Äliya Nazarbaeva. Foto: Ayqın

Qoğamda Almatı qalasındağı audan äkimdikteri jürgizetin karantin erejesiniñ saqtaluın qadağalau jäne Sanitariyalıq-epidemiologiyalıq baqılau qızmetiniñ äkimşilik jauapkerşilik tartu jwmısı «qos standarttı» sipat ala bastağanı jöninde pikir qalıptastı. Sebep aylap «qızıl aymaqta» twrğan qalada qaulığa qayşı ötip jatqan türli qoğamdıq jiındarğa qatıstı jauaptı organdardıñ reakciyası men qabıldaytın şeşimi birizdi emes. Qalalıq SEBD toyğa wqsas jiın ötkizgen Äliya Nazarbaevanıñ twsaukeser keşine zañdılıq jağınan bağa beruge negiz bolatın materialdı Almalı audanınıñ äkimdigi eki aptadan beri joldamay otırğanın aytadı.

Almatı qalası ÖKQ alañında ötken brifingte Sanitariyalıq-epidemiologiyalıq baqılau departamenti basşısınıñ (Jandarbek Bekşinniñ) orınbasarı Säduaqas Bayğabılov eki apta bwrın karantin kezinde Äliya Nazarbaeva ötkizgen merekelik keştiñ zañdılığı men sannormanıñ orındaluı jönindegi swraqqa jauap beru üşin Almalı audanı äkimdiginiñ monitoring toptarı material joldauı qajet deydi.

– Karantin şekteulerin baqılauğa arnalğan algoritmde jauaptı türli mekemelerdiñ qwzireti ayqındalğan. Jergilikti atqaruşı organdar qwrğan monitoring toptarı tekseris barısında arnalğan erejege qayşı faktilerdi tirkep, onı tiisti audandıq Sanitariyalıq-epidemiologiyalıq baqılau basqarmasına joldaydı.  Basqarma öz kezeginde materialdı zerdelep, äkimşilik şara qabıldap şeşim şığaradı, – dedi

Departament basşısınıñ orınbasarı atalğan swraq boyınşa tilşilerdi eki apta boyı Almalı audanınıñ äkimdigine jüginuge keñes berip keledi. Ol bwl jolı da oqiğa turalı fakti Almalı audanı äkimdigi men ondağı monitoring toptıñ kemşiliginiñ sebebinen basqarma qauına kelip-tüspegenin rastadı.

«Almalı audanı äkimdigi janınan qwrılğan monitoring toptarı tarapınan atalğan jağdayğa baylanıstı jinalğan materialdar men teseris turalı aqparat äli künge deyin audandıq basqarmağa kelip tüspedi», – dedi Säduaqas Bayğabılov.

Redakciya habarlasqan Almalı audanı äkimdikginiñ baspasöz qızmetiniñ ökili Aynwr Serikqızı mäsele «qwzırına kirmeytinin» aytıp, dese de resmi jauap dayındalıp jatqanın jetkizdi.

16 qırküyekte keşkisin birneşe aydan beri epidahualdıñ twraqsızdığınan «qızıl aymaqtan» qalıp qoyğan Almatıda karantin kezinde Qazaqstandağı bastı «bilik äuletiniñ» belgili müşesi Äliya Nazarbaeva kitabınıñ twsaukeserin ötkizgen.

İndettiñ törtinşi tolqını äli basıla qoymağan şaqta qoğamdıq şara ötkizuge tıyım salınğanına qaramastan (oğan deyin senbi küni, 11 qırküyekte Medeu şatqalında taza auada top bolıp jügiruge de tıyım salınğan) Abay atındağı Qazaq Memlekettik akademiyalıq opera jäne balet teatrında  ondağan adam qatısqan merekelik keş ötti.  Nazarbaeva qoğamğa belgili twlğalar şaqırılğan toy formatındağı atışulı twsaukeserdiñ sol kezdegi qaulığa säykes mädeni nısandar qatarında teatrlardı «30%-ğa deyin toltıruğa boladı jäne Ashyq jüyesi jwmıs isteydi» degen talabın uäj retinde alğa tarttı.

Biraq qırküyek ayınıñ ortasında küşinde bolğan qaulıda teatrlarda toy-merekelik keş ya banket ötkizuge bolatını jöninde funkcionaldı bağıtın keñeytetin mümkindikter körsetilmegen. Memleket retteuindegi teatr arnayı sahnalıq qoyılım tamaşalauğa arnalğanı belgili. Bas sanitar-däriger Jandarbek Bekşinniñ 2 qırküyektegi №28 qaulısına säykes, tap sol sätte restorandardağı bir mezette 50 adamğa deyin ğana qabıldauğa rwqsat etilgen edi. Mwnday jağdayda köp qonaq kütkisi keletin «toy iesine» 50 şaqtı orınmen şekteletin restorannan göri sıyımdılığı ülken bolatın teatr zalınıñ 30%-ın jalğa alu tiimdirek ekeni belgili.

Biligi asa ıqpaldı eks-prezident Nazarbaevtıñ kenje qızı «Mesto silı» kitabınıñ twsaukeser toyı ötkende Almatıda respublika anıqtalğan kündelikti keysterdiñ şirek böligi anıqtalıp jattı. Qalada pandemiya bastalğalı 165 mıñnan asa adam auırğan, onıñ 10 mıñğa juığı qırküyek ayınıñ alğaşqı jartısında tirkelip ülgergen edi.

Osığan deyin departament Almatı qalasında ötken birqatar jiın qatısuşıları men wyımdastıruşıların türli kölemde ayıppwlğa kesip, äkimşilik jauapqa tartqan. Departament dereginşe, jıl basınan beri 675 zañdı twlğağa 236 mln, tağı 5457 jeke twlğağa 240 mln teñge ayıppwl köleminde hattama tolıtırılğan.

The Qazaq Times