ەلوردا اكىمدىگىنىڭ ءباسپاسوز قىزمەتى سانيتارلىق نورمالاردى ساقتاماعان جاعدايدا قوعامدىق كولىكتەر قوزعالىسى توقتاتىلۋى مۇمكىن ەكەنىن حابارلادى. كۇشەيتىلگەن تالاپقا سايكەس، جولاۋشىلار مەديتسينالىق بەتپەردە تاقپاسا، قوعامدىق كولىككە كىرگىزىلمەيدى.

كولىك باقىلاۋ قىزمەتىنىڭ قىزمەتكەرلەرى كۇن سايىن رەيد جاساپ، اۆتوبۋس جۇرگىزۋشىلەرى مەن جولاۋشىلارىنىڭ سانيتارلىق ەرەجەلەردى قانشالىقتى ساقتاپ جۇرگەنىن تەكسەرىپ ءجۇر. تاياۋدا عانا 1 اۆتوپارك جۇرگىزۋشىسىنىڭ كوروناۆيرۋس جۇقتىرعانى انىقتالىپ، كارانتينگە جابىلدى.

قوعامدىق كولىك قىزمەتى 12 مامىردان باستاپ قىزمەتىن قايتا باستادى. قالا ىشىندەگى اۆتوبۋستار كۇندەلىتى ساعات 06.00-22.00 اراسىندا جۇرەدى. قالا سىرتىنا قاتىنايتىن اۆتوبۋستار قىزمەتى ەكىنشى كەزەڭدە ىسكە قوسىلادى.

ەلوردادا سانيتارلىق نورمالاردىڭ ساقتالماۋىنا بايلانىستى كارانتين شارالارى كۇشەيتىلۋى ىقتيمال. استانا اكىمدىگىنىڭ حابارلاماسى بويىنشا، سانيتارلىق نورمالاردى بۇزعان بىرقاتار نىساندار جابىلعان، اتاپ ايتقاندا، قۇرىلىس كومپانيالارى، ازىق-تۇلىكتىك ەمەس دۇكەندەر، مەيرامحانالار، ءدامحانالار (وزىمەن الىپ كەتۋ قىزمەتىن قوسىپ، جۇمىس ىستەگەندەر) جانە ت.ب. نىساندار قاتاڭ سانيتارلىق-ەپيدەميولوگيالىق نورمالاردى تۇگەل ساقتاعان جاعدايدا عانا اشىلماق.

ادامدار ءالى دە قورعانىپ جۇرۋگە مىندەتتى، ماسكا كيۋ ءتارتىبى بارلىق جەردە ساقتالۋى كەرەك، ەگەر الدەبىرەۋ قاتاڭ سانيتارلىق نورمالاردى ۇستانباسا، قالادا قايتادان قاتاڭ كارانتين ەرەجەلەرى ورناتىلادى، جانە قازىرگىدەي باسەڭدەتۋ شارالارى الىنىپ تاستالادى. ءبىزدىڭ قالىپتى ومىرگە تەزىرەك قايتا ورالۋىمىز وزىمىزگە تىكەلەي بايلانىستى، – دەدى استانانىڭ دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا.

وتكەن اپتادا COVID-19 ۆيرۋسىن جۇقتىرعاندار سانى كۇرت كوبەيۋىنە بايلانىستى بۇگىن  اقتوبەدە كارانتيندىك شارالار كۇشەيگەنى حابارلاندى. وسى سەبەپتى ساۋدا ءۇيى، مال-كولىك-قۇرىلىس بازارلارى، بالا-باقشا، كوپشىلىك جينالاتىن ويىن-ساۋىق ورىندارى، ءتىپتى ازىق-تۇلىك بازارلارى دا ازىرگە جۇمىس ىستەمەيتىن بولدى. مامانداردىڭ سوزىنشە، ازاماتتار سانيتارلىق تالاپتارعا نەمعۇرايلى قاراۋىنان اۋرۋلار سانى ارتىپ، شەكتەۋلەر قاتاڭداۋى مۇمكىن.

بۇگىنگى تاڭدا قازاقستاندا قاۋىپتى كەسەلمەن اۋىرعان ناۋقاستاردىڭ سانى 6440-قا جەتىپ، ونىڭ جارتىسى دەرتىنەن ساۋىعىپ، ۇيىنە جىبەرىلگەن. وكىنىشكە قاراي، 34 ازامات اۋرۋدان ايىعا الماي قايتىس بولعان.

"The Qazaq Times"