قازاق ادەبيەتىنىڭ ازۋلى اقىنى ەسەنعالي راۋشانوۆ. فوتو: Ult.kz

بەلگىلى اقىن، "جازۋشى" باسپاسىنىڭ ديرەكتورى، قازاقستان مەملەكەتتىك سىيلىعىنىڭ لاۋرەاتى ەسەنعالي راۋشانوۆ قايتىس بولدى. بۇل اقپاراتتى بۇگىن، 16 ساۋىردە جازۋشىلار وداعى باسقارما توراعاسىنىڭ ورىنباسارى اقبەرەن ەلگەزەك Facebook پاراقشاسىندا حابارلادى.

"قادىرلى اعايىن! قازاقتىڭ اسا كورنەكتى اقىنى، قازاقستان رەسپۋبليكاسى مەملەكەتتىك سىيلىعىنىڭ لاۋرەاتى ەسەنعالي راۋشانوۆتان ايىرىلىپ قالدىق. اللا الدىنان جارىلقاسىن. اسىل رۋحى بەيىشتىڭ تورىندە شالقىسىن. قوسىمشا اقپارات كەيىنىرەك بەرىلەدى" دەپ جازدى ەلگەزەك.

ەسەنعالي راۋشانوۆ 1957 جىلى 5 قازاندا قاراقالپاقستاندا تۋعان. قازمۋ-ءدىڭ (قازىرگى قازۇۋ) جۋرناليستيكا فاكۋلتەتىن بىتىرگەن. ولەڭدەرى 1973 جىلدان بەرى جاريالانىپ كەلەدى. 1983 جىلى «بەرداۋلەت پەن جولامان» اتتى پوەماسى قازاق كسر باسپا، پوليگرافيا جانە كىتاپ ساۋداسى ىستەرى جونىندەگى مەملەكەتتىك كوميتەتىنىڭ، قازاقستان جازۋشىلار وداعى، قازاقستان لكجو ورتالىق كوميتەتى مەن «جالىن» باسپاسىنىڭ وزىق شىعارمالارعا جاريالاعان بايگەسىندە ءبىرىنشى ورىن الدى.

1983-1987 جىلدارى "جالىن" جانە "اراي" جۋرنالدارىندا پوەزيا ءبولىمىنىڭ مەڭگەرۋشىسى، جاۋاپتى حاتشى، 1988-1995 جىلدارى ء"بىلىم جانە ەڭبەك" جۋرنالىنىڭ باس رەداكتورى قىزمەتىن اتقاردى. 1995 جىلدان ەلدەگى ەڭ ءىرى ادەبي باسپالاردىڭ ءبىرى "جازۋشى" باسپاسىنىڭ ديرەكتورى بولعان.

ونىڭ ولەڭدەرى ورىس، ليتۆا، بولگار، چەح، ۋكراين، وزبەك، قىرعىز تىلدەرىنە اۋدارىلعان. قازاقستان لەنين كومسومولى سىيلىعىنىڭ جانە حالىقارالىق «الاش» ادەبي سىيلىعىنىڭ لاۋرەاتى. ماسكەۋدە وتكەن جاس اقىن-جازۋشىلار فەستيۆالىنىڭ، سونداي-اق قازاق كسر-ءى شىعارماشىلىق جاستارىنىڭ "جىگەر" فەستيۆالىنىڭ تۇڭعىش لاۋرەاتى. قازاق كسر-ءى سىيلىقتارىمەن جانە تاۋەلسىز قازاقستاننىڭ ون جىلدىعى مەدالىمەن ماراپاتتالعان. مەملەكەتتىك سىيلىقتىڭ لاۋرەاتى (2006), "قۇرمەت" وردەنىنىڭ يەگەرى.

الاشتىڭ اياۋلى "ولەڭىنە" اينالعان اقىننىڭ وتباسى-تۋىستارى، بارشا وقىرماندارى مەن ادەبيەتسۇيەر قاۋىمعا قايعىرا كوڭىل ايتامىز.

قارا باۋىر قاسقالداق

قارا باۋىر قاسقالداق، قايدا ۇشتىڭ پىر-پىرلاپ؟

سازىڭ قالدى ءسابيدىڭ ەڭبەگىندەي بىلقىلداپ.

 

قاراباۋىر قاسقالداق، قاسقالداعىم، كەرى قايت،

سيرەپ كەتكەن توعايعا قامىقپا دەپ كوڭىل ايت!

 

ۇيا قالسا يەسىز، ايدىن ءۇشىن سول قايعى،

قاڭعىپ كەلگەن شۇرەگەي كولگە پانا بولمايدى.

 

ءوز بوساعاڭ بۇل جەردىڭ تاۋى، قىرى، توبەسى،

بوساعاسىن باسقاعا تاستاي ما ەكەن، و نەسى؟

قاسقالداعىم، كەرى قايت!..

"The Qazaq Times"