نازارباەۆا، ءۋالي، الاگوزوۆا قاتىسقان كەشتەر: مەيرامحانا باسشىلارى عانا جاۋاپقا تارتىلدى

قازاق مەملەكەتتىك اكادەميالىق وپەرا جانە بالەت تەاترىنىڭ ديرەكتورى تايىر قاراتاەۆ ءاليا نازارباەۆانىڭ كىتابىنىڭ تۇساۋكەسەرىن تەاتر عيماراتىندا وتكىزۋگە رۇقسات بەرگەنى ءۇشىن جاۋاپقا تارتىلدى.

بۇگىن وڭىرلىك كوممۋنيكاتسيالار قىزمەتىندە الماتىنىڭ باس سانيتار دارىگەرى جانداربەك بەكشين QT رەداكتسياسىنىڭ ءتىلشىسى سۇراعىنا بەرگەن جاۋابىندا تەاتر قابىرعاسىندا مەرەكەلىك جيىن وتكىزۋگە جاعداي جاساعان قاراتاەۆقا 670 مىڭ تەڭگە كولەمىندە ايىپپۇل سالىنعانىن مالىمدەدى. بىراق ۇيىمداستىرۋشى تاراپ پەن قاتىسۋشى قوناقتار جاۋاپقا تارتىلماعان. بەكشين بۇل سۇراقتى اينالىپ وتۋگە تىرىستى. اسىلىندە، ءولىم سانى جاعىنان ورنى تولماس شىعىنعا ۇشىراتقان پاندەميانىڭ ءتورتىنشى تولقىنى تۇسىندا قوعام تالقىسىنا تۇسكەن بىرنەشە شارانىڭ قاتىسۋشىلارى مەن ۇيىمداستىرۋشىلارى قاتار جازالانىپ كەلگەن. بۇل جولى نەلىكتەن تەك نىسان اكىمشىلىگى سۇراۋعا الىنعانى بەلگىسىز.

وسىعان دەيىن بەكشين ەكس-پرەزيدەنت وتباسىنىڭ مۇشەسى ءاليا نازارباەۆانىڭ «كۇش-قايرات مەكەنى» («مەستو سيلى») كىتابىنىڭ تۇساۋكەسەرى بارلىق سانيتارلىق شارتىن ساقتاي وتىرىپ وتكىزىلگەنىن جانە وعان Ashyq جۇيەسىندە «جاسىل» مارتەبەسى بار ادامدار عانا قاتىسقانىن مالىمدەگەن.

16 قىركۇيەكتە الماتىدا ءاليا نازارباەۆانىڭ مەمۋارلىق تولعاۋ كىتابىنىڭ تۇساۋكەسەرى وتكەن. كەش اباي اتىنداعى مەملەكەتتىك وپەرا جانە بالەت تەاترىندا ءوتىپ، ونداعان ادام جينالدى. كەيىنگى ءبىر اي ىشىندە رەداكتسيا باسقا اقپارات قۇرالدارىمەن بىرگە جيىننىڭ زاڭدىلىعىنا باعا بەرۋدى سۇراعان. دەپارتامەنت (سەس) باسشىلىعى ماسەلەنىڭ قارالۋىن ماتەريال جولداۋعا ءتيىس المالى اۋدانى اكىمدىگىنىڭ مونيتورينگ توپتارىنا سىلتەگەن.

باس سانيتار-دارىگەر جانداربەك بەكشيننىڭ 2 قىركۇيەكتەگى №28 قاۋلىسىنا سايكەس، تاپ سول ساتتە رەستوراندارعا ءبىر مەزەتتە 50 ادامعا دەيىن عانا قابىلداۋعا رۇقسات ەتىلگەن ەدى. مۇنداي جاعدايدا كارانتيندى ەلەمەي كوپ قوناق كۇتكىسى كەلەتىن «توي يەسىنە» 50 شاقتى ورىنمەن شەكتەلەتىن رەستوراننان گورى سىيىمدىلىعى الدەقايدا ۇلكەن تەاتر زالىنىڭ 30%-ىن جالعا الۋ تيىمدىرەك ەكەنى بەلگىلى. توي ءتارىزدى سيپاتتا اتالعان كەشتە قازاقستانعا بەلگىلى تۇلعالار مەن شەتەلدىك قوناقتار بولعان. الەۋمەتتىك جەلىلەرگە تاراعان فوتو-ۆيدەولاردان ولاردىڭ بىردە-بىرەۋى (داياشىلاردى قوسپاعاندا) بەتپەردە تاقپاعانىن كورۋگە بولادى.

بەلگىلى اتكەر دوسحان جولجاقسىنوۆتىڭ 70 جاسقا تولۋىنا وراي وتكەن مەرەيتويعا رۇقسات بەرگەن Svetlana Modern Cuisine مەيرامحاناسىنىڭ باسشىسىنا 670 910 تەڭگە ايىپپۇل سالىندى. اقوردا حاتشىسى بەرىك ءۋالي، ساياساتتان كەتكەن يمانعالي تاسماعامبەتوۆ، وسكەمەن قالاسىنىڭ اكىمى جاقسىلىق ومار قاتىسقان جيىندا دا كارانتين ەرەجەسى ساقتالماعان.

سونىمەن قوسا، بايان الاگوزوۆانىڭ جولداسىنىڭ تۋعان كۇنىن اتاپ وتىلگەن Lە Dome رەستورانى مەن قازان ايىنىڭ ورتاسىندا 150-دەن اسا ادامنىڭ قاتىسۋىمەن كونتسەرت وتكەن «اريال»  گولف-كلۋبىنا ايىپپۇل سالىندى. بارلىعىنا ورتاق دۇنيە – وسىعان دەيىن جيىن-تويعا قاتىسى بار بارلىق تاراپ جاۋاپقا تارتىلىپ كەلدى دە تانىمال ادامدارعا قاتىستى سۇرالعاندا تەك نىسان اكىمشىلىگى جازالاندى.

تامىز ايىنىڭ باسىندا ەۆرەي قاۋىمداستىعىنىڭ وكىلدەرى Rixos قوناق ۇيىندە سالتاناتتى جيىن وتكىزگەن. العاشىندا بار جاۋاپكەرشىلىكتى مونيتورينگ توپقا ارتقان دەپارتامەنت (سەس – بۇرىنعى ورىسشا اتاۋى) قوعام سىنى كوبەيگەن سوڭ  كارانتين شاراسىن بۇزدى دەگەن ايىپپەن ورتالىق سيناگوگا ۇيىمداستىرۋشىلارىنا، قوناق ءۇيدىڭ باس ديرەكتورى مەن مەنەدجەرلەرىنە ايىپپۇل سالعان. سول ءتارىزدى قوعام نارازىلىعى مەن جۋرناليستەردىڭ تولاسسىز ساۋالىنان كەيىن عانا بيلىك تانىمال بلوگەرلەر، شوۋ-بيزنەس جۇلدىزدارى قاتىسقان Royal Tulip قوناق ۇيىندەگى اۋقىمدى شاراعا رەاكتسيا بىلدىرۋگە ءماجبۇر بولدى. جيىنعا كەلگەن 30 ادامنىڭ 13-ىنە شەكتەۋ شاراسىن ساقتامادى دەگەن ايىپپەن ايپپۇل سالىنعان.

The Qazaq Times