...Bizdiñ batırlar jırında köp kezdesetin «Otqa salsa janbaytın suğa salsa batpaytın» motivi däl qazirgi bizdiñ sana üşin has batırdı äsire kötermeleu men adaqtau sekildi qabıldanarı haq.

Osı bir «otqa janbau» oqiğasınıñ kieli tört kitap parağında da derek izderi bar. Bwl köbine Avraam (islamda Ibrahim) payğambar ömirine tiesili. Köne hissa-añızda payğambar qarsılastarı işine aqsöñke ağaş jağılıp, äbden narttay qızarğan or işine Ibrahimdi laqtırğanı bayandaladı (Atalğan oqiğa Qwrannıñ «Änbiya» süresinde de aytıladı). Bir qızığı, joğarıdağı kitaptardıñ barlığı da bir auızdan Ibrahim payğambardıñ sol otqa janudıñ ornına, kerisinşe tisi-tisine timey dirildep toñğandığın, äri atalğan «qiyametten» aman-sau qwtılğanın alğa tartadı. Ärine, mwnıñ bäri tügeldey derlik astarlı äm simvoldıq mağınağa ie.

Biz desekte küdikke josın wyalatıp, bwl hissa deregine nanbaytındar qarasınıñ mol ekendigin de eptep işimiz sezedi. Oqiğanıñ osılay öristep jetuine bastı däyek bolğan dünie ADAM RUHINIÑ küşi men därgeyi me deymiz. Ibrahim payğambar laulağan otqa nege janbadı?

Bwl nendey zañdılıqtardıñ negizinde jüzege astı, mine bizdiñ bwğan eş bas qatırğımız joq. Kerek deseñiz sol payğambarlardıñ özi et pen süyekten jaratılğan pende balası ekendigin esimizden şığarıp alğandaymız. Biz köbine mwnday twlğalardıñ (twtınğan zatı men saqalı sekildi) sırtqı sipattarına ğana eliktegenimiz bolmasa, al işki ruhani jan qabattarına atımen de attap basqımız kelmeydi.

Payğambarlar men danışpandardıñ (dwrısı twlğanıñ) bastı missiyası adamdı öz tanımına tärbielep, özi jetken kemel ruh keñistigine köteru ğoy.

Köne Mirdad kitabındağı bir ğaqliya: «Sizdiñ är oyıñız aspanda jalındağan ülken äriptermen jazılıp, ol är adamğa körinedi dep oylasañız, şındığında da däl solay boladı», – deydi.

Endeşe «Otqa salsa janbaytın, suğa salsa batpaytın» wğımı äsire söz emes, adam ruhınıñ alapatı men mümkindikteri.
Sol üşin de bizdiñ ilgeridegi babatanım jau japırğan adamnan göri ruhı men näpsisin igergen osınday jandarğa BATIR dep ayrıqşa atau berip otır. Sonımen batır degenimiz köbimizge sovettik sana siñirgen qara küş iesi emes, ol öz ruhın igergen äulie twlğa.

Japon pälsapasındağı jii wşırasatın SEMSER men GÜL üylesimi de batırdıñ şın obrazı (Bwl batırdıñ sırtı semser sekildi swstı bolğanımen işi güldey näzik boluı kerek degendi işaralağanı).

BİZ ÖKİNİŞKE QARAY, RUHTIÑ MWNDAY JOYQIN KEREMETTERİN ELİMİZGE ENGEN MINA BİR VAHABIZM İNDETİNEN KEYİN «BAQSILIQ» PEN «JIN-PERİ» DEGEN ATAULARDIÑ AYNALASINDA ĞANA QARAP, BELİNEN SIZDIQ TA SALDIQ.

Qısqası, keşegi kommunistik jüyeden äbden qansırap şıqqan qazaq tanımın osıbir vahabizm ideyası nebarı otız jıl töñireginde tügeldey derlik otap tındı.

JALPI VAHABIZM MEN BOL'ŞEVIK IDEYASI BİR-BİRİMEN QOYINDAS EŞ AYIRMAŞILIĞI JOQ TÜSİNİKTER DESEK TE BOLADI

Eñ bastısı ekeui de azamattıq qoğam men demokratiyanıñ, erkin oy men avtonomdı sananıñ qas dwşpandarı.

Eñ ökiniştisi bizdegi säläfizm ideyası astırtın dini indekste ğana emes, ol beysanalı türde bizdiñ sanamızğa jappay jayılıp ketti. Mısalı, mädeniet pen önerdegi sanasına saqal ösirgenderdiñ älde bir tosın jañalıqqa kelgende ayağın at basqanday şar ete qalatını da sol. Qazaq tanımındağı kie men bilim o bastan-aq eki türli kategoriya edi. Äruaq wğımı da däl solay bolatın.

Bizdegi kommunistik bwlğaqtan keyin irgeli bilim öz arnasınan ajırasa, al mına säläfizm indetinen keyin kie men aruaq ataulı arqamızdan birjolata köşip tındı. Jalpı aruaq pen äulie fenomenine bir boylamayınşa KIE men TILSIM wğımdarınıñ narqına jetu eş mümkin emes. Qobılandınınıñ "tört bwltı" men Er Jänibektiñ "qos börisi", Süyinbaydıñ "qızıl jolbarısı" men Kempirbaydıñ "kökala üyregi", sol sekildi Qorqıt pen Qazanğap küylerindegi tılsım qamırıqtı tüsinuge qolbaylau bolıp otırğan dünieler de osı (säläftıq) oylau formamızdıñ tüpki üreyinde jatır...

"The Qazaq Times"