فوتو: https://kyrtag.kg

تاجىكستانمەن شەكاراداعى جەرگىلىكتى تۇرعىندار اراسىنداعى قاقتىعىس ۋشىعىپ كەتتى. بۇل ماسەلەدە رەسمي بىشكەك دۋشانبەنى ايىپتاي سويلەدى. قازىر قىرعىزستاننىڭ ءۇش اۋىلدىق وكرۋگىنىڭ اۋماعىندا توتەنشە جاعداي رەجيمى ەنگىزىلدى.

باتكەن وبلىسىنداعى رەسمي وكىلدىڭ ايتۋىنشا، تاجىكستانعا جاقىن ورنالاسقان ءۇش وكرۋگ – اق-ساي، اق-تاتىر جانە سامارقاندتا توتەنشە جاعداي ەنگىزىلگەن.

28 ساۋىردە تاجىكستانمەن شەكارالاس اۋىلدارداعى جەرگىلىكتى تۇرعىندار اراسىندا سۋ تاراتۋ پۋنكتىنىڭ اۋماعىندا قاقتىعىس باستالدى. قاقتىعىس بولعان جەرگە كەلگەن ەكى كورشى ەلدىڭ شەكاراشىلارى، سونداي-اق جەرگىلىكتى بيلىك وكىلدەرى ماسەلەنى شەشە الماعان. وسىدان كەيىن ەكى جاقتان شامامەن 100-150 ادام اراسىندا جانجال تۋىنداپ، مۇنىڭ ارتى قاقتىعىسقا ۇلاسقان. قاقتىعىس كەزىندە قىرعىزستاننىڭ ءتورت ازاماتى، تاجىكستاننىڭ جەتى ازاماتى جاراقات العان.

كەڭەس وداعى 1991 جىلى قۇلاعالى بەرى ورتالىق ازياداعى كەيبىر مەملەكەتتەر شەكارا ماسەلەسىن شەشە الماي كەلەدى. اسىرەسە، تاجىكستان، وزبەكستان مەن قىرعىزستانعا ورتاق فەرعانا اڭعارى بويىنداعى اۋماقتىڭ داۋلى تۇستارى كوپ. قىرعىز-تاجىك شەكاراسىنىڭ ۇزىندىعى شامامەن 980 كم. قازىرگە دەيىن 580 كيلومەترىنە بايلانىستى دەليميتاتسيا جانە دەماركاتسيا جۇمىستارى جۇرگىزىلگەن.

ەماركاتسيا جونىندەگى كوميسسيانىڭ سوڭعى وتىرىسى 2021 جىلعى ناۋرىزدا ءوتتى. دەلەگاتسيانى تاجىكستان مەن قىرعىزستاننىڭ ۇلتتىق قاۋىپسىزدىك مەملەكەتتىك كوميتەتتەرىنىڭ توراعالارى باسقاردى. بىراق شەكارانىڭ كەلىسىلمەگەن تۇستارى سونداعى ەلدى مەكەندەردەگى سۋ، جەر جانە ءالى انىقتالماعان شەكارانى كەسىپ ءوتۋ ماسەلەلەرى داۋعا ءجيى سەبەپ بولادى. داۋدىڭ سوڭى جانجالعا ۇلاسىپ، تاراپتار ءبىر-بىرىنە تاس اتادى، كەيدە قارۋدان وق اتادى.

2019 جىلى قىرعىز-تاجىك شەكاراسىندا كەمىندە ون جانجال بولعان. ءتورت جاعدايدا ادام ولگەن. قىركۇيەك ايىندا بولعان قاقتىعىستان بىرنەشە ادام قازا تاپتى.

"The Qazaq Times"