Almatı avtobusındağı jolauşı. Foto: Daniyar Musirov / vlast.kz

Elorda äkimdiginiñ baspasöz qızmeti sanitarlıq normalardı saqtamağan jağdayda qoğamdıq kölikter qozğalısı toqtatıluı mümkin ekenin habarladı. Küşeytilgen talapqa säykes, jolauşılar medicinalıq betperde taqpasa, qoğamdıq kölikke kirgizilmeydi.

Kölik baqılau qızmetiniñ qızmetkerleri kün sayın reyd jasap, avtobus jürgizuşileri men jolauşılarınıñ sanitarlıq erejelerdi qanşalıqtı saqtap jürgenin tekserip jür. Tayauda ğana 1 avtopark jürgizuşisiniñ koronavirus jwqtırğanı anıqtalıp, karantinge jabıldı.

Qoğamdıq kölik qızmeti 12 mamırdan bastap qızmetin qayta bastadı. Qala işindegi avtobustar kündeliti sağat 06.00-22.00 arasında jüredi. Qala sırtına qatınaytın avtobustar qızmeti ekinşi kezeñde iske qosıladı.

Elordada sanitarlıq normalardıñ saqtalmauına baylanıstı karantin şaraları küşeytilui ıqtimal. Astana äkimdiginiñ habarlaması boyınşa, sanitarlıq normalardı bwzğan birqatar nısandar jabılğan, atap aytqanda, qwrılıs kompaniyaları, azıq-tüliktik emes dükender, meyramhanalar, dämhanalar (özimen alıp ketu qızmetin qosıp, jwmıs istegender) jäne t.b. Nısandar qatañ sanitarlıq-epidemiologiyalıq normalardı tügel saqtağan jağdayda ğana aşılmaq.

Adamdar äli de qorğanıp jüruge mindetti, maska kiyu tärtibi barlıq jerde saqtaluı kerek, eger äldebireu qatañ sanitarlıq normalardı wstanbasa, qalada qaytadan qatañ karantin erejeleri ornatıladı, jäne qazirgidey bäseñdetu şaraları alınıp tastaladı. Bizdiñ qalıptı ömirge tezirek qayta oraluımız özimizge tikeley baylanıstı, – dedi astananıñ densaulıq saqtau basqarmasınıñ basşısı Säule Qisıqova.

Ötken aptada COVID-19 virusın jwqtırğandar sanı kürt köbeyuine baylanıstı bügin  Aqtöbede karantindik şaralar küşeygeni habarlandı. Osı sebepti sauda üyi, mal-kölik-qwrılıs bazarları, bala-baqşa, köpşilik jinalatın oyın-sauıq orındarı, tipti azıq-tülik bazarları da äzirge jwmıs istemeytin boldı. Mamandardıñ sözinşe, azamattar sanitarlıq talaptarğa nemğwraylı qarauınan aurular sanı artıp, şekteuler qatañdauı mümkin.

Bügingi tañda Qazaqstanda qauipti keselmen auırğan nauqastardıñ sanı 6440-qa jetip, onıñ jartısı dertinen sauığıp, üyine jiberilgen. Ökinişke qaray, 34 azamat aurudan ayığa almay qaytıs bolğan.

"The Qazaq Times"