە تاپسىرىستاردى جەتكىزۋگە جاۋاپتى Magnum E-Commerce Kazakhstan جشس ديرەكتورى شىعىپ، كۋرەردى جۇمىستان ءبىرجولا شىعارىلعانىن حابارلاعانى تۋرالى فوتوسكرينىن ءبولىستى.

دەرەككوز: Threads جەلىسى

ەركىننىڭ شىندىعى

QT جاعدايدىڭ ءمان-جايىن تولىق بىلمەك نيەتپەن تاراپتارعا حابارلاسىپ كوردى. كۋرەر بولىپ ىستەگەن ەركىن ءتىلشى سۇراعىنا: 

– بۇل ءساۋىردىڭ باسىندا الماتى قالاسىندا بولدى. تاپسىرىس بەرۋشىنى راستاۋ ءۇشىن اتى-ءجونىن سۇرادىم ورىسشا جاۋاپ بەردى. قازاقشا سويلەي بەرسەڭىزشى دەدىم بار بولعانى، – دەدى.

ول تۇتىنۋشىعا دورەكىلىك كورسەتپەگەنىن، سىپايى بولعانىن جەتكىزدى.

– دورەكىلىك تانىتقام جوق. تانىمايتىن كىسىگە قالاي دورەكى بولام. قازاقشا سويلەي بەرسەڭىزشى دەدىم بولدى ءبىر-اق اۋىز سوزبەن، – دەدى ول.

ءبىر جارىم جىل كۋرەر بولىپ ىستەگەن ەركىن جۇمىستان بوساعانىن وقيعانىڭ ەرتەڭىندە ەستىگەن. كومپانيانىڭ كولىگىن ايداپ جان باققان، وتباسىلى. 38 جاستاعى تالدىقورعاننىڭ تۋماسىنىڭ سوزىنشە، جۋىردا جۇبايى بوسانادى.

«جۇرگەن جەرىمدە قازاقشا سويلەۋگە ۇگىتتەپ جۇرەمىن. ەشتەڭەگە تاڭعالمايتىن بولىپ كەتتىك قوي. كوشەدە ورىسشا سويلەپ، ويناپ جۇرگەن قازاق بالالارىنا دا ايتام كەيدە» دەيدى ول ەلدەگى ءتىل ماسەلەسىنە بەيجاي قاراي المايتىنىن ءبىلدىرىپ.

بويكوتتان كەيىن ءۇن قاتقان Magnum 

وقيعادان بىرنەشە كۇن وتسە دە نە سايتىندا، نە الەۋمەتتىك جەلىلەردە رەسمي تۇسىنىكتەمە بەرمەگەن كومپانياعا قوعام قىسىمى ارتتى. 

4 ءساۋىر تالقى كۇش الىپ، سەنبى كۇنى بويكوت باستاماسى بەلەڭ الا باستادى. ءساۋىردىڭ 5-ءى QT ءتىلشىسى Magnum Cash & Carry رەسمي وكىلدەرىنە، PR قىزمەتىنە حابارلاسۋعا تىرىسقانىمەن، جاۋاپ الا المادى. Magnum ءباسپاسوز حاتشىسى ناتاليا كۋنينا نە قوڭىراۋعا، نە جەلىدەگى سۇراقتارعا ءلامميم دەمەدى.

كومپانيانىڭ Call ورتالىعىنا قوڭىراۋ سوققاندا وپەراتور قولىنا باسشىلىق بەرگەن ءماتىندى وقىپ بەردى. رەسمي جاۋاپ ورنىنا ۇسىنعان بۇل اقپاراتتىڭ قازاقشا نۇسقاسىندا قاتە كوپ. كالكا اۋدارمادان تۋعانى بايقالادى، ساۋاتتى رەداكتوردىڭ الدىنان وتپەگەنى انىق بىلىنەدى. 

«ءبىز ءوز جۇمىسىمىزدا قازاقستان رەسپۋبليكاسىنىڭ زاڭناماسىن باسشىلىققا الامىز.

مەملەكەتىمىزدىڭ كونستيتۋتسياسىنا سايكەس: «مەملەكەتتىك ۇيىمداردا، جەرگىلىكتى ءوزىن-ءوزى باسقارۋ ورگاندارىندا، جانە ۇيىمداردا ورىس ءتىلى رەسمي تۇردە قازاق تىلىمەن تەڭ قولدانىلادى».

ءبىز ادامداردى ۇلتىنا قاراي بولمەيمىز جانە بارلىق ساتىپ الۋشىلارىمىزعا بىردەي قامقورلىق جاسايمىز. ءبىز جۇمىسىمىز بارىسىندا ساتىپ الۋشىلاردى تاربيەلەمەۋىمىز جانە ولارعا مادەني نەمەسە باسقا دا دۇنيەتانىمدىق تالاپتار قويماۋىمىز كەرەك.

سوندىقتان ءبىز قىزمەتكەرىمىزدى سويلەسۋ ءتىلى ءۇشىن ەمەس، ساتىپ الۋشىمەن قارىم-قاتىناس جاساۋ مانەرى، جۇمىس ورنىنداعى لاۋازىمدى اسىرا سىلتەپ پايدالانعانى ءۇشىن جۇمىستان بوساتتىق»، – دەپ وقىدى ەكى وپەراتور دا بىردەي ءماتىندى ەجەكتەپ. 

الايدا Magnum Cash & Carry جاريا رەسۋرستارىنىڭ ەشبىرىندە كوپشىلىك نازارىنا جازباشا نەمەسە ۆيدەو-اۋديو رەاكتسيا بىلدىرمەدى.

بويكوت باستاماسى جەلىدە جاپپاي قولداۋ تاپقان سوڭ 5 ءساۋىردىڭ تۇنىندە ساعات 22:00-دە Magnum اككاۋنتتارىنا رەسمي مالىمەت تاراتتى.

«قۇرمەتتى اعايىن! 

الەۋمەتتىك جەلىدە Magnum كومپانياسى كۋرەردى ءتىل ماسەلەسى ءۇشىن جۇمىستان شىعاردى دەگەن اقپارات تاراۋدا. الايدا بۇل شىندىققا جاناسپايدى. جاعدايدىڭ ءمان-جايى مۇلدەم باسقاشا. 

كۋرەردىڭ جۇمىستان بوساتىلۋ سەبەبى — كليەنتتەرمەن ءبىر ەمەس، ەكى ەمەس، بىرنەشە دۇركىن دورەكى سويلەسىپ، قىزمەت كورسەتۋ ادەبىن قايتالاپ بۇزۋى.

ءبىز وعان ءوز قاتەلىگىن تۇزەتۋگە جەتكىلىكتى ۋاقىت مۇمكىندىك بەردىك — ەسكەرتۋ جاسادىق، سىناق مەرزىمىنە اۋىستىردىق. 

الايدا، وكىنىشكە قاراي، سول ۋاقىت ىشىندە دە ادەبى وزگەرمەي، تاعى دا تۇتىنۋشىمەن ارازداسىپ قالدى. كەلەڭسىز وقيعالار قايتالاندى. 

ارتىنان شاعىم ءتۇسىپ جاتتى. سودان كەيىن، امال جوق، ەڭبەك شارتىن بۇزۋعا تۋرا كەلدى. 

ءبىز ءۇشىن قىزمەت كورسەتۋ مادەنيەتى وتە ماڭىزدى. سىپايىلىق پەن ادامعا قۇرمەت ءبىرىنشى ورىندا.

كۋرەردىڭ جۇمىستان كەتۋىنە ءتىل ەمەس، مىنەز-قۇلقى سەبەپ بولدى – مۇنى ناقتى ايتىپ وتكىمىز كەلەدى. 

ءبىز انا تىلىمىزگە، ياعني مەملەكەتتىك تىلگە ۇلكەن قۇرمەتپەن قارايمىز.

بۇل جاعداي مەملەكەتتىك تىلگە قاتىستى بولىپ قابىلدانعانىنا وكىنىش بىلدىرەمىز.

قۇرمەتپەن، تالگات.

Magnum كومانداسى».

Magnum’نىڭ جەلىدە كوممەنتاري جازۋ مۇمكىندىگىن شەكتەگەن جازباسى. فوتو-سكرين: Instagram

Magnum E-Commerce Kazakhstan جشس كۋرەرىن ءتىل ماسەلەسىنە ەمەس، قىزمەت ادەبىنە قاتىستى بوساتقانىن مالىمدەدى. كۋرەرگە بۇرىن دا بىرنەشە مارتە ەسكەرتۋ بەرىلگەنىنە ەش ايعاق ۇسىنباعان. تۇتىنۋشى-كۋرەر اراسىندا بولدى دەگەن دورەكىلىك جاعدايىنا دالەل جاريالانبادى. جەلى جۇرتىنىڭ باسىم بولىگى كۋرەردىڭ «قازاقشا سويلە!» دەگەن ەسكەرتپەسى دورەكى ايتىلعاننىڭ وزىندە بىردەن جۇمىستان قۋىپ، قاتاڭ شارا قولدانىلعانىنا نارازى. ءتورت جىل الدىن تىركەلگەن كومپانيادا قازىر جۇزدەگەن كۋرەر بار. Statsnet دەرەگىنشە، بىلتىرعى قارجىلاي ءتۇسىمى 155 ملرد تەڭگەدەن اسقان.  

كۋرەردى بوساتۋدى ماسەلەنىڭ شەشىمى كورگەن Magnum E-Commerce Kazakhstan جشس-نىڭ ەكى قۇرىلتايشىسى بار. ولار – Magnum Cash&Carry جانە Kaspi ماگازين كومپانيالارى. 

بۇعان دەيىن 200 فيليالى بار Magnum تۇبىرتەكتەرىن تەك 15 جىلدان كەيىن بەلسەندى تۇتىنۋشىلار مەن ءتىل جاناشىرلارىنىڭ تالاپ-ارىزىنان كەيىن قازاقشالاعان. 

قازاقستان قوعامىندا مەملەكەتتىك ءتىل تۋرالى زاڭ قابىلداۋ تالابى كۇشەيىپ كەلەدى. بىراق ءورىستىلدى شەنەۋنىكتەرى كوپ قازاق بيلىگى ءتىل تاقىرىبىنا اسا ساق، قازاق ءتىلىنىڭ زاڭناما شەڭبەرىندە قولدانۋىنا سىلبىر. كەيبىر ساراپشىلار قازاق ءتىلىنىڭ زاڭدى قۋاتىن نىعايتۋعا بيلىكتىڭ ساياسي جىگەرى ءالسىز ەكەنىن سىنايدى. 

The Qazaq Times