ءاليا نازارباەۆا. فوتو: ايقىن

قوعامدا الماتى قالاسىنداعى اۋدان اكىمدىكتەرى جۇرگىزەتىن كارانتين ەرەجەسىنىڭ ساقتالۋىن قاداعالاۋ جانە سانيتاريالىق-ەپيدەميولوگيالىق باقىلاۋ قىزمەتىنىڭ اكىمشىلىك جاۋاپكەرشىلىك تارتۋ جۇمىسى «قوس ستاندارتتى» سيپات الا باستاعانى جونىندە پىكىر قالىپتاستى. سەبەپ ايلاپ «قىزىل ايماقتا» تۇرعان قالادا قاۋلىعا قايشى ءوتىپ جاتقان ءتۇرلى قوعامدىق جيىندارعا قاتىستى جاۋاپتى ورگانداردىڭ رەاكتسياسى مەن قابىلدايتىن شەشىمى ءبىرىزدى ەمەس. قالالىق سەبد تويعا ۇقساس جيىن وتكىزگەن ءاليا نازارباەۆانىڭ تۇساۋكەسەر كەشىنە زاڭدىلىق جاعىنان باعا بەرۋگە نەگىز بولاتىن ماتەريالدى المالى اۋدانىنىڭ اكىمدىگى ەكى اپتادان بەرى جولداماي وتىرعانىن ايتادى.

الماتى قالاسى وكق الاڭىندا وتكەن بريفينگتە سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ (جانداربەك بەكشيننىڭ) ورىنباسارى سادۋاقاس بايعابىلوۆ ەكى اپتا بۇرىن كارانتين كەزىندە ءاليا نازارباەۆا وتكىزگەن مەرەكەلىك كەشتىڭ زاڭدىلىعى مەن ساننورمانىڭ ورىندالۋى جونىندەگى سۇراققا جاۋاپ بەرۋ ءۇشىن المالى اۋدانى اكىمدىگىنىڭ مونيتورينگ توپتارى ماتەريال جولداۋى قاجەت دەيدى.

– كارانتين شەكتەۋلەرىن باقىلاۋعا ارنالعان الگوريتمدە جاۋاپتى ءتۇرلى مەكەمەلەردىڭ قۇزىرەتى ايقىندالعان. جەرگىلىكتى اتقارۋشى ورگاندار قۇرعان مونيتورينگ توپتارى تەكسەرىس بارىسىندا ارنالعان ەرەجەگە قايشى فاكتىلەردى تىركەپ، ونى ءتيىستى اۋداندىق سانيتاريالىق-ەپيدەميولوگيالىق باقىلاۋ باسقارماسىنا جولدايدى.  باسقارما ءوز كەزەگىندە ماتەريالدى زەردەلەپ، اكىمشىلىك شارا قابىلداپ شەشىم شىعارادى، – دەدى

دەپارتامەنت باسشىسىنىڭ ورىنباسارى اتالعان سۇراق بويىنشا تىلشىلەردى ەكى اپتا بويى المالى اۋدانىنىڭ اكىمدىگىنە جۇگىنۋگە كەڭەس بەرىپ كەلەدى. ول بۇل جولى دا وقيعا تۋرالى فاكتى المالى اۋدانى اكىمدىگى مەن ونداعى مونيتورينگ توپتىڭ كەمشىلىگىنىڭ سەبەبىنەن باسقارما قاۋىنا كەلىپ-تۇسپەگەنىن راستادى.

«المالى اۋدانى اكىمدىگى جانىنان قۇرىلعان مونيتورينگ توپتارى تاراپىنان اتالعان جاعدايعا بايلانىستى جينالعان ماتەريالدار مەن تەسەرىس تۋرالى اقپارات ءالى كۇنگە دەيىن اۋداندىق باسقارماعا كەلىپ تۇسپەدى»، – دەدى سادۋاقاس بايعابىلوۆ.

رەداكتسيا حابارلاسقان المالى اۋدانى اكىمدىكگىنىڭ ءباسپاسوز قىزمەتىنىڭ وكىلى اينۇر سەرىكقىزى ماسەلە «قۇزىرىنا كىرمەيتىنىن» ايتىپ، دەسە دە رەسمي جاۋاپ دايىندالىپ جاتقانىن جەتكىزدى.

16 قىركۇيەكتە كەشكىسىن بىرنەشە ايدان بەرى ەپيداحۋالدىڭ تۇراقسىزدىعىنان «قىزىل ايماقتان» قالىپ قويعان الماتىدا كارانتين كەزىندە قازاقستانداعى باستى «بيلىك اۋلەتىنىڭ» بەلگىلى مۇشەسى ءاليا نازارباەۆا كىتابىنىڭ تۇساۋكەسەرىن وتكىزگەن.

ىندەتتىڭ ءتورتىنشى تولقىنى ءالى باسىلا قويماعان شاقتا قوعامدىق شارا وتكىزۋگە تىيىم سالىنعانىنا قاراماستان (وعان دەيىن سەنبى كۇنى، 11 قىركۇيەكتە مەدەۋ شاتقالىندا تازا اۋادا توپ بولىپ جۇگىرۋگە دە تىيىم سالىنعان) اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا  ونداعان ادام قاتىسقان مەرەكەلىك كەش ءوتتى.  نازارباەۆا قوعامعا بەلگىلى تۇلعالار شاقىرىلعان توي فورماتىنداعى اتىشۋلى تۇساۋكەسەردىڭ سول كەزدەگى قاۋلىعا سايكەس مادەني نىساندار قاتارىندا تەاترلاردى «30%-عا دەيىن تولتىرۋعا بولادى جانە Ashyq جۇيەسى جۇمىس ىستەيدى» دەگەن تالابىن ءۋاج رەتىندە العا تارتتى.

بىراق قىركۇيەك ايىنىڭ ورتاسىندا كۇشىندە بولعان قاۋلىدا تەاترلاردا توي-مەرەكەلىك كەش يا بانكەت وتكىزۋگە بولاتىنى جونىندە فۋنكتسيونالدى باعىتىن كەڭەيتەتىن مۇمكىندىكتەر كورسەتىلمەگەن. مەملەكەت رەتتەۋىندەگى تەاتر ارنايى ساحنالىق قويىلىم تاماشالاۋعا ارنالعانى بەلگىلى. باس سانيتار-دارىگەر جانداربەك بەكشيننىڭ 2 قىركۇيەكتەگى №28 قاۋلىسىنا سايكەس، تاپ سول ساتتە رەستوراندارداعى ءبىر مەزەتتە 50 ادامعا دەيىن عانا قابىلداۋعا رۇقسات ەتىلگەن ەدى. مۇنداي جاعدايدا كوپ قوناق كۇتكىسى كەلەتىن «توي يەسىنە» 50 شاقتى ورىنمەن شەكتەلەتىن رەستوراننان گورى سىيىمدىلىعى ۇلكەن بولاتىن تەاتر زالىنىڭ 30%-ىن جالعا الۋ تيىمدىرەك ەكەنى بەلگىلى.

بيلىگى اسا ىقپالدى ەكس-پرەزيدەنت نازارباەۆتىڭ كەنجە قىزى «مەستو سيلى» كىتابىنىڭ تۇساۋكەسەر تويى وتكەندە الماتىدا رەسپۋبليكا انىقتالعان كۇندەلىكتى كەيستەردىڭ شيرەك بولىگى انىقتالىپ جاتتى. قالادا پاندەميا باستالعالى 165 مىڭنان اسا ادام اۋىرعان، ونىڭ 10 مىڭعا جۋىعى قىركۇيەك ايىنىڭ العاشقى جارتىسىندا تىركەلىپ ۇلگەرگەن ەدى.

وسىعان دەيىن دەپارتامەنت الماتى قالاسىندا وتكەن بىرقاتار جيىن قاتىسۋشىلارى مەن ۇيىمداستىرۋشىلارىن ءتۇرلى كولەمدە ايىپپۇلعا كەسىپ، اكىمشىلىك جاۋاپقا تارتقان. دەپارتامەنت دەرەگىنشە، جىل باسىنان بەرى 675 زاڭدى تۇلعاعا 236 ملن، تاعى 5457 جەكە تۇلعاعا 240 ملن تەڭگە ايىپپۇل كولەمىندە حاتتاما تولىتىرىلعان.

The Qazaq Times