2 قىركۇيەك ەلوردانىڭ ءماجىلىس ۇيىندە ءوتىپ جاتقان VI شاقىرىلىمداعى قر پارلامەنتىنىڭ بەسىنشى سەسسياسىنىڭ اشىلۋىنا وراي پارلامەنت پالاتالارىنىڭ بىرلەسكەن وتىرىسىندا پرەزيدەنت ءوز جولداۋىندا جەر ماسەلەسىن كوتەردى. 

«جۇرتشىلىقتى  تولعاندىرىپ جۇرگەن جەر ماسەلەسىنە ارنايى توقتالاعىم كەلەدى. مەملەكەت باسشىسى رەتىندە تاعى دا مالىمدەيمىن. جەرىمىز  شەتەلدىكتەرگە ساتىلمايدى، وعان جول بەرىلمەيدى. بۇل ماسەلە بويىنشا قاۋەسەت تاراتۋدى دوعارۋ كەرەك. بىراق جەردى ءتيىمدى پايدالانۋدى قامتاماسىز ەتۋ – ءبىزدىڭ  مىندەتىمىز. جەردى ءتيىمدى يگەرۋ ماسەلەسى بارعان سايىن وزەكتىلەنىپ بارادى. جاعداي جەرگە سالىناتىن تىكەلەي سالىقتىڭ تومەندىگىمەن ۋشىعىپ وتىر. مەملەكەتتەن اقىسىز جەر جالداۋ قۇقىعىن العاندار  يەلىگىندەگى جەرمەن جۇمىس ىستەمەي وتىر. ەلىمىزدە لاتيفۋنديستەر قاتارى پايدا بولدى»، – دەدى مەملەكەت باسشىسى.

ەستەرىڭىزگە سالا كەتسەك، 2016 جىلى ءساۋىردىڭ 24-ءى اتىراۋ قالاسىندا جەر ماسەلەسىنە بايلانىستى ميتينگ ءوتىپ، نارازىلىق اكتسيالارى قازاقستاننىڭ وزگە دە قالالارىندا دا جالعاسقان ەدى. جاڭا مىڭجىلدىقتا بۇلاي بۋىرقانىپ كورمەگەن بۇقارانىڭ باسكوتەرۋىنەن سەسكەنگەن بيلىك مامىردا جەر كودەكسىندەگى رەزونانس تۋدىرعان زاڭ باپتارىنا موراتوري جاريالاعان.

جەر رەفورماسىن تالقىلاۋ ءۇشىن ۇكىمەت جانىنان كوشپەلى جەر كوميسسياسى قۇرىلدى. كوميسسيانىڭ قۇرامىنا شاقىرىلعان بىرنەشە بەلسەندى ونىڭ جۇمىسىنا قاتىسۋدان باس تارتقان. حالىقتىڭ تالابىمەن جانە جەر كوميسسياسىنىڭ ۇسىنىسىمەن سول كەزدەگى پرەزيدەنت نازارباەۆ 19 تامىزدا شەتەلدىكتەرگە جەردى جالعا بەرۋ تۋرالى زاڭعا 2021 جىلعا دەيىن موراتوري ەنگىزگەن ەدى. 2016 جىلدىڭ ساۋىرىندە وتكەن اتىراۋلىق شەرۋ بەلسەندىلەرى ماكس بوقاەۆ پەن تالعات ايان بىرنەشە ايىپتاۋلارمەن بەس جىلعا سوتتالعان بولاتىن. جازۋشى ق.ءجۇمادىلوۆ باستاعان ازاماتتىق قوعام بەلسەندىلەرى قاماۋداعى بەلسەندىلەردى سىرتتاي «حالىق قاھارمانى» سىيلىعىمەن ماراپاتتاعان ەدى. جەر ماسەلەسى تۋرالى سىبىس ەل ىشىندە ءالى ەسىپ ءجۇر. بيىل ەرتە كوكتەمدە شىعىس قازاقستان وبلىسىنداعى شەتەلدىكتەرگە جەر ساتىلدى دەگەن اقپارات تاراعان، بۇعان قاتىستى جاۋاپتى مەكەمەلەر قاۋەسەتتى تەرىستەگەن.

"The Qazaq Times"