اتىراۋ وبلىسى مەن رەسەيدىڭ استراحان وبلىستارىنىڭ شەكاراسىندا جەر داۋى بولىپ جاتىر. اتىراۋ وبلىسىنىڭ وڭىرلىك كوممۋنيكاتسيالار قىزمەتى تاراتقان اقپاراتقا قاراعاندا، 14 ساۋىردە قۇرمانعازى اۋدانىنىڭ كوپتوعاي اۋىلىندا قازاقستان مەن رەسەي شەكاراسىندا جاڭا شەكارالىق قورشاۋ سالۋ جۇمىستارى باستالعان. كوپتوعاي اۋىلىنىڭ تۇرعاندارى بۇعان نارازى.

"قازىرگى ۋاقىتتا 2005 جىلعى 18 قاڭتاردا ماسكەۋدە قول قويىلعان “قازاقستان-رەسەي مەملەكەتتىك شەكاراسى تۋرالى كەلىسىمى” بويىنشا ەكى ەل اراسىندا شەكارا بەلدەۋى ورناتىلىپ جاتىر. ال دەماركاتسيالىق جۇمىستارى ءالى اياقتالعان جوق. شەكارا اۋماعىندا جاڭا قورشاۋلار تۇرعىزۋ جۇمىستارىن "2016" اسكەري ءبولىمى جۇرگىزىپ جاتىر" دەلىنگەن اتىراۋ وبلىسىنىڭ وڭىرلىك كوممۋنيكاتسيالار قىزمەتى تاراتقان رەسمي حابارلامادا.

Qazaq Times قۇرمانعازى اۋدانىنىڭ اكىمى مارات مۇرزيەۆكە حابارلاستى، الايدا ول سۇراقتارعا تەك رەسمي جاۋاپ بەرەتىنىن ايتىپ، جەر داۋىنا قاتىستى بارلىق اقپارات اكىمدىككە قاراستى Facebook پاراقشاسىندا جاريالانعانىن جەتكىزدى.

قۇرمانعازى اۋدانى اكىمدىگىنىڭ Facebook پاراقشاسىندا كەشە جاريالانعان حابارلامادى اكىم شەكارالىق قورشاۋ جۇمىستارى بۇرىن باستالۋى ءتيىس ەكەنىن، بىراق ءارتۇرلى سەبەپتەرمەن جۇرگىزىلمەي كەلگەنىن ايتقان.

"تەك بيىلعى جىلدىڭ 14 ساۋىرىندە شەكاراشىلار قۇرىلىس جۇمىستارىنا كىرىستى. شەكارا قورشاۋى جۇمىستارى جۇرگىزىلمەس بۇرىن، 13 ساۋىردە اكىمدىك، شەكارا قىزمەتى مەن قۇقىق قورعاۋ ورگاندارىنىڭ وكىلدەرى كوپتوعاي اۋىلىنىڭ تۇرعىندارىمەن كەزدەسىپ، جۇمىستاردىڭ زاڭدىلىعى تۋرالى ءتۇسىندىرۋ جۇمىستارىن جۇرگىزگەن بولاتىن. سونداي-اق شەكارا قىزمەتى مەن قۇقىق قورعاۋ ورگاندارى دا جاسالىپ جاتقان جۇمىستاردىڭ زاڭدىلىعىن ءتۇسىندىردى" دەپتى قۇرمانعازى اۋدانىنىڭ اكىمى مارات مۇرزيەۆ.

بۇعان قوسا، اكىمدىك تاراتقان حابارلاماسىندا قازاقستان شەكارا قىزىمەتىنىڭ تۇسىندىرمەسى دە بار.

"2013 جىلدىڭ مامىر ايىندا ورناتىلعان №23 جانە №24 شەكارالىق بەلگىلەر اراسىنداعى مەتالل قورشاۋلار رەسەي اۋماعىنا قاراي 10-70 مەترگە ارالىقتا ورنالاسقان"  دەلىنگەن اكىمدىك تاراتقان قازاقستان شەكارا قىزىمەتىنىڭ تۇسىندىرمەسىندە.

اكىمدىك مالىمەتىنشە، رەسەي اۋماعىندا ورنالاسقان ۇزىندىعى 1800 مەتر قورشاۋلاردى تۇرعىزۋ ءۇشىن ينجەنەرلىك جۇمىستاردى كوپتوعاي اۋىلىندا جۇرگىزىلەدى.

"The Qazaq Times"