Almatı qalasındağı «I.Altınsarin atındağı № 159 mektep-gimnaziyanıñ kireberisi. Foto: aşıq derekköz

Almatı qalasınıñ bilim salasındağı sapanı qamtamasız etu departamenti men Bilim jäne ğılım ministrliginiñ baspasöz qızmeti QT redakciyasınıñ swrauına oray 159 mektep-gimnaziya basşılığı arnayı jiın qarsañında mwğalimderdiñ mindetti qızmetine jatpaytın jwmısqa jegilgenin jäne äkimşilik is qozğalğanın habarladı.

«Äkimşilik qwqıq bwzuşılıq turalı» kodekstiñ 802-babı 1-tarmağı 3-tarmaqşasına say, bwqaralıq aqparat qwraldarındağı habarlamaları negizinde, Almatı qalasınıñ bilim basqarmasınıñ «I.Altınsarin atındağı  № 159 gimnaziya» KMM basşısı Bidaybekova El'mira Isebaevnağa  qatıstı mektep mwğalimderin mektepte bolatın konferenciyağa dayındıq boyınşa jöndeu jwmıstarğa negizsiz tartqandığı boyınşa äkimşilik is qarastırıldı», – delingen resmi jauap hatta.

Departament tüsindirmesine qarağanda, mektep direktorı El'mira Bidaybekova «Pedagog märtebesi turalı» zañınıñ 6-babı 2-tarmağınıñ 1-tarmaqşasında belgilengendey pedagogti käsibi mindetinen tıs jwmıs türlerine tartuğa jol berilmeydi degen talaptı  saqtamağan.

«Habarlamada aytılğan uäjder  öz dälelderin tauıp, sonıñ nätijesinde, Almatı qalasınıñ bilim basqarmasınıñ «I.Altınsarin atındağı  № 159 gimnaziya» KMM basşısı QR ÄQBtK-niñ 409-babınıñ 7-3-tarmaqtarınıñ 1-tarmağı boyınşa, äkimşilik is qozğalıp, äkimşilik jauapkerşilikke tartıldı», – dep sendirdi departament jetekşisi Gülnar Ermekbaeva.

Osığan deyin redakciya özine qayrılğan pedagogterdiñ uäjimen apta basında Almatı qalasındağı 159-mektepte jiırma şaqtı mwğalimniñ «demalısta ırqınan tıs jwmısqa jegilgeni» turalı jazğan edi. Birinşi toqsannan keyingi demalısta er mwğalimder qabırğa aqtap-sırlasa, äyel pedagogter tazalıq jwmıstarına tartılğan. Tilşi 30 jıl bwrın qwrılğan bilim oşağınıñ ekinşi direktorınan 5 qaraşa ötedi delingen jiın-konferenciya turalı bilmek bolıp, habarlasuğa tırıstı. Biraq aşıq derekközde körsetilgen bes-altı qızmettik nömirdiñ birde-biri twtqanı kötermedi, baylanısu mümkin bolmadı.

Täuelsizdiktiñ şirek ğasırında Qazaqstanda pedagogika salası oñdı-soldı reformalauğa wşırap, türli kemşilikter qordalana kele jüyeli mäselelerge aynalğan edi. Keyingi birer jılda memleket byurokratiya men äkimşil-ämirşil jüyeniñ toqpağına tüsken bilim bağıtın jaqsartuğa birşama qadam jasadı.

2019 jılı 27 jeltoqsanda osı olqılıqtı toltıru maqsatında 21 baptan twratın, 500 mıñnan astam pedagogtiñ müddesin qorğauğa arnalğan «Pedagog märtebesi turalı» zañ qabıldanğan. Äleumettik qoldau, üstemaqı arqılı ıntalandıru, biliktiligin arttıru, jalaqı ösimi siyaqtı oñ özgerister bayqaladı. Dese de äli künge deyin key öñirlerde mwğalimdi artıq jwmısqa jegu: saylau, sanaq siyaqtı sayasi nauqandarğa «jwmsaq täsildermen» tartu, senbilik-tazalıq jwmıstarına şığaru, erkinen tıs jükteme beru tärizdi zañbwzuşılıqtar jii qaytalanadı.

The Qazaq Times