ەۋروپا تاۋەلدىلىگى: رەسەي مۇناي-گازىنا شەكتەۋ قويۋ قيىنعا سوعۋدا

باتىس رەسەي مۇنايىن ساتىپ الۋعا توسقاۋىل قوياتىن بولسا، رەسەي ەۋروپاعا جەتكىزىلىپ جاتقان گازىن دا توقتاتىپ تاستايتىنىن مالىمدەدى. وسى جونىندە ايتقان رەسەي ۆيتسە-پرەمەرى الەكساندر نوۆاك: «رەسەي مۇنايىنان باس تارتۋ جاھاندىق نارىققا كۇيرەتۋشى اپات الىپ كەلەدى»، – دەگەن.

وزدەرىڭىزگە بەلگىلى بولعانداي، رەسەيدىڭ ۋكرايناعا باسىپ كىرۋىنە بايلانىستى اقش وزدەرىنىڭ سەرىكتەرىن ورىس مۇنايىنان باس تارتۋعا شاقىرىپ جاتقان بولاتىن. الايدا، جاھاندىق نارىقتا رەسەي مۇناي مەن گازىنىڭ وزىندىك ورىنى بار. قازىردىڭ وزىندە رەسەي شيكى مۇناي بويىنشا الەمدە ەكىنشى ورىندى، ال تابيعي گاز بويىنشا الەمدە ءبىرىنشى تۇرعان مەملەكەت.

نوۆاكتىڭ ايتىسىنشا، رەسەي مۇنايىنا شەكتەۋ قويىلعان جاعدايدا جاھاندىق ەنەرگيا  نارىعىندا باعالار شارىقتاپ، قازىرگىدەن ەكى ەسەگە دەيىن ءوسىپ كەتۋى مۇمكىن. ونىڭ ەسەبىنە سەنسەك مۇنايدىڭ ءار باررەلى 300 اقش دوللارىنا تەڭ بولۋى مۇمكىن ەكەن.

اقش-تىڭ رەسەي مۇنايىنان باس تارتۋ نەمەسە توسقاۋىل قويۋ جوسپارى اۋقىمدى بولعانىمەن، ونىڭ جۇزەگە اسۋىندا بىرقاتار ناقتى كەدەرگىلەر بار. ايتالىق، ەۋروپا وداعى مۇنايدىڭ 40 پايىزىن، گازدىڭ 30 پايىزىن رەسەيدەن كىرگىزەدى. قىسقا ۋاقىتتا ءدال وسىنداي كولەمدەگى مۇناي مەن گازدىڭ بالاما كوزدەرىن تاۋىپ الۋ ەۋروپا ءۇشىن تىم قيىن. مۇلدە بالاما كوزى جوق دەگەندى بىلدىرمەيدى، بىراق ەۋروپا شارتىنا، ستاندارتىنا ساي ەنەرگيا كوزىن تاۋىپ ونىمەن كەلىسىمگە كەلىپ بولۋ ءبىرشاما ۇزاق پروتسەستى قاجەت ەتەدى.

ەگەر، رەسەي راسىندا ءوزى ايتقانداي جاۋاپ قادامىن جاسايتىن  بولسا، بۇل ەۋروپاداعى اۋىر ەنەرگيا داعدارىسىنا الىپ كەلۋى دە عاجاپ ەمەس. كەشە،  7 ناۋرىز كۇنى گەرمانيا مەن گوللانديا (نيدەرلاند) بۇل جوسپارعا قارسىلىعىن ءبىلدىردى.

جالپى، رەسەيدىڭ مۇنايى مەن گازىنا شەكتەۋ قويۋ تۋرالى ۋكراينا بيلىگى دە ەۋروپا مەن اقش-قا ءوتىنىش ەتكەن. ال، باتىس ەلدەرى باعالاردىڭ اسپانداۋ كەتۋىنەن الاڭداپ ونداي قادامعا باتىلدىق ەتە الماي وتىر. كەشە مۇناي باعاسى ءار باررەلىنە 139 دوللارعا دەيىن جەتىپ،  سوڭعى 14 جىلداعى ەڭ جوعارى كورسەتكىشكە جەتتى.

قازىرشە ەۋروپاداعى ءىرى ەلدەر رەسەي ەنەرگياسىنان بىرتىندەپ باس تارتۋ مىندەتىن الدى. بۇل انىعىندا رەسەي مۇناي-گازىنىڭ بالاماسى تابىلعانعا دەيىنگى شارالار بولۋى دا مۇمكىن.

The Qazaq Times