شىڭجاڭ ماسەلەسى قازىرگى اقش- قىتاي قاتىناسىندا اسا ماڭىزدى ءتۇيىننىڭ ءبىرى سانالادى.  شىڭجاڭداعى ەتنيكالىق ازشىلىققا جاسالعان قىسىمدار، قۋدالاۋ، ساياسي لاگەر، ءماجبۇرلى ەڭبەك سەكىلدى ارەكەتتەر اقش-تىڭ قكپ بيلىگىن ايىپتاۋداعى باستى قۇرالىنا اينالدى.  ونىڭ ۇستىنە قۇراما شتاتتار شىڭجاڭداعى ماسەلەگە قاتىستى بىرقاتار جاڭا زاڭدار مەن شەكتەۋ شارالارىن دا قابىلدادى. ايتالىق، اقش سەناتى شىڭجاڭداعى ءماجبۇرلى ەڭبەككە جول بەرمەۋ جونىندە زاڭ قابىلداعان بولاتىن. قازىر بۇل بايدەن اكىمشىلىگىنىڭ ءجىتى قاراۋىندا.

ءبىر كۇن بۇرىن اق ءۇي ءباسپاسوز وكىلى «شىڭجاڭ ماسەلەسى پرەزيدەنت بايدەندى الاڭداتاتىن ەڭ باستى ماسەلەلەردىڭ ءبىرى» دەگەن مالىمدەمە جاسادى. ونىڭ ايتۋىنشا بايدەن اكىمشىلىگى سەنات قابىلداعان زاڭنىڭ جالپى باعىتىن قولدايدى، ءارى ءالى دە زاڭ-جوباسىن ەگجەي-تەگجەيلى قاراستىرۋ ۇستىندە.

اقش سەناتى اتالمىش زاڭ جوباسىن وسى جىلدىڭ 14 شىلدەسىندە قابىلداعان بولاتىن، بۇل زاڭ بويىنشا يمپورتتاۋشىلار شىڭجاڭ ونىمدەرىن كىرگىزۋدەن بۇرىن ونىڭ ءماجبۇرلى ەڭبەكپەن وندىرىلمەگەنىن راستاۋعا مىندەتتى. دالەلدەي الماسا «تاريفتىك زاڭعا» (1930 جىلى قابىلدانعان) سايكەس يمپورتتاۋعا شەكتەۋ قويىلادى.

سەيسەنبى كۇنگى ءباسپاسوز ماجىلىسىندە اق ءۇي وكىلى شاكي: «ارينە، پرەزيدەنت مىرزا ءوزىنىڭ ۇيعىرلارعا قاتىستى الاڭداۋشىلىعىن بۇعان دەيىن دە قىتاي بيلىگىنە اشىق ايتقان. اتالعان زاڭ جوباسى تۋرالى ءبىزدىڭ الابوتەن پىكىرىمىز جوق، تەك مىنانى ايتقىم كەلەدى: ءبىز شىڭجاڭداعى ادام قۇقىعىن بۇزعان جانە قاتىكەزدىك جاساعان تۇلعالارعا جاۋاپكەرشىلىكتى كۇشەيتۋ ءۇشىن بەلگىلى ءبىر قادامداردى جاسادىق»، – دەگەن.

اق ءۇي وكىلىنىڭ ايتۋىنشا شىڭجاڭداعى قىتاي ساياساتىنا قاتىستى شارالاردا ماگنيتسكي زاڭىنا سايكەس شەكتەۋلەر دە بار، ايتالىق قارجىلىق سانكتسيالار، يمپورت پەن ەكسپورتتى باقىلاۋ، كوممەرتسيالىق ەسكەرتۋلەر جانە G7 بارلىق جاھاندىق جەتكىزىلىم تىزبەگى ءماجبۇرلى ەڭبەك ونىمدەرىن پايدالانباۋى ءۇشىن شارالار قابىلداۋعا مىندەتتەمە جانە تاعى باسقالاردى قامتيدى.

The Qazaq Times