فوتو: .pravda.ru

بۇۇ بانگلادەشتىڭ 800 مىڭعا جۋىق روحيندجا مۇسىلماندارىنا ارناپ، الەمدەگى ەڭ ۇلكەن بوسقىندار لاگەرىن سالۋ تۋرالى جوسپارى قاۋىپتى ەكەنىن ايتتى. بۇكىلالەمدىك ۇيىم بۇل ءارتۇرلى قاۋىپتى ىندەتتەردىڭ تەز تارالۋىنا قولايلى جاعداي تۋدىرادى دەپ قاۋىپتەنەدى. بۇل تۋرالى APF اقپاراتتىق اگەنتتىگى جازدى. 

ميانمادا 25 تامىزدا باستالعان قانتوگىستەردەن باس ساۋعالاپ كەلگەن جارتى ميلليوننان ارتىق روحيندجا مۇسىلماندارى بانگلادەشتەگى بوسقىندار ماسەلەسىن ۋشىقتىرا تۇسكەن بولاتىن. بۇۇ گۋمانيتارلىق كومەكتى جولعا قويىپ، بانگلادەشكە قولداۋ كورسەتۋگە ۋادە بەرگەن.

كوكس بازارعا جاقىن ماڭداعى كۋتۋپالونگ مەكەنىندە قۇرىلىسى جوسپارلانعان بوسقىندار لاگەرى 1,2 گا اۋماقتى الىپ جاتىر. ول 300 مىڭعا جۋىق بوسقىندارعا پانا بولىپ وتىرعان ۋگانداداعى بيدي بيدي جانە كەنياداعى دادااب لاگەرلەرىن جولدا قالدىرىپ، الەمدەگى ەڭ ۇلكەن بوسقىندار لاگەرى بولۋى مۇمكىن.

بۇۇ-نىڭ داكاداعى كوورديناتورى روبەرت ۋوتكينس وسىنشاما كوپ ادامدى ءبىر ورىنعا جيناۋدىڭ جۇقپالى اۋرۋلاردىڭ تەز تارالۋىنا ايتارلىق ىقپال ەتەتىنىن ايتادى. ول: ء"بىر لاگەرگە قاراعاندا، وسىنداي بىرنەشە باسپانالارعا ءبولۋ حالىقتىڭ دەنساۋلىعى مەن ءومىر ءسۇرۋ ساپاسىن باقىلاۋعا ۇلكەن سەپتىگىن تيگىزەدى", - دەگەن پىكىر ءبىلدىردى. بۇۇ وكىلىنىڭ ايتۋىنشا، قازىردىڭ وزىندە 331 مىڭ روحيندجا مۇسىلمانى وزدەرىنە باسپانا قۇرىپ ۇلگەرگەن.

وسىدان بۇرىن بانگلادەش روحيندجا مۇسىلماندارىن وزگە ارالعا كوشىرۋ تۋرالى باستاما كوتەرىپ ەدى. دەگەنمەن روحيندجالىق مۇسىلماندار ادام ومىرىنە ۇلكەن قاۋىپ توندىرەتىن تسيكلونداردىڭ بولۋى سەبەبىنەن باشان چار ارالىنا كوشۋدەن باس تارتتى.

وسى اپتادا بانگلادەش كۇنىنە 4000-5000 ادام شەكارا اسىپ كەلىپ جاتقانىن حابارلادى. ساراپشىلار تاعى 100 مىڭ مۇسىلمان بيرمادا بانگلادەش جاعالاۋىنا جول تارتۋ كەزەگىن كۇتىپ وتىر دەگەن بولجام جاسايدى.

“The Qazaq Times”