...ءبىزدىڭ باتىرلار جىرىندا كوپ كەزدەسەتىن «وتقا سالسا جانبايتىن سۋعا سالسا باتپايتىن» ءموتيۆى ءدال قازىرگى ءبىزدىڭ سانا ءۇشىن حاس باتىردى اسىرە كوتەرمەلەۋ مەن اداقتاۋ سەكىلدى قابىلدانارى حاق.

وسى ءبىر «وتقا جانباۋ» وقيعاسىنىڭ كيەلى ءتورت كىتاپ پاراعىندا دا دەرەك ىزدەرى بار. بۇل كوبىنە اۆراام (يسلامدا يبراھيم) پايعامبار ومىرىنە تيەسىلى. كونە حيسسا-اڭىزدا پايعامبار قارسىلاستارى ىشىنە اقسوڭكە اعاش جاعىلىپ، ابدەن نارتتاي قىزارعان ور ىشىنە ءيبراھيمدى لاقتىرعانى باياندالادى (اتالعان وقيعا قۇراننىڭ «ءانبيا» سۇرەسىندە دە ايتىلادى). ءبىر قىزىعى، جوعارىداعى كىتاپتاردىڭ بارلىعى دا ءبىر اۋىزدان يبراھيم پايعامباردىڭ سول وتقا جانۋدىڭ ورنىنا، كەرىسىنشە ءتىسى-تىسىنە تيمەي دىرىلدەپ توڭعاندىعىن، ءارى اتالعان «قيامەتتەن» امان-ساۋ قۇتىلعانىن العا تارتادى. ارينە، مۇنىڭ ءبارى تۇگەلدەي دەرلىك استارلى ءام سيمۆولدىق ماعىناعا يە.

ءبىز دەسەكتە كۇدىككە جوسىن ۇيالاتىپ، بۇل حيسسا دەرەگىنە نانبايتىندار قاراسىنىڭ مول ەكەندىگىن دە ەپتەپ ءىشىمىز سەزەدى. وقيعانىڭ وسىلاي ورىستەپ جەتۋىنە باستى دايەك بولعان دۇنيە ادام رۋحىنىڭ كۇشى مەن دارگەيى مە دەيمىز. يبراھيم پايعامبار لاۋلاعان وتقا نەگە جانبادى؟

بۇل نەندەي زاڭدىلىقتاردىڭ نەگىزىندە جۇزەگە استى، مىنە ءبىزدىڭ بۇعان ەش باس قاتىرعىمىز جوق. كەرەك دەسەڭىز سول پايعامبارلاردىڭ ءوزى ەت پەن سۇيەكتەن جاراتىلعان پەندە بالاسى ەكەندىگىن ەسىمىزدەن شىعارىپ العاندايمىز. ءبىز كوبىنە مۇنداي تۇلعالاردىڭ (تۇتىنعان زاتى مەن ساقالى سەكىلدى) سىرتقى سيپاتتارىنا عانا ەلىكتەگەنىمىز بولماسا، ال ىشكى رۋحاني جان قاباتتارىنا اتىمەن دە اتتاپ باسقىمىز كەلمەيدى.

پايعامبارلار مەن دانىشپانداردىڭ (دۇرىسى تۇلعانىڭ) باستى ميسسياسى ادامدى ءوز تانىمىنا تاربيەلەپ، ءوزى جەتكەن كەمەل رۋح كەڭىستىگىنە كوتەرۋ عوي.

كونە ميرداد كىتابىنداعى ءبىر عاقليا: «ءسىزدىڭ ءار ويىڭىز اسپاندا جالىنداعان ۇلكەن ارىپتەرمەن جازىلىپ، ول ءار ادامعا كورىنەدى دەپ ويلاساڭىز، شىندىعىندا دا ءدال سولاي بولادى»، – دەيدى.

ەندەشە «وتقا سالسا جانبايتىن، سۋعا سالسا باتپايتىن» ۇعىمى اسىرە ءسوز ەمەس، ادام رۋحىنىڭ الاپاتى مەن مۇمكىندىكتەرى.
سول ءۇشىن دە ءبىزدىڭ ىلگەرىدەگى باباتانىم جاۋ جاپىرعان ادامنان گورى رۋحى مەن ءناپسىسىن يگەرگەن وسىنداي جاندارعا باتىر دەپ ايرىقشا اتاۋ بەرىپ وتىر. سونىمەن باتىر دەگەنىمىز كوبىمىزگە سوۆەتتىك سانا سىڭىرگەن قارا كۇش يەسى ەمەس، ول ءوز رۋحىن يگەرگەن اۋليە تۇلعا.

جاپون پالساپاسىنداعى ءجيى ۇشىراساتىن سەمسەر مەن گۇل ۇيلەسىمى دە باتىردىڭ شىن وبرازى (بۇل باتىردىڭ سىرتى سەمسەر سەكىلدى سۇستى بولعانىمەن ءىشى گۇلدەي نازىك بولۋى كەرەك دەگەندى يشارالاعانى).

ءبىز وكىنىشكە قاراي، رۋحتىڭ مۇنداي جويقىن كەرەمەتتەرىن ەلىمىزگە ەنگەن مىنا ءبىر ۆاحابيزم ىندەتىنەن كەيىن «باقسىلىق» پەن «جىن-پەرى» دەگەن اتاۋلاردىڭ اينالاسىندا عانا قاراپ، بەلىنەن سىزدىق تا سالدىق.

قىسقاسى، كەشەگى كوممۋنيستىك جۇيەدەن ابدەن قانسىراپ شىققان قازاق تانىمىن ءوسىبىر ۆاحابيزم يدەياسى نەبارى وتىز جىل توڭىرەگىندە تۇگەلدەي دەرلىك وتاپ تىندى.

جالپى ۆاحابيزم مەن بولشەۆيك يدەياسى ءبىر-بىرىمەن قويىنداس ەش ايىرماشىلىعى جوق تۇسىنىكتەر دەسەك تە بولادى

ەڭ باستىسى ەكەۋى دە ازاماتتىق قوعام مەن دەموكراتيانىڭ، ەركىن وي مەن اۆتونومدى سانانىڭ قاس دۇشپاندارى.

ەڭ وكىنىشتىسى بىزدەگى ءسالافيزم يدەياسى استىرتىن ءدىني يندەكستە عانا ەمەس، ول بەيسانالى تۇردە ءبىزدىڭ سانامىزعا جاپپاي جايىلىپ كەتتى. مىسالى، مادەنيەت پەن ونەردەگى ساناسىنا ساقال وسىرگەندەردىڭ الدە ءبىر توسىن جاڭالىققا كەلگەندە اياعىن ات باسقانداي شار ەتە قالاتىنى دا سول. قازاق تانىمىنداعى كيە مەن ءبىلىم و باستان-اق ەكى ءتۇرلى كاتەگوريا ەدى. ارۋاق ۇعىمى دا ءدال سولاي بولاتىن.

بىزدەگى كوممۋنيستىك بۇلعاقتان كەيىن ىرگەلى ءبىلىم ءوز ارناسىنان اجىراسا، ال مىنا ءسالافيزم ىندەتىنەن كەيىن كيە مەن ارۋاق اتاۋلى ارقامىزدان ءبىرجولاتا كوشىپ تىندى. جالپى ارۋاق پەن اۋليە فەنومەنىنە ءبىر بويلامايىنشا كيە مەن تىلسىم ۇعىمدارىنىڭ نارقىنا جەتۋ ەش مۇمكىن ەمەس. قوبىلاندىنىنىڭ ء"تورت بۇلتى" مەن ەر جانىبەكتىڭ "قوس ءبورىسى", ءسۇيىنبايدىڭ "قىزىل جولبارىسى" مەن كەمپىربايدىڭ "كوكالا ۇيرەگى", سول سەكىلدى قورقىت پەن قازانعاپ كۇيلەرىندەگى تىلسىم قامىرىقتى تۇسىنۋگە قولبايلاۋ بولىپ وتىرعان دۇنيەلەر دە وسى (سالافتىق) ويلاۋ فورمامىزدىڭ تۇپكى ۇرەيىندە جاتىر...

"The Qazaq Times"